ಜೀವಂತ ಕಪ್ಪೆಗಳನ್ನು ಸಂಪ್ರದಾಯದಂತೆ ವಿವಿಧ ಸೊಪ್ಪುಗಳಿಂದ ಸಿಂಗಾರಗೊಳಿಸಿದ್ದ ಪೂಜಾ ದಂಡಿಗೆ ಕಟ್ಟಲಾಯಿತು. ದಂಡ ಹಿಡಿದ ಬಾಲಕರು ಮತ್ತು ಗ್ರಾಮಸ್ಥರು ಮಳೆಗಾಗಿ ಪ್ರಾರ್ಥಿಸಿದರು. ಗ್ರಾಮದ ಪ್ರತಿ ಮನೆಗಳ ಮುಂದೆಯೂ ಕಪ್ಪೆಗಳಿಗೆ ಪೂಜೆ ಸಲ್ಲಿಸಲಾಯಿತು. ದೇವರಿಗೆ ನೈವೇದ್ಯ ಅರ್ಪಿಸುವ ಸಲುವಾಗಿ ಪ್ರಸಾದ ತಯಾರಿಸಲು ಬೇಕಾದ ಅಕ್ಕಿ, ಕಾಯಿ, ಬೇಳೆ, ರಾಗಿಹಿಟ್ಟು ಇನ್ನಿತರ ಮೀಸಲು ಸಂಗ್ರಹಿಸಿ ಜೋಳಿಗೆ ತುಂಬಿಸಿಕೊಂಡರು.
ಕಪ್ಪೆ ಸೇವೆ ಮುಗಿದ ಬಳಿಕ ಮನೆ, ಮನೆಯಿಂದ ಸಂಗ್ರಹಿಸಿದ್ದ ಮೀಸಲು ವಸ್ತುಗಳಿಂದ ಗ್ರಾಮದ ಹೊರವಲಯದಲ್ಲಿ ಅನ್ನ, ಸಾರು, ಮುದ್ದೆ ತಯಾರಿಸಿ ದೇವರಿಗೆ ನೈವೇದ್ಯ ಅರ್ಪಿಸಲಾಯಿತು. ನೆರೆದಿದ್ದ ಎಲ್ಲರಿಗೂ ಪ್ರಸಾದ ಹಂಚಲಾಯಿತು.
ಗ್ರಾಮಸ್ಥ ಬಾಬ್ಲಾನಾಯ್ಕ ಮಾತನಾಡಿ, ಕಪ್ಪೆ ಸೇವೆ ಮಾಡಿ ಪ್ರಾರ್ಥನೆ ಸಲ್ಲಿಸಿದರೆ, ಮಳೆಯಾಗುತ್ತದೆ ಎಂಬ ನಂಬಿಕೆ ಹಿಂದಿನಿಂದಲೂ ನಡೆದು ಬಂದಿದೆ. ಈ ಹಿಂದೆ ಸೇವೆ ಸಲ್ಲಿಸಿ ದೇವರಿಗೆ ನೈವೇದ್ಯ ಸಮರ್ಪಿಸಿ ಪೂಜೆ ಸಲ್ಲಿಸುವುದರಷ್ಟರಲ್ಲಿಯೇ ಗುಡುಗು, ಮಿಂಚು ಸಹಿತ ಹದ ಮಳೆಯಾಗಿರುವ ಉದಾಹರಣೆ ಕೂಡ ಇದೆ. ದೈವಾನುಗ್ರಹದಿಂದ ಮಳೆಯಾದರೆ ಕುಡಿಯುವ ನೀರಿನ ಸಮಸ್ಯೆ ಜತೆ ರೈತರ ಬವಣೆ ನೀಗಲಿದೆ ಎಂದರು.
ವಾಲ್ಯಾನಾಯ್ಕ, ಪಿ.ರುದ್ರಾನಾಯ್ಕ, ಪಿ.ಕೆ.ಶಿವಕುಮಾರ, ಡಿ.ನಾಗರಾಜ, ಆರ್.ರವಿನಾಯ್ಕ, ಪುಟ್ಟಪ್ಪ, ಜಯಣ್ಣ, ಗೌರಮ್ಮ, ಗಂಗಮ್ಮ, ವಿನೋದಬಾಯಿ, ಸವಿತಾ, ಮಂಜುಳಾ, ಕಿರಣ್ನಾಯ್ಕ ಇತರರಿದ್ದರು.
