ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು, ನೀರು ನಿರ್ವಹಣಾ ಮಂಡಳಿಯ ನಿರ್ದೇಶನದಿಂದ ನಮ್ಮ ರಾಜ್ಯದ ಜನತೆಗೆ ಮರಣ ಶಾಸನದಂತಾಗಿದೆ. ಕಾವೇರಿ ಅಚ್ಚುಕಟ್ಟು ಪ್ರದೇಶದ ರೈತರು ಬೆಳೆದು ನಿಲ್ಲಿಸಿರುವ ಬೆಳೆಗಳಿಗೆ ಸಕಾಲಕ್ಕೆ ಮಳೆಯೂ ಬೀಳದ ಕಾರಣ ನೀರಿಲ್ಲದ ದುಸ್ಥಿತಿ ಒದಗಿ ಬಂದಿದೆ. ಈಗಾಗಲೇ ತ.ನಾಡಿಗೆ 13 ಟಿಎಂಸಿ ನೀರು ಹರಿದಿದೆ. ಈಗ ಮತ್ತೆ ಏಳು ಟಿಎಂಸಿ ನೀರನ್ನು ಪ್ರತಿ ದಿನ 5000 ಕ್ಯೂಸೆಕ್ನಂತೆ ಹರಿಯುವಂತೆ ನೀರು ನಿರ್ವಹಣಾ ಮಂಡಳಿಯ ನಡೆ ಏಕ ಸ್ವರೂಪದ್ದಾಗಿದೆ ಎಂದು ಮೇಲ್ನೋಟಕ್ಕೆ ಸಾಬೀತಾಗಿದೆ. ತ.ನಾಡಿಗೆ ಇಷ್ಟು ಪ್ರಮಾಣದ ನೀರು ಹರಿದ ನಂತರ ನಮ್ಮ ಜನ, ಜಾನುವಾರುಗಳಿಗೆ ಕುಡಿಯುವ ನೀರಿಗೆ ಹಾಹಾಕಾರ ಎದುರಾಗುತ್ತದೆ ಎಂಬ ಕನಿಷ್ಟ ಜ್ಞಾನವು ರಾಜ್ಯಸರ್ಕಾರಕ್ಕೆ ಇಲ್ಲದಿರುವುದು ವಿಪರ್ಯಾಸ. ನಿರ್ವಹಣಾ ಮಂಡಳಿಯ ನಡೆಯನ್ನು ಪ್ರಶ್ನಿಸಿ ಮೇಲ್ಮನವಿಗಳನ್ನು ಸಲ್ಲಿಸುವ ಗೋಜಿಗೆ ಹೋಗದ ಸರ್ಕಾರವು ರೈತರಿಗಾಗಿ ಏನನ್ನು ಮಾಡಲು ಹೊರಟಿದೆ ಎಂದು ಪ್ರಶ್ನಿಸಿದ್ದಾರೆ.
