ಒಂದೇ ಶ್ಲೋಕದಲ್ಲಿ ರಾಮಾಯಣ ಇರುವಂತೆಯೇ ಪ್ರಣತಿ ತನ್ನ ಒಂದೇ ಪೇಂಟಿಂಗ್ನಲ್ಲಿ ರಾಮಾಯಣದ ಪ್ರಮುಖ ಎಲ್ಲ ಕಥಾನಕವನ್ನೂ ಚಿತ್ರಿಸಿದ್ದಾಳೆ. ಜನಕ ಮಹಾರಾಜ ಆಯೋಜಿಸಿರುವ ಸೀತಾ ಸ್ವಯಂವರದಲ್ಲಿ ಶಿವ ಧನಸ್ಸು ಎತ್ತಿ ಮುರಿಯುತ್ತಿರುವ ಶ್ರೀರಾಮನ ಚಿತ್ರದಿಂದ ರಾಮಾಯಣ ಆರಂಭಗೊಂಡಿದೆ. ಸೀತಾ ವಿವಾಹ, ವನವಾಸ, ಶೂರ್ಪನಖಾ ಭಂಗ, ಮಾಯಾ ಜಿಂಕೆ, ಗೆರೆ ದಾಟಿ ಸೀತೆ ಹೊರ ಬರದಂತೆ ಲಕ್ಷ್ಮಣ ರೇಖೆ, ವೇಷ ಬದಲಿಸಿ ಬಂದ ರಾವಣ, ಸೀತಾಪಹರಣ, ಜಟಾಯು ಮರಣ, ರಾಮ-ಲಕ್ಷ್ಮಣರನ್ನು ಭುಜದ ಮೇಲೆ ಕೂರಿಸಿಕೊಂಡು ಸೀತಾನ್ವೇಷಣೆಯ ಹನುಮ, ಲಂಕಾ ದಹನ, ಸೀತೆಗೆ ರಾಮನ ಉಂಗುರ ಕೊಟ್ಟ ಮಾರುತಿ, ರಾಮಸೇತು ನಿರ್ಮಾಣ, ಲಂಕೆಯಲ್ಲಿ ರಾಮ-ಲಕ್ಷ್ಮಣರಿಂದ ರಾವಣ-ಕುಂಭಕರ್ಣ, ಇಂದ್ರಜಿತು ಅವರೊಂದಿಗೆ ಕಾದಾಟ, ಸಂಜೀವಿನಿ ಪರ್ವತ ಹೊತ್ತು ತಂದ ಆಂಜನೇಯ, ರಾವಣ ಸಂಹಾರ ಹಾಗೂ ಕೊನೆಯಲ್ಲಿ ರಾಮ-ಸೀತಾ, ಲಕ್ಷ್ಮಣ ಹಾಗೂ ಹನುಮಂತನಿರುವ ಬೃಹತ್ ಚಿತ್ರದೊಂದಿಗೆ ರಾಮಾಯಣ ಚಿತ್ರಣ ಮುಗಿಯುತ್ತದೆ.
ನಾನು ಯಾವುದೇ ಚಿತ್ರಕಲಾ ಕ್ಲಾಸ್ಗೆ ಹೋಗಿಲ್ಲ. ಬಾಲ್ಯದಿಂದಲೂ ಚಿತ್ರ ಬಿಡಿಸುವುದೆಂದರೆ ತುಂಬ ಇಷ್ಟ. ಶಾಲೆಯಲ್ಲಿ, ಗಣೇಶೋತ್ಸವ ಹಾಗೂ ಇನ್ನಿತರ ಕಡೆ ನಡೆಯುವ ಚಿತ್ರಕಲಾ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದು, ಪ್ರಶಸ್ತಿ ಗಳಿಸಿದ್ದೇನೆ. ಮೊಬೈಲ್ನಲ್ಲೇ ಯುಟ್ಯೂಬ್ ಮೂಲಕ ಚಿತ್ರಕಲೆಗೆ ಸಂಬಂಧಿಸಿ ಹೆಚ್ಚಿನ ಜ್ಞಾನ ಪಡೆದಿದ್ದೇನೆ. ಇನ್ನೂ ಹೆಚ್ಚು ಉತ್ತಮ ಚಿತ್ರ ಬಿಡಿಸಿ ಇನ್ನಷ್ಟು ಸಾಧನೆ ಮಾಡಬೇಕೆಂಬ ಕನಸಿದೆ.
| ಪ್ರಣತಿ ಜತ್ತನ್. ಚಿತ್ರಕಲೆಯ ಯುವ ಸಾಧಕಿ
