ಹೆಬ್ಬುಳದಲ್ಲಿ ವಿದ್ಯುತ್ ಅವಘಡ

ಅಂಕೋಲಾ: ವಿದ್ಯುತ್ ತಂತಿ ತುಂಡಾದ ಪರಿಣಾಮ 30ಕ್ಕೂ ಹೆಚ್ಚು ಮನೆಗಳಿಗೆ ಮತ್ತು ಪಂಪ್​ಹೌಸ್​ಗೆ ವಿದ್ಯುತ್ ಪ್ರವಹಿಸಿ ಗೃಹೋಪಯೋಗಿ ವಸ್ತುಗಳು ಹಾಗೂ ವಿದ್ಯುತ್ ಪರಿಕರಗಳು ಸುಟ್ಟು ಲಕ್ಷಾಂತರ ರೂ. ಹಾನಿಯಾದ ಘಟನೆ ತಾಲೂಕಿನ ಸುಂಕಸಾಳ ಗ್ರಾಪಂ ವ್ಯಾಪ್ತಿಯ ಹೆಬ್ಬುಳ ಗ್ರಾಮದಲ್ಲಿ ಗುರುವಾರ ಸಂಜೆ ನಡೆದಿದೆ.

ಸ್ಥಳಕ್ಕೆ ಹೆಸ್ಕಾಂ ಎಇಇ ಪ್ರವೀಣ ನಾಯ್ಕ ಭೇಟಿ ನೀಡಿ ಸ್ಥಳೀಯ ಲೈನ್​ವೆುನ್ ಮಹೇಶ ಅವರಿಂದ ಮಾಹಿತಿ ಪಡೆದರು. ಆಕಸ್ಮಿಕವಾಗಿ ಸಂಭವಿಸಿದ ವಿದ್ಯುತ್ ಅವಘಡದಲ್ಲಿ ಮನೆ ಮತ್ತು ಪಂಪ್​ಹೌಸ್​ಗೆ ಅಳವಡಿಸಿದ ಮೀಟರ್ ಬೋರ್ಡ್, ಪಂಪ್​ಸೆಟ್ ಹಾಗೂ ಗೃಹೋಪಯೋಗಿ ವಸ್ತುಗಳು ಸುಟ್ಟಿವೆ. ಹಾನಿಯಾದ ಬಗ್ಗೆ ಶಿರಸಿಯ ವಿದ್ಯುತ್ ಪರಿವೀಕ್ಷಕರು, ಕಂದಾಯ ಇಲಾಖೆಗೆ ವರದಿ ಸಲ್ಲಿಸಲಾಗುವುದು ಎಂದರು. ಶಾಖಾಧಿಕಾರಿ ಸಂತೋಷ ನಾಯ್ಕ ಉಪಸ್ಥಿತರಿದ್ದರು.

ವಿದ್ಯುತ್ ಅವಘಡದಿಂದಾದ ಸಮಸ್ಯೆಗಳ ಕುರಿತು ಗ್ರಾಪಂ ಸದಸ್ಯ ಪ್ರವೀಣ ನಾಯರ ಮತ್ತು ಗ್ರಾಮಸ್ಥರು ಅಧಿಕಾರಿಗಳ ಗಮನಕ್ಕೆ ತಂದರು.