ಶಾಲಾ ಕೊಠಡಿಗೆ ದುರಸ್ತಿ ಭಾಗ್ಯ ಕಲ್ಪಿಸಿದ ಪವರ್​ನ್ಯೂಸ್

ಗದಗ: ಅಕ್ಟೋಬರ್​ನಲ್ಲಿ ಅಬ್ಬರಿಸಿದ್ದ ಮಲಪ್ರಭಾ ನದಿ ಮತ್ತು ಬೆಣ್ಣೆ ಹಳ್ಳದ ಪ್ರವಾಹ ಹೊಡೆತಕ್ಕೆ ತುತ್ತಾಗಿ ಶಿಥಿಲಗೊಂಡಿದ್ದ ರೋಣ ತಾಲೂಕಿನ ಯಾವಗಲ್ ಗ್ರಾಮದ ಸರ್ಕಾರಿ ಪ್ರಾಥಮಿಕ ಗಂಡು ಮಕ್ಕಳ ಶಾಲೆಯ ಕೊಠಡಿಗಳ ದುರಸ್ತಿಗೆ ಜಿಲ್ಲಾ ಪಂಚಾಯಿತಿ ಮುಂದಾಗಿದೆ. ಯಾವಗಲ್ ಶಾಲೆ ಕೊಠಡಿಗಳು ಶಿಥಿಲಗೊಂಡಿರುವ ಕುರಿತು ವಿಆರ್​ಎಲ್ ಮೀಡಿಯಾದ ‘ಪವರ್ ನ್ಯೂಸ್’ ಆಪ್​ನಲ್ಲಿ ಶಿವರಾಜ್ ನವಲಗುಂದ ಅವರು ಪ್ರಕಟಿಸಿದ್ದ ವರದಿಯಿಂದ ಅಧಿಕಾರಿಗಳು ಎಚ್ಚೆತ್ತುಕೊಂಡಿದ್ದಾರೆ. 3.85 ಲಕ್ಷ ರೂ. ಅನುದಾನದಲ್ಲಿ ಎರಡು ಕೊಠಡಿಗಳ ದುರಸ್ತಿಗೆ ಮುಂದಾಗಿದ್ದಾರೆ.

2019ರ ಅಕ್ಟೋಬರ್​ನಲ್ಲಿ ಬೆಣ್ಣೆ ಹಳ್ಳದ ನೆರೆಯಿಂದ ಯಾವಗಲ್ ಗ್ರಾಮದೊಳಗೆ ನೀರು ಹೊಕ್ಕಿತ್ತು. ಸರ್ಕಾರಿ ಶಾಲೆ ಸೇರಿ ಅನೇಕ ಮನೆಗಳು ಜಲಾವೃತವಾಗಿದ್ದವು. ಸರ್ಕಾರಿ ಶಾಲೆ ಕೊಠಡಿಗಳೂ ಹಾಳಾಗಿದ್ದರಿಂದ ಮಕ್ಕಳಿಗೆ ತೊಂದರೆಯಾಗಿತ್ತು. ಬೀಳುವ ಹಂತ ತಲುಪಿದ್ದ ಕೊಠಡಿಗಳನ್ನು ಬಂದ್ ಮಾಡಿ ಬೇರೊಂದು ಕೊಠಡಿಯಲ್ಲಿ ಪಾಠ ಮಾಡಲಾಗಿತ್ತು.

80 ಕೊಠಡಿಗಳು ಹಾಳು: ನೆರೆ ಹಾವಳಿಯಿಂದ ನರಗುಂದ ಮತ್ತು ರೋಣ ತಾಲೂಕಿನ 80 ಗ್ರಾಮಗಳ ಸರ್ಕಾರಿ ಶಾಲಾ ಕೊಠಡಿಗಳು ಹಾನಿಗೀಡಾಗಿವೆ. ಹಾನಿಗೊಳಗಾದ ಕೊಠಡಿಗಳ ದುರಸ್ತಿ ಕಾರ್ಯಕ್ಕೆ ಸರ್ಕಾರ 16 ಕೋಟಿ ರೂ. ಅನುದಾನ ಬಿಡುಗಡೆ ಮಾಡಿದೆ. ಆಯಾ ಶಾಲೆಯ ಎಸ್​ಡಿಎಂಸಿಗೆ ದುರಸ್ತಿ ಜವಾಬ್ದಾರಿ ನೀಡಲಾಗಿದೆ. ಹಾನಿಯಾಗಿರುವ ಕೊಠಡಿಗಳ ಸ್ಥಿತಿ ಪರಿಶೀಲಿಸಿ 50 ಸಾವಿರದಿಂದ 5 ಲಕ್ಷ ರೂ.ವರೆಗೆ ಅನುದಾನ ಬಿಡುಗಡೆ ಮಾಡಲಾಗಿದ್ದು, ಮಾ.31ರೊಳಗೆ ದುರಸ್ತಿ ಕಾರ್ಯ ಪೂರ್ಣಗೊಳಿಸಿ ಎಂದು ಜಿಲ್ಲಾ ಪಂಚಾಯಿತಿಯಿಂದ ಎಲ್ಲ ಎಸ್​ಡಿಎಂಸಿಗೆ ಸೂಚನೆ ನೀಡಲಾಗಿದೆ.

https://www.vijayavani.net/karnataka-civil-services-teachers-transfer-regulation-bill-2020-tabled-in-assembly/

https://www.vijayavani.net/what-is-new-in-karnataka-civil-services-teachers-transfer-regulation-bill-2020-about-demanded-transfer-and-valaya-transfer/