ಹರಿಪ್ರಸಾದ್ ನಂದಳಿಕೆ ಕಾರ್ಕಳ

ಬಹಳ ವರ್ಷಗಳ ಹಿಂದೆ ಗ್ರಾಮದ ನೂರಾರು ಹೈನುಗಾರರಿಗೆ ಉಪಯೋಗಿಯಾಗಿದ್ದ ಮುಂಡ್ಕೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಪಶು ಚಿಕಿತ್ಸಾಲಯವು ಸುಸಜ್ಜಿತವಾಗಿ ನಿರ್ಮಿಸಲಾಗಿದ್ದರೂ ಪ್ರಸ್ತುತ ಕಾಯಂ ವೈದ್ಯರಿಲ್ಲದ ಪರಿಣಾಮ ಪಾಳು ಬಿದ್ದಿದೆ.

ಈ ಪಶು ಚಿಕಿತ್ಸಾಯಲಯ ವ್ಯಾಪ್ತಿಯಲ್ಲಿ ಸಾಕಷ್ಟು ಸಂಖ್ಯೆಯಲ್ಲಿ ಹೈನುಗಾರರಿದ್ದು, ತಮ್ಮ ಜಾನುವಾರುಗಳಿಗೆ ಅನಾರೋಗ್ಯ ಉಂಟಾದ ಸಂದರ್ಭ ತುರ್ತು ಚಿಕಿತ್ಸೆ ದೊರೆಯದೆ ಪರದಾಡುತ್ತಿದ್ದಾರೆ. ಇಲ್ಲಿಗೆ ಬೇರೆ ಗ್ರಾಮದ ಪಶುಚಿಕಿತ್ಸಾಲಯದ ವೈದ್ಯರು ಅಪರೂಪಕ್ಕೆ ಬರುತ್ತಿದ್ದು, ತುರ್ತು ಸೇವೆ ದೊರೆಯದೆ ಇರುವುದರಿಂದ ಹೈನುಗಾರರಿಗೆ ದೂರದ ಪಶುಚಿಕಿತ್ಸಾ ಕೇಂದ್ರದ ಅವಲಂಬನೆ ಅನಿವಾರ್ಯವಾಗಿದೆ.

ಮುಂಡ್ಕೂರು, ಮುಲ್ಲಡ್ಕ, ಸಚ್ಚೇರಿಪೇಟೆ, ಸಂಕಲಕರಿಯ,ಇನ್ನಾ ಭಾಗದಲ್ಲಿ ಅತಿ ಹೆಚ್ಚು ಹೈನುಗಾರರಿದ್ದು, ಕಾಯಂ ವೈದ್ಯರ ನೇಮಕಾತಿ ಕುರಿತು ರಾಜ್ಯ ಸರ್ಕಾರ ಶೀಘ್ರವೇ ನಿರ್ಣಯ ಕೈಗೊಂಡು ನೇಮಕಾತಿ ನಡೆಸಬೇಕೆಂದು ಈ ಭಾಗಗಳ ಜನತೆ ಆಗ್ರಹಿಸಿದ್ದಾರೆ.

ಭೂತ ಬಂಗಲೆಯಂತಿರುವ ಕಟ್ಟಡ

2009ರಲ್ಲಿ ಅಂದಿನ ಶಾಸಕ ಗೋಪಾಲ್ ಭಂಡಾರಿ ಪಶು ಚಿಕಿತ್ಸಾಲಯ ಉದ್ಘಾಟಿಸಿದ್ದು, ಸುಸಜ್ಜಿತವಾಗಿ ನಿರ್ಮಿಸಲಾಗಿತ್ತು. ಆದರೆ ಸೂಕ್ತ ನಿರ್ವಹಣೆ ಇಲ್ಲದಿರುವುದರಿಂದ ಕಟ್ಟಡದೊಳಗೆ ಗಿಡ, ಹುಲ್ಲು ಬೆಳೆದುಕೊಂಡಿದ್ದು, ಬಾವಲಿಗಳು ಇತರ ಜಂತುಗಳ ವಾಸಸ್ಥಾನವಾಗಿದೆ. ಮೇಲ್ನೋಟಕ್ಕೆ ಕಟ್ಟಡ ಪಾಳು ಬಿದ್ದು ಭೂತ ಬಂಗಲೆಯಂತೆ ಗೋಚರಿಸುತ್ತಿದೆ.

ಮುಂಡ್ಕೂರು ಪಶುಚಿಕಿತ್ಸಾಲಯಕ್ಕೆ ಬರುವ ಪಶುವೈದ್ಯರಿಗೆ ಮೂರು ಹೆಚ್ಚುವರಿ ಪಶುಚಿಕಿತ್ಸಾಲಯಗಳ ಜವಾಬ್ದಾರಿ ನೀಡಲಾಗಿದ್ದು, ಕಾರ್ಯೋತ್ತಡಗಳಿಂದ ಕರ್ತವ್ಯ ನಿರ್ವಹಿಸಲು ಕಷ್ಟವಾಗುತ್ತಿದೆ. ಪ್ರತಿ ಗುರುವಾರ ವೈದ್ಯರು ಇಲ್ಲಿ ಲಭ್ಯವಿದ್ದು, ತುರ್ತು ಕರೆ ಬಂದರೆ ಚಿಕಿತ್ಸಾಲಯಕ್ಕೆ ಬೀಗವೇ ಗತಿ. ಈ ಹಿನ್ನೆಲೆಯಲ್ಲಿ ಕಾಯಂ ವೈದ್ಯರ ನೇಮಕಾತಿಗೆ ಊರವರು ಒತ್ತಾಯಿಸಿದ್ದಾರೆ.