ವಾಟ್ಸ್​ಆ್ಯಪ್​ ಗ್ರೂಪ್​ಗೆ ಸೇರೋಕೂ ಮೊದ್ಲು ಅಡ್ಮಿನ್ ಯಾರೂಂತ ನೋಡಿ: ಈತನ ವಾಟ್ಸ್​ಆ್ಯಪ್​ ಗ್ರೂಪ್​ ಮೇಲಿದೆ ಪೊಲೀಸರ ಕಣ್ಣು!

ವಿಜಯಪುರ: ಯಾರಾದರೂ ವಾಟ್ಸ್​ಆ್ಯಪ್​ ಗ್ರೂಪ್​ಗೆ ಸೇರಿಸಿದರೆ ಅಥವಾ ವಾಟ್ಸ್​ಆ್ಯಪ್​ ಗ್ರೂಪ್​ಗೆ ಸೇರಿಕೊಳ್ಳುವಂತೆ ಯಾರಾದರೂ ಲಿಂಕ್ ಕಳುಹಿಸಿದರೆ ಹುಷಾರಾಗಿರಿ. ಯಾವುದಕ್ಕೂ ಅಡ್ಮಿನ್ ಯಾರು ಅಂತ ಒಮ್ಮೆ ನೋಡಿಕೊಂಡೇ ಗ್ರೂಪ್​ಗೆ ಸೇರಿ ಅಥವಾ ಗ್ರೂಪ್​ನಲ್ಲಿ ಮುಂದುವರಿಯಿರಿ.

ಏಕೆಂದರೆ ವಾಟ್ಸ್​ಆ್ಯಪ್​ ಗ್ರೂಪ್​ ಅಡ್ಮಿನ್ ಕ್ರಿಮಿನಲ್ ಹಿನ್ನೆಲೆ ಹೊಂದಿದ್ದರೆ, ಗ್ರೂಪ್ ಕ್ರಿಯೇಟ್ ಮಾಡಿಕೊಂಡು ಮಾಡಬಾರದ್ದನ್ನು ಮಾಡಿದರೆ ಗ್ರೂಪ್​ನಲ್ಲಿರುವವರ ಮೇಲೂ ಪೊಲೀಸರ ನಿಗಾ ಬೀಳುವ ಸಾಧ್ಯತೆ ಇರುತ್ತದೆ. ಅದಕ್ಕೆ ವಿಜಯಪುರದ ಈ ಪ್ರಕರಣವೇ ಉದಾಹರಣೆ.

ವಿಜಯಪುರದಲ್ಲಿ ಬುದ್ದು ರಾಠೋಡ ಎಂಬಾತನ ಮೇಲೆ ಗುಂಡು ಹಾರಿಸಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪ್ರಮುಖ ಆರೋಪಿ ತುಳಸೀರಾಮ ಹರಿಜನ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಮೂರ್ನಾಲ್ಕು ಆರೋಪಿಗಳ ಪೈಕಿ ಒಬ್ಬನಾಗಿರುವ ಸುಮಾರು 25 ವರ್ಷದ ತುಳಸೀರಾಮ, ಕೆಲವು ಅಪರಾಧ ಕೃತ್ಯಗಳಲ್ಲಿ ತೊಡಗಿಸಿಕೊಂಡಿದ್ದಾನೆ.

ವಿಜಯಪುರದ ಜಲನಗರ ಪೊಲೀಸ್ ಠಾಣೆಯ ವ್ಯಾಪ್ತಿಯ ನಿವಾಸಿ ಆಗಿರುವ ಈತ 2-3 ವರ್ಷಗಳಿಂದ ಅಪರಾಧಗಳಲ್ಲಿ ಶಾಮೀಲಾಗಿದ್ದಾನೆ. ಟಿಜೆ ಬಾಯ್ಸ್​, ಟಿಜೆ ಸರ್ಕಾರ್ ಎಂದು 2-3 ವಾಟ್ಸ್​ಆ್ಯಪ್​ ಗ್ರೂಪ್​ಗಳನ್ನು ಮಾಡಿರುವ ಈತನ ಬಂಧನದ ಬಳಿಕ ಪೊಲೀಸರು, ಈ ವಾಟ್ಸ್​ಆ್ಯಪ್​ ಗ್ರೂಪ್​ಗಳಲ್ಲಿ ಇರುವವರ ಮೇಲೂ ನಿಗಾ ಇರಿಸಿದ್ದಾರೆ ಎಂದು ಎಸ್​ಪಿ ಅನುಪಮ್​ ಅಗರ್​​ವಾಲ್ ತಿಳಿಸಿದ್ದಾರೆ.

https://www.vijayavani.net/he-got-slapped-infron-of-hundreds-of-other/