ಹಾಜೀ ಅಬ್ದುಲ್ಲಾ ತಾಯಿ ಮತ್ತು ಮಕ್ಕಳ ಆಸ್ಪತ್ರೆಯ ಈ ನಿವೇಶನದಲ್ಲಿ ಹೆರಿಗೆ ವಿಭಾಗ ಆರಂಭಿಸಿಲು ಕಟ್ಟಡ ನಿರ್ಮಾಣಕ್ಕಾಗಿ ಅಡಿಪಾಯ ತೆಗೆಯಲಾಗಿತ್ತು. ಅದೀಗ 30 ಅಡಿಗೂ ಅಧಿಕ ಆಳದ ಗುಂಡಿಯಂತಾಗಿದ್ದು, ಮಳೆನೀರು ನಿಂತು ದೊಡ್ಡ ಬಾವಿಯಂತಾಗಿದೆ. ಸಾರ್ವಜನಿಕರಿಗೆ ಜೀವಾಪಾಯ ಆಗದಿರಲೆಂದು ತಡೆಬೇಲಿ ಅಳವಡಿಸಲಾಗಿತ್ತು. ಆದರೆ, ಆ ಬೇಲಿಯನ್ನೂ ಮುರಿದು ಕಸ-ತ್ಯಾಜ್ಯಗಳ ರಾಶಿ ತಂದು ಸುರಿಯುತ್ತಿದ್ದಾರೆ. ಸಂಜೆಯಾದ ಬಳಿಕ ಕೆಲವರಿಗೆ ಇದು ಅನೈತಿಕ ತಾಣವೂ ಆಗಿರುತ್ತಿತ್ತು. ಇದೀಗ ತಡೆಬೇಲಿಯೂ ಇಲ್ಲದಿರುವುದು ಅವರಿಗೂ ಅನುಕೂಲ ಕಲ್ಪಿಸಿದಂತಾಗಿದೆ. ತ್ಯಾಜ್ಯ ಎಸೆಯಲು ಸರ್ಕಾರಿ ಸ್ಥಳ ಬಳಸಿಕೊಂಡಿದ್ದು ಹಾಗೂ ನಿವೇಶನದ ಬೇಲಿ ತೆರವುಗೊಳಿಸಿದ್ದೂ ಸಹ ಅಪರಾಧವಾಗಿದೆ. ನಗರಸಭೆ ಹಾಗೂ ಜಿಲ್ಲಾಡಳಿತದ ಅಧಿಕಾರಿಗಳು ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಸಾಮಾಜಿಕ ಕಾರ್ಯಕರ್ತ ತಾರಾನಾಥ ಮೇಸ್ತ ಶಿರೂರು ಆಗ್ರಹಿಸಿದ್ದಾರೆ.
