ದೇವನಹಳ್ಳಿ : ಪ್ರತಿದಿನ ಕೊಳಕು ತೆಗೆದು ಪಟ್ಟಣ ಸ್ವಚ್ಛವಾಗಿಸುವ ಪೌರಕಾರ್ಮಿಕರಿಗೂ ವಿಶಾಂತಿ, ಆರೋಗ್ಯ ಅವಶ್ಯಕ. ದೈಹಿಕ ಆರೋಗ್ಯದ ಜತೆಗೆ ಅವರಲ್ಲಿರುವ ಕ್ರೀಡಾ ಪ್ರತಿಭೆ ಪ್ರದರ್ಶಿಸಲು ಕ್ರೀಡಾಕೂಟ ಆಯೋಜನೆ ಮಾಡಲಾಗಿದೆ ಎಂದು ಪುರಸಭೆ ಅಧ್ಯಕ್ಷ ಡಿ.ಎಂ.ಮುನಿಕೃಷ್ಣ ಹೇಳಿದರು. ಪೌರಕಾರ್ಮಿರ ದಿನಾಚರಣೆ ಪ್ರಯುಕ್ತ ಪಟ್ಟಣದ ಸರ್ಕಾರಿ ಕಿರಿಯ ಕಾಲೇಜಿನ ಆಟದ ಮೈದಾನದಲ್ಲಿ ಆಯೋಜ್ದಿದ ಪೌರಕಾರ್ಮಿಕರ ಕ್ರೀಡಾಕೂಟದಲ್ಲಿ ಮಾತನಾಡಿದ ಅವರು, ಪೌರಕಾರ್ಮಿಕರಿಗೆ ಇದು ಸದಾವಕಾಶ. ಅಥ್ಲೆಟಿಕ್, ಹಗ್ಗಜಗ್ಗಾಟ, ವೇಗದ ನಡಿಗೆ, ಮ್ಯೂಸಿಕಲ್ ಚೇರ್, ವಾಲೀಬಾಲ್, ಗುಂಡು ಎಸೆತ ಸೇರಿ ಹಲವು ಸ್ಪರ್ಧೆಗಳನ್ನು ಏರ್ಪಡಿಸಲಾಗಿದೆ. 90 ಕ್ಕೂ ಹೆಚ್ಚು ಕಾರ್ಮಿಕರು ಉತ್ಸಾಹದಿಂದ ಭಾಗವಹಿಸಿದ್ದು, 23ರಂದು ವಿಜೇತರಿಗೆ ಪ್ರಶಸ್ತಿ ಪತ್ರ ಹಾಗೂ ಬಹುಮಾನ ವಿತರಿಸಲಾಗುವುದು ಎಂದರು.
