ನಿರಂತರ ಮಳೆಯಿಂದಾಗಿ ಬೆಳೆ ನುಂಗಿದ ಕಳೆ: ಚಿಂತೆಗೀಡಾದ ಸಾವಿರಾರು ರೈತರು

ಯಲಬುರ್ಗಾ: ಕಳೆದ ವಾರದಿಂದ ಸತತ ಸುರಿಯುತ್ತಿರುವ ಮಳೆಯಿಂದಾಗಿ ಬೆಳೆಗಳಲ್ಲಿ ಕಳೆ ಬೆಳೆದಿದ್ದು, ರೈತರನ್ನು ಚಿಂತೆಗೀಡು ಮಾಡಿದೆ.

ತಾಲೂಕಿನಲ್ಲಿ ಮೆಕ್ಕೆಜೋಳ 20,185 ಹೆಕ್ಟೇರ್, ಸಜ್ಜೆ 12,224 ಹೆ., ಸೂರ್ಯಕಾಂತಿ 310 ಹೆ. ಬಿತ್ತನೆಯಾಗಿದೆ. ಜಮೀನುಗಳಲ್ಲಿ ಬೆಳೆಗಿಂತಲೂ ಕಸ ಎತ್ತರವಾಗಿ ಬೆಳೆದಿದ್ದು, ಸಾವಿರಾರು ರೂ. ಖರ್ಚು ಮಾಡಿ ಬಿತ್ತನೆ ಮಾಡಿದ ರೈತರಿಗೆ ಕಳೆ ತೆಗೆಸಲು ಕೂಲಿ ಕೊಡುವುದಕ್ಕೂ ಸಾಧ್ಯವಾಗುತ್ತಿಲ್ಲ. ಬೆಳೆಯ ಆದಾಯಕ್ಕೂ ಎರಡು ಪಟ್ಟು ಕಳೆ ಕೀಳಲು ಖರ್ಚು ಮಾಡಬೇಕಾದ ಅನಿವಾರ್ಯತೆ ಇದೆ.

ಇದನ್ನೂ ಓದಿ: ನಿರಂತರ ಮಳೆಯಿಂದಾಗಿ ಭೂ ಕುಸಿತ; ಮೃತರ ಸಂಖ್ಯೆ 21ಕ್ಕೆ ಏರಿಕೆ

ಮುಂಗಾರು ಮಳೆ ಕೊರತೆಯಿಂದ ರೈತರು ಕಂಗಾಲಾಗಿದ್ದರು. ತಡವಾಗಿ ಮಳೆ ಸುರಿದ ಕಾರಣ ವಿವಿಧ ಬೀಜಗಳ ಬಿತ್ತನೆಯಾಗಿದ್ದು, ಅವು ಈಗ 20 ರಿಂದ 25 ದಿನದ ಬೆಳೆಗಳಾಗಿವೆ. ನಿತ್ಯ ಸುರಿಯುತ್ತಿರುವ ಮಳೆಯಿಂದಾಗಿ ಬೆಳೆಯ ಜತೆಗೆ ವಿಪರೀತ ಕಳೆ ಹೆಚ್ಚಿದೆ. ಎಡೆಕುಂಟೆ ಹೊಡೆಯಲು ಮತ್ತು ಕಳೆ ತೆಗೆಯಲು ಮಳೆ ಬಿಡುವು ನೀಡುತ್ತಿಲ್ಲ. ಇದರಿಂದ ಬಿತ್ತನೆಗೊಂಡ ಹೊಲಗಳು ಕಸದಿಂದ ಮಾರ್ಪಟ್ಟಿವೆ.