ಭಾರಿ ಶಬ್ದಕ್ಕೆ ಬೆಚ್ಚಿಬಿದ್ದ ಜನ

ಬಂಗಾರಪೇಟೆ-ಮಾಲೂರು ತಾಲೂಕಿನ ಗಡಿಯಲ್ಲಿ ಆತಂಕ  | ನಿಗೂಢವಾಗಿ ಉಳಿದ ಮೂಲ

ಬಂಗಾರಪೇಟೆ: ತಾಲೂಕಿನ ಟೇಕಲ್​ ಮಾರ್ಗದ ಬಳಿ ಗುರುವಾರ ಬೆಳಗ್ಗೆ 10ಗಂಟೆ ಸುಮಾರಿಗೆ ಭಾರೀ ಸ್ಫೋಟದ ಶಬ್ದ ಕೇಳಿ ಬಂದಿದ್ದು, ಸ್ಥಳಿಯರು ಬೆಚ್ಚಿಬಿದ್ದಿದ್ದಾರೆ. ಇದೇ ಮಾದರಿಯ ಶಬ್ದ ಕಳೆದ 8ತಿಂಗಳ ಹಿಂದೆಯೂ ಕೇಳಿಬಂದಿತ್ತು. ಆದರೆ ಶಬ್ದದ ಮೂಲ ಮಾತ್ರ ಇಂದಿಗೂ ನಿಗೂಢವಾಗಿಯೇ ಉಳಿದಿದೆ.

ಟೇಕಲ್​ ಮಾರ್ಗದಲ್ಲಿ ಶಬ್ದ ಕೇಳಿ ಬಂದಿದ್ದರಿಂದ ಕ್ವಾರಿಯಲ್ಲಿ ಬಂಡೆಗಳಿಗೆ ಬ್ಲಾಸ್ಟ್​ ಮಾಡಿರಬಹುದು ಎಂದು ತಿಳಿದಿದ್ದ ಜನರು ಹೋಗಿ ಪರಿಶೀಲಿಸಿದಾಗ ಯಾವುದೇ ಕ್ವಾರಿಯಲ್ಲಿ ಬ್ಲಾಸ್ಟ್​ ಮಾಡಿಲ್ಲ ಎಂಬ ಮಾಹಿತಿ ಲಭ್ಯವಾಗಿದೆ. ಟೇಕಲ್​ ಮಾರ್ಗದ ಒಂಬತ್ತುಗುಳಿ, ತ್ಯಾರನಹಳ್ಳಿ, ರಾಮಾಪುರ ಗ್ರಾಮಗಳ ಕಡೆ ಪೊಲೀಸರು ಶೋಧ ನಡೆಸಿದರೂ ಸಹ ಶಬ್ದದ ಮೂಲ ತಿಳಿದುಬಂದಿಲ್ಲ. ಬಂಗಾರಪೇಟೆ, ಮಾಲೂರು ತಾಲೂಕಿನ ವ್ಯಾಪ್ತಿಯಲ್ಲಿ ಈ ಸ್ಪೋಟಕ ಶಬ್ದ ಕೇಳಿಬಂದಿದ್ದು, ಪೊಲೀಸ್​ ಇಲಾಖೆ ಪರಿಶೀಲನೆ ನಡೆಸುತ್ತಿದೆ.

ತ್ಯಾರನಹಳ್ಳಿ ಮತ್ತು ಟೇಕಲ್​ ಸಮೀಪದ ಹುಣ್ಸಿಕೋಟೆ ಕೆರೆಯಲ್ಲಿ ಜೆಟ್​ ಬಿದ್ದು ಹೋಗಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಸುಳ್ಳು ಸುದ್ದಿ ಹಬ್ಬಿಸಿದ್ದು, ಬೇರೆ ಎಲ್ಲೋ ಬಿದ್ದಿರುವ ಹೆಲಿಕಾಪ್ಟರ್​ ಚಿತ್ರವನ್ನು ಕಿಡಿಗೇಡಿಗಳು ಹರಿಬಿಟ್ಟಿದ್ದಾರೆ.