ಇಂದ್ರಾಳಿಯಿಂದ ಸಗ್ರಿ ಶಾಲೆ ಸಂಪರ್ಕಿಸುವ ಇನ್ನೊಂದು ರಸ್ತೆಯ ಎಡ-ಬಲದ ಚರಂಡಿಗಳಲ್ಲೂ ಪ್ಲಾಸ್ಟಿಕ್ ತ್ಯಾಜ್ಯ ತುಂಬಿಕೊಂಡಿದೆ. ಈ ಮಾರ್ಗದಲ್ಲಿ ಸುಮಾರು ಮುಕ್ಕಾಲು ಕಿ.ಮೀ.ಯಷ್ಟು ರಸ್ತೆಯ ಅಕ್ಕ-ಪಕ್ಕದಲ್ಲಿ ಯಾವುದೇ ಮನೆಗಳಿಲ್ಲ. ಹೀಗಾಗಿ ಈ ಮಾರ್ಗದಲ್ಲಿ ಸಂಚರಿಸುವ ವಾಹನ ಸವಾರರು ತಮ್ಮ ಮನೆಯ ಕಸವನ್ನು ಇಲ್ಲಿ ಎಸೆಯುತ್ತಾರೆ. ಸಮೀಪದ ಕೆಲ ಹೋಟೆಲ್ನವರು ಹಾಗೂ ರಾತ್ರಿ ವೇಳೆ ಎಣ್ಣೆ ಪಾರ್ಟಿ ಮಾಡಿದವರೂ ಸಹ ಇಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯ, ಖಾಲಿ ಸಾರಾಯಿ ಬಾಟಲಿ ಎಸೆಯತ್ತಿದ್ದಾರೆ. ಖಾಸಗಿ ಸಭೆ, ಸಮಾರಂಭಗಳಲ್ಲಿ ಬಳಸಿದ ಊಟ-ತಿಂಡಿಯ ಪೇಪರ್ ಪ್ಲೇಟ್ಸ್ ಹಾಗೂ ಪೇಪರ್ ಕಪ್ ಗಳನ್ನೂ ಚರಂಡಿಗೆ ಎಸೆಯುತ್ತಿದ್ದಾರೆ. ನಾಯಿ, ದನಗಳು ಆ ಕಸವನ್ನು ಮೇಲಕ್ಕೆ ತಂದು ಅದರಲ್ಲಿರುವ ಆಹಾರ ಪದಾರ್ಥ ತಿನ್ನುವುದರಿಂದ ರಸ್ತೆಯ ಮೇಲೂ ಪ್ಲಾಸ್ಟಿಕ್ ತ್ಯಾಜ್ಯ ಹರಡಿಕೊಳ್ಳುತ್ತಿದ್ದು, ಇಲ್ಲಿನ ಪರಿಸರ ಹದಗೆಟ್ಟಿದೆ.
