ಈಗಾಗಲೇ ಬೇಸಿಗೆ ಆರಂಭವಾಗಿ ಗ್ರಾಮಕ್ಕೆ ಪೂರೈಕೆಯಾಗುವ ಕುಡಿಯುವ ನೀರು ಮತ್ತು ಅಲ್ಲಲ್ಲಿ ನೀರಿನ ತೊಟ್ಟಿಗಳನ್ನು ಮಾಡಿ ಅವುಗಳಿಗೆ ಕೊಳವೆ ಬಾವಿಗಳಿಂದ ನೀರು ಪೂರೈಸಿ ಸಾಕು ಪ್ರಾಣಿಗಳಿಗೆ ಕುಡಿಯಲು ನೀರಿನ ವ್ಯವಸ್ಥೆ ಮಾಡಲಾಗಿದೆ. ಆದರೆ, ಮೇಲಿಂದ ಮೇಲೆ ವಿದ್ಯುತ್ ವ್ಯತ್ಯಯ ಉಂಟಾಗುವುದರಿಂದ ಜಾನುವಾರುಗಳಿಗೆ ಕುಡಿಯಲು ನೀರು ಇಲ್ಲದಂತಾಗಿ ರೈತರು ಕಂಗಾಲಾಗಿದ್ದಾರೆ. ಕಾಳು ಕಡಿಗಳನ್ನು ಮನೆಯಿಂದ ಗಿರಣಿಗೆ ಒಯ್ಯುವಷ್ಟರಲ್ಲಿ ಪವರ್ ಇಲ್ಲದಾಗಿರುತ್ತದೆ. ಆಹಾರ ಉತ್ಪನ್ನಗಳನ್ನು ಗಿರಣಿಯಲ್ಲಿಟ್ಟು ಕರೆಂಟ್ ಬರುವ ತನಕ ಕಾಯ್ದು ಕುಳಿತುಕೊಳ್ಳಬೇಕಾದ ಅನಿವಾರ್ಯ ಬಂದೊದಗಿದೆ. ಜನರು ಹಾಗೂ ಹಿಟ್ಟಿನ ಗಿರಣಿ ಮಾಲೀಕರು ರೋಸಿ ಹೋಗಿದ್ದಾರೆ. ಕಳೆದ ನಾಲ್ಕೈದು ದಿನಗಳಿಂದ ವಿದ್ಯುತ್ ಸರಿಯಾಗಿ ಪೂರೈಕೆಯಾಗುತ್ತಿಲ್ಲ. ಮಾತ್ರವಲ್ಲದೆ, ಪ್ರತಿ ಗಂಟೆಗೆ ಐದಾರು ಬಾರಿ ವಿದ್ಯುತ್ ಸಂಪರ್ಕ ಕಡಿದುಕೊಳ್ಳುತ್ತಿದೆ. ಕಳೆದ ಕೆಲ ತಿಂಗಳ ಹಿಂದೆ ಲೋಡ್ಶೆಡ್ಡಿಂಗ್ನಿಂದಾಗಿ ಹಲವು ಮನೆಗಳಲ್ಲಿನ ಟಿವಿ, ಫ್ರಿಜ್, ಫ್ಯಾನ್ ಸೇರಿ ವಿದ್ಯುತ್ ಚಾಲಿತ ವಸ್ತುಗಳು ಸುಟ್ಟು ದುರಸ್ತಿ ಮಾಡಲಾಗದಷ್ಟು ಹಾನಿಗೀಡಾಗಿದ್ದವು. ಈಗಲೂ ಅದೇ ಭಯ ಗ್ರಾಮಸ್ಥರನ್ನು ಆವರಿಸಿದೆ.
