ಪಾವಗಡದಲ್ಲಿ ಶೇಂಗಾ ಬೆಳೆಗೆ ಕರಿಸೀಡೆ ಬಾಧೆ ; ಇಳುವರಿ ಮೇಲೆ ಬೀರಲಿದೆ ಪರಿಣಾಮ

ಪಾವಗಡ: ತಾಲೂಕಿನ ಹಲವು ಭಾಗಗಳಲ್ಲಿ ಶೇಂಗಾ ಗಿಡಕ್ಕೆ ಎಲೆತಿನ್ನುವ ಹುಳುಗಳ ಕಾಟದ ಜತೆಗೆ ಕರಿಸೀಡೆ ಬಾಧೆ ಕಾಡತೊಡಗಿದ್ದು, ಮುಂಗಾರಿನಲ್ಲಿ ಮಳೆಯಾಶ್ರಿತ ಬೆಳೆಗಾರರಿಗೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ.

ಕೃಷಿ ಇಲಾಖೆ ಮೂಲಗಳ ಪ್ರಕಾರ ತಾಲೂಕಿನಲ್ಲಿ ಮುಂಗಾರು ವಾಡಿಕೆ ಮಳೆ 191 ಮಿ.ಮೀ.ಇದೆ. ಈ ಬಾರಿ ಇಲ್ಲಿಯವರೆಗೆ 244 ಮಿ.ಮೀ.ಮಳೆಯಾಗಿದ್ದು, ವಾಡಿಕೆಗಿಂತ 28 ಮಿ.ಮೀ.ಹೆಚ್ಚಾಗಿಯೇ ಮಳೆಯಾಗಿದೆ. ಇಲಾಖೆ ತಾಲೂಕಿನ 62 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ಶೇಂಗಾ ಬಿತ್ತನೆ ಗುರಿ ಹೊಂದಿತ್ತು. ಆ ಪೈಕಿ ಮೇ, ಜೂನ್ ಹಾಗೂ ಜುಲೈನಲ್ಲಿ ಬಂದ ಮಳೆಗೆ 46,290ಕ್ಕೂ ಹೆಚ್ಚು ಎಕರೆ ಪ್ರದೇಶದಲ್ಲಿ ಶೇಂಗಾ ಬಿತ್ತನೆ ವಾಡಲಾಗಿದೆೆ. ಅಷ್ಟಿಷ್ಟು ಬೇಸಾಯ ಮಾಡಿದ್ದ ಶೇಂಗಾ ಗಿಡಕ್ಕೆ ದಿಢೀರನೆ ಕರಿಸೀಡೆ ಬಾಧೆ ಆವರಿಸಿದೆ.

ತಾಲೂಕಿನ ಶೈಲಾಪುರ, ಗುಜ್ಜನಡು, ರಾಮಯ್ಯನ ಪಾಳ್ಯ, ದೇವಲಕೆರೆ, ಚಿನ್ನಮ್ಮನಹಳ್ಳಿ, ಮಂಗಳವಾಡ, ದೇವರಬೆಟ್ಟ, ಕೋಣನಕುರಿಕೆ, ಕರೆಕ್ಯಾತನಹಳ್ಳಿ, ನಲಿಗಾನಹಳ್ಳಿ ಸೇರಿ ಇನ್ನು ಹಲವು ಭಾಗಗಳಲ್ಲಿ ಈ ಬೆಳೆ ಚಿಗುರಿ ಹೂ ಬಿಡುವ ಹಂತದಲ್ಲಿದ್ದು, ಈಗ ಕರಿಸೀಡೆ ಬಾಧೆ ಇಳುವರಿ ಮೇಲೆ ಪರಿಣಾಮ ಬೀರಲಿದೆ ಎಂದು ರೈತರು ಆತಂಕದಲ್ಲಿದ್ದಾರೆ.