ಸಾಲ ವಸೂಲಾತಿಯಲ್ಲಿ ಜಿಲ್ಲೆಗೆ ಪ್ರಥಮ

ಎನ್.ಆರ್.ಪುರ: ತಾಲೂಕಿನ ಪಿಸಿಎಆರ್​ಡಿ ಬ್ಯಾಂಕ್ ಸಾಲ ವಸೂಲಾತಿಯಲ್ಲಿ ಶೇ.80ರಷ್ಟು ಸಾಧನೆ ಮಾಡಿದ್ದು, ಸಾಲ ವಸೂಲಾತಿಯಲ್ಲಿ ಜಿಲ್ಲೆಗೆ ಪ್ರಥಮ ಸ್ಥಾನ ಪಡೆದಿದೆ ಎಂದು ಬ್ಯಾಂಕ್ ಅಧ್ಯಕ್ಷ ಕೆ.ಸಿ.ಜಯಪಾಲ್ ತಿಳಿಸಿದರು.

ಕೃಷಿ ಭವನದಲ್ಲಿ ಶನಿವಾರ ಆಯೋಜಿಸಿದ್ದ ಪಿಸಿಎಆರ್​ಡಿ ಬ್ಯಾಂಕ್ ಸರ್ವ ಸದಸ್ಯರ ಸಭೆಯಲ್ಲಿ ಮಾತನಾಡಿ, ನಬಾರ್ಡ್ ನಿಯಮದಂತೆ ನಮ್ಮ ಬ್ಯಾಂಕ್ ಪ್ರಥಮ ದರ್ಜೆಯಲ್ಲಿದ್ದು ಎ ವರ್ಗದ ಬ್ಯಾಂಕ್ ಆಗಿದೆ. ಹೆಚ್ಚಿನ ಸಾಲ ವಸೂಲಾತಿಯಿಂದ ಶೇ.3ರ ಬಡ್ಡಿ ದರದಲ್ಲಿ ಸಾಲ ವಿತರಿಸಲಾಗುತ್ತಿದೆ. ಈ ವರ್ಷ ಸದಸ್ಯರಿಗೆ ನಬಾರ್ಡ್ ಯೋಜನೆಯಡಿ 3.11 ಕೋಟಿ ರೂ. ಹಾಗೂ ಸ್ವಂತ ಬಂಡವಾಳದಿಂದ 1.21 ಕೋಟಿ ರೂ. ಸಾಲ ವಿತರಿಸಲಾಗಿದೆ ಎಂದು ಮಾಹಿತಿ ನೀಡಿದರು.

ಬ್ಯಾಂಕ್ ವ್ಯವಸ್ಥಾಪಕ ಎಚ್.ಎ.ಪ್ರದ್ಯುಮ್ನ ಮಾತನಾಡಿ, ಸರ್ಕಾರದ ನಿರ್ದೇಶನದಂತೆ ಸದಸ್ಯರು ಷೇರುಗಳನ್ನು 1 ಸಾವಿರ ರೂ.ಗೆ ಏರಿಸಬೇಕಾಗಿದೆ. ಆಡಿಟ್ ವರದಿಯಲ್ಲೂ ಷೇರುಧನ ಹೆಚ್ಚಿಸಲು ಸಲಹೆ ನೀಡಿದ್ದಾರೆ. ಷೇರುಧನ ಹೆಚ್ಚಾಗುವುದರಿಂದ ದುಡಿಯುವ ಬಂಡವಾಳವೂ ಅಧಿಕವಾಗಲಿದೆ ಎಂದರು.