2 ಕೆ.ಜಿ. ಅಕ್ಕಿ, ಒಂದಷ್ಟು ಆಲೂಗಡ್ಡೆ- ಪೌರಕಾರ್ಮಿಕರ ಕಥೆ-ವ್ಯಥೆ ಬಯಲಾಯಿತು ಖಾಸಗಿ ಸಂಸ್ಥೆಯ ಅಧ್ಯಯನದ ಮೂಲಕ

ಬೆಂಗಳೂರು: ಲಾಕ್​ಡೌನ್​ನಿಂದಾಗಿ ಬೆಂಗಳೂರಿನಂತಹ ಮಹಾ ನಗರದಲ್ಲಿ ಒಂದು ಹೊತ್ತಿನ ಊಟಕ್ಕೂ ಕಾರ್ವಿುಕರು ಪರದಾಡುವಂತಾಗಿದೆ. ಕಾರ್ವಿುಕರ ಸ್ಥಿತಿಯನ್ನು ಖಾಸಗಿ ಸಂಸ್ಥೆಯೊಂದು ಸರ್ವೆ ಮಾಡಿದ್ದು, ಸರ್ಕಾರ ಭರವಸೆ ನೀಡಿದ್ದರೂ ಸಮರ್ಪಕವಾಗಿ ಆಹಾರ ಪೂರೈಕೆಯಾಗುತ್ತಿಲ್ಲ ಎಂಬುದು ಕಂಡುಬಂದಿದೆ,

ಕರೊನಾ ಸೋಂಕು ತಡೆಯಲು ದೇಶಾದ್ಯಂತ ಲಾಕ್​ಡೌನ್ ಮಾಡಲಾಗಿದೆ. ಅದ ರಿಂದಾಗಿ ಪ್ರತಿದಿನದ ದುಡಿಮೆಯಲ್ಲಿ ಜೀವನ ಸಾಗಿಸುತ್ತಿದ್ದ ಕಾರ್ವಿುಕರಿಗೆ ಆದಾಯವಿಲ್ಲದಂತಾಗಿದ್ದು, ನಿತ್ಯ ಆಹಾರ ಸಮಸ್ಯೆ ಎದುರಿಸುತ್ತಿದ್ದಾರೆ. ಬೆಂಗಳೂರಿನಲ್ಲಿನ ಕಾರ್ವಿುಕರ ಸ್ಥಿತಿ ಕುರಿತಂತೆ ‘ಮರಾ’ ಸ್ವಯಂ ಸೇವಾ ಸಂಸ್ಥೆ ನಡೆಸಿರುವ ಅಧ್ಯಯನ ಪ್ರಕಾರ ಚಿನ್ನಪ್ಪ ಲೇಔಟ್, ಮಹದೇವಪುರ ಮತ್ತು ದೊಡ್ಡಗುಬ್ಬಿಯಲ್ಲಿನ 1 ಸಾವಿರಕ್ಕೂ ಹೆಚ್ಚಿನ ಕಾರ್ವಿುಕರನ್ನು ಮಾತನಾಡಿಸಲಾಗಿದೆ. ಅವರೆಲ್ಲರಿಗೂ ಲಾಕ್​ಡೌನ್ ಘೋಷಣೆಯಾದ ಒಂದೆರಡು ದಿನಗಳಲ್ಲಿ ಬಿಬಿಎಂಪಿ ಆಹಾರ ಕಿಟ್ ವಿತರಿಸಿದ್ದು ಬಿಟ್ಟರೆ ಈವರೆಗೆ ಯಾವುದೇ ರೀತಿಯ ನೆರವು ನೀಡಿಲ್ಲ ಎಂಬುದು ಬೆಳಕಿಗೆ ಬಂದಿದೆ.

2 ಕೆ.ಜಿ. ಅಕ್ಕಿ, ಒಂದಷ್ಟು ಆಲೂಗಡ್ಡೆ: ಮೊದಲ ಹಂತದ ಲಾಕ್​ಡೌನ್ ಸಂದರ್ಭದಲ್ಲಿ ಬಿಬಿಎಂಪಿ ಯಿಂದ ಕಾರ್ವಿುಕರಿಗೆ ಆಹಾರದ ಕಿಟ್ ವಿತರಿಸಲಾಗಿತ್ತು. ಅದರಲ್ಲಿ 2 ಕೆ.ಜಿ. ಅಕ್ಕಿ, ಒಂದಿಷ್ಟು ಆಲೂಗಡ್ಡೆ ಹೊರತುಪಡಿಸಿ ಬೇರೆ ಯಾವುದೇ ಆಹಾರ ಪದಾರ್ಥಗಳಿರಲಿಲ್ಲ. ನಂತರ ಕೆಲದಿನ ಒಂದು ಹೊತ್ತಿನ ಊಟ ಪೂರೈಕೆ ಮಾಡಲಾಗಿತ್ತು. ಅದನ್ನು ಹೊರತುಪಡಿಸಿದರೆ ಇನ್ಯಾವುದೇ ನೆರವು ಸಿಕ್ಕಿಲ್ಲ.

ತ್ಯಾಜ್ಯ ಶೇಖರಣೆ ಸ್ಥಳದಲ್ಲೇ ವಾಸ: ಚಿನ್ನಪ್ಪ ಲೇಔಟ್​ನಲ್ಲಿ ಕಾರ್ವಿುಕರು ಆಹಾರದ ಸಮಸ್ಯೆ ಜತೆಗೆ ವಸತಿ ಸಮಸ್ಯೆಯನ್ನೂ ಎದುರಿಸುತ್ತಿದ್ದಾರೆ. ಹತ್ತಾರು ಕಾರ್ವಿುಕರು ತ್ಯಾಜ್ಯ ಮರುಬಳಕೆ ಘಟಕದಲ್ಲಿಯೇ ವಾಸ ಮಾಡುತ್ತಿದ್ದಾರೆ. ದೊಡ್ಡಗುಬ್ಬಿಯಲ್ಲಿ ಶೀಟ್​ಗಳು ಕಿತ್ತು ಹೋಗಿರುವ ಗುಡಿಸಿಲಿನಲ್ಲಿ ಇದ್ದಾರೆ.

ಸುರಕ್ಷತಾ ಸಾಧನಗಳಿಲ್ಲ: ಕಾರ್ವಿುಕರಿಗೆ ಅಗತ್ಯ ಸುರಕ್ಷತಾ ಸಾಧನ, ಮಾಸ್ಕ್, ಸ್ಯಾನಿಟೈಸರ್​ಸಿಗುತ್ತಿಲ್ಲ. ಕರೊನಾ ಭೀತಿಯಿದ್ದರೂ ದೂರವುಳಿಯಲು ಏನು ಮಾಡಬೇಕು ಎಂಬುದು ತೋಚದಂತಾಗಿದೆ.

ಗುತ್ತಿಗೆದಾರರು ನೆರವಾಗಲಿಲ್ಲ: ರಸ್ತೆ ಕಾಮಗಾರಿ ಸೇರಿ ಇನ್ನಿತರ ಕೆಲಸಗಳಲ್ಲಿ ತೊಡಗುವ ಕಾರ್ವಿುಕರ ನೆರವಿಗೆ ಅವರನ್ನು ಕೆಲಸಕ್ಕೆ ಕರೆದುಕೊಂಡು ಹೋಗುತ್ತಿದ್ದ ಗುತ್ತಿಗೆ ದಾರರು ಬಂದಿಲ್ಲ. ಕಾರ್ವಿುಕರ ಸಂಪರ್ಕಕ್ಕೇ ಅವರು ಸಿಗುತ್ತಿಲ್ಲ. ಅಧಿಕಾರಿಗಳೂ ಕಾರ್ವಿುಕರ ಸಮಸ್ಯೆಗಳನ್ನು ಆಲಿಸುವ ವ್ಯವಧಾನ ತೋರಿಲ್ಲ.

ನೀರು, ಶೌಚಕ್ಕೂ ಸಮಸ್ಯೆ: ಆಹಾರವಷ್ಟೇ ಅಲ್ಲದೆ, ಶುದ್ಧ ಕುಡಿಯುವ ನೀರಿಗೂ ಸಮಸ್ಯೆ ಎದುರಾಗಿದೆ. ಬಹುತೇಕ ಕಡೆ ನೀರಿಗಾಗಿ ಪರದಾಡುವ ಸ್ಥಿತಿಯಿದೆ. ಮಹದೇವಪುರದಲ್ಲಿನ ಕಾರ್ವಿುಕರ ಕಾಲನಿಯಲ್ಲಿ ಶೌಚಗೃಹವಿಲ್ಲದೆ ಸಮಸ್ಯೆ ಸೃಷ್ಟಿಯಾಗಿದೆ. ಕಾರ್ವಿುಕರು ವಾಸಿಸುವ ಎಲ್ಲೆಡೆಯೂ ಇದೇ ಪರಿಸ್ಥಿತಿ ಇದೆ.