ಕಾಂಗ್ರೆಸ್​ನಿಂದ ಪ್ರವಾಸೋದ್ಯಮದ ಕಗ್ಗೊಲೆ

ಉಡುಪಿ: ಕಾರ್ಕಳದ ಉಮಿಕಲ್​ ಬೆಟ್ಟದಲ್ಲಿ ನಿಮಾರ್ಣವಾಗಿದ್ದ ಪರಶುರಾಮ ಮೂರ್ತಿ ಹಾಗು ಥೀಮ್​ ಪಾರ್ಕ್​ ಬಗ್ಗೆ ಕಾಂಗ್ರೆಸ್​ ಸುಳ್ಳು ಹೇಳಿಕೆಗಳ ಮೂಲಕ ವಿವಾದ ಎಬ್ಬಿಸಿ, ಪ್ರವಾಸೋದ್ಯಮದ ಕಗ್ಗೊಲೆಯನ್ನು ನಡೆಸಿದೆ ಎಂದು ಶಾಸಕ ಸುನೀಲ್​ ಕುಮಾರ್​ ಆಕ್ರೋಶ ವ್ಯಕ್ತಪಡಿಸಿದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಪರಶುರಾಮ ಮೂರ್ತಿಯ ವಿನ್ಯಾಸವನ್ನು ಬದಲಿಸಲು ಗುತ್ತಿಗೆದಾರ ಶಿಲ್ಪಿ ಜಿಲ್ಲಾಡಳಿತದ ಅನುಮತಿ ಪಡೆದು, ಕಾರ್ಯಾರಂಭ ಮಾಡಲು ಹೊರಟಾಗ ಪರಾಜಿತ ಅಭ್ಯರ್ಥಿ ಬೆಟ್ಟದ ದಾರಿಗೆ ಮಣ್ಣು ಹಾಕಿ ಸ್ಥಳಾಂತರ ಮಾಡದಂತೆ ತಡೆದಿದ್ದಾರೆ. ಹೈಕೋರ್ಟ್​ನಲ್ಲಿ ಮೂರ್ತಿ ಕಂಚಿನದ್ದು ಎಂಬುದಾಗಿ ಸಾಬೀತಾಗಿದೆ. ಆದರೂ ಸುಳ್ಳುಗಳ ಮೇಲೆ ಸುಳ್ಳು ಪೋಣಿಸುತ್ತಿದ್ದಾರೆ. ಒಂದು ವರ್ಷದಿಂದ ಕಾಮಗಾರಿ ಸ್ಥಗಿತವಾಗಿದೆ. ಇದಕ್ಕೆ ಕಾಂಗ್ರೆಸ್​ ಹೊಣೆ. ಯೋಜನೆಗೆ ಪೂರ್ಣಗೊಳ್ಳಲು ಬಾಕಿ ಇರುವ ಹಣವನ್ನು ಬಿಡುಗಡೆಗೊಳಿಸುವ ಬದಲು ತನಿಖೆ ನೆಪದಲ್ಲಿ ರಾಜಕಾರಣ ಮಾಡುತ್ತಿದ್ದಾರೆ ಎಂದರು.

ಖಾಸಗಿ ವ್ಯಕ್ತಿ ದೂರಿನ ಆಧಾರದಲ್ಲಿ ತನಿಖೆ

ಸರ್ಕಾರಿ ಕಾಮಗಾರಿಗಳಲ್ಲಿ ಲೋಪಗಳಾಗಿದ್ದರೆ ಸಂಬಂಧಪಟ್ಟ ಇಲಾಖೆ ದೂರು ನೀಡಬೇಕು. ಆದರೆ ಪರಶುರಾಮ ಥೀಮ್​ ಪಾರ್ಕ್​ ವಿಷಯದಲ್ಲಿ ಖಾಸಗಿ ವ್ಯಕ್ತಿ ನೀಡಿದ ದೂರಿಗೆ ಎಫ್​.ಐ.ಆರ್​ ಆಗಿದೆ. ದೂರುದಾರ ಪೊಲೀಸರೊಂದಿಗೆ ಮಹಜರು ಪ್ರಕ್ರಿಯೆಗೆ ತೆರಳಿದ್ದಾರೆ. ಬಂಧಿಸಲ್ಪಟ್ಟಿರುವ ಶಿಲ್ಪಿಗೆ ಕಾಂಗ್ರೆಸ್​ ಕಚೇರಿಯಲ್ಲಿ ಪಟ್ಟಿಮಾಡಿರುವ ಪ್ರಶ್ನೆಗಳನ್ನು ಪೋಲಿಸರು ಕೇಳುತ್ತಿದ್ದಾರೆ. ಅಜೆಕಾರು ಕೊಲೆ ಪ್ರಕರಣ ಆರೋಪಿಗಳನ್ನು 3 ದಿನ ಕಸ್ಟಡಿಗೆ ಪಡೆಯುವ ಪೋಲಿಸರು, ಅಮಾಯಕ ಶಿಲ್ಪಿಯನ್ನು 5 ದಿನ ಯಾಕೆ ಕಸ್ಟಡಿಗೆ ಪಡೆದಿದ್ದಾರೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ಜಿ.ಪಂ. ಮಾಜಿ ಸದಸ್ಯ ಸುಮಿತ್​ ಶೆಟ್ಟಿ ಕೌಡೂರು, ಜನಜಾಗೃತಿ ವೇದಿಕೆ ಅಧ್ಯಕ್ಷ ಸಚ್ಚಿದಾನಂದ ಶೆಟ್ಟಿ, ನೀರೆ ಗ್ರಾ.ಪಂ. ಅಧ್ಯಕ್ಷ ಸಚ್ಚಿದಾನಂದ ಪ್ರಭು, ಎರ್ಲಪಾಡಿ ಗ್ರಾಪಂ ಅಧ್ಯಕ್ಷ ಸುನೀಲ್​ ಹೆಗ್ಡೆ, ಬೈಲೂರು ಗ್ರಾಪಂ ಅಧ್ಯೆ ಸುಜಾತಾ ಪೂಜಾರಿ, ತಾ.ಪಂ. ಮಾಜಿ ಅಧ್ಯಕ್ಷೆ ಮಾಲಿನಿ ಜೆ. ಶೆಟ್ಟಿ, ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷ ರಾಕೇಶ್​ ಶೆಟ್ಟಿ ಕುಕ್ಕುಂದೂರು, ಸಂತೋಷ್​ ಬೈಲೂರು, ಗುರುರಾಜ್​ ಮಾಡ ಉಪಸ್ಥಿತರಿದ್ದರು.