ಮುಗಿಯದ ಕೆಲಸ ನಿಲ್ಲದ ಸಂಚಕಾರ

ಹೇಮನಾಥ್ ಪಡುಬಿದ್ರಿ

ನಿರಂತರ ಮಳೆಯಿಂದ ಪಡುಬಿದ್ರಿ-ಕಾರ್ಕಳ ರಾಜ್ಯ ಹೆದ್ದಾರಿ ನಿರ್ವಹಣೆ ವಿಳಂಬವಾಗಿದ್ದು, ವಾಹನ ಸಂಚಾರ ಅಪಾಯಕಾರಿಯಾಗಿ ಪರಿಣಮಿಸಿರುವುದರ ಜತೆಗೆ ಪಾದಚಾರಿಗಳು ಪ್ರಾಣಭಯದಿಂದ ಓಡಾಡುವಂತಾಗಿದೆ.

ಕೈಗಾರಿಕಾ ಪ್ರದೇಶವಾಗಿ ಬೆಳೆದಿರುವ ನಂದಿಕೂರು, ಎಲ್ಲೂರು, ಇನ್ನ ಸಹಿತ ಕಾರ್ಕಳ ಭಾಗಗಳಿಗೆ ಸಂಪರ್ಕಿಸುವ ಈ ರಸ್ತೆಯ ಇಕ್ಕೆಲಗಳಲ್ಲಿ ಬೆಳೆದ ಗಿಡಗಳು ಹೆದ್ದಾರಿಯನ್ನೇ ಆಕ್ರಮಿಸಿದೆ. ಪಡುಬಿದ್ರಿ ಪೇಟೆ ಭಾಗದ ಹೆದ್ದಾರಿಯಲ್ಲಿ ಗಿಡಗಂಟಿಗಳು ಬೆಳೆದು ಸೂಚನಾ ಫಲಕಗಳೇ ಕಾಣದಂತಾಗಿದೆ. ಪರಿಣಾಮ ರಸ್ತೆಗಳ ಸ್ಥಿತಿ ಅರಿಯದೇ ವಾಹನಗಳು ಅಪಘಾತಕ್ಕೊಳಗಾಗುತ್ತಿವೆ.

ಪಡುಬಿದ್ರಿ-ಕಾರ್ಕಳ ರಸ್ತೆ ಸಂಪರ್ಕಿಸಲು ನಂದಿಕೂರು ಬಳಿ ನಿರ್ಮಿಸಿರುವ ಕೊಂಕಣ ರೈಲು ಮೇಲ್ಸೇತುವೆ ಹೊಂಡಗುಂಡಿಗಳಿಂದ ಕೂಡಿದ್ದು, ವಾಹನ ಸವಾರರಿಗೆ ಅಪಾಯ ತಂದೊಡ್ಡಿದೆ. ನಂದಿಕೂರು ಸೇತುವೆ ಸಹಿತ ಅಡ್ವೆ ಬೈಲು ಪ್ರದೇಶದಲ್ಲಿ ಡಾಂಬರು ಕಿತ್ತುಹೋಗಿ ಸಂಚಾರ ದುಸ್ತರವಾಗಿದೆ. ಅಡ್ವೆ ಕಿರುಸೇತುವೆ ಇಕ್ಕೆಲಗಳಲ್ಲಿ ಡಾಂಬರು ಬಿರುಕು ಬಿಟ್ಟು, ಸೇತುವೆ ಮಧ್ಯದಲ್ಲಿ ಹೊಂಡಮಯವಾಗಿದೆ.

ಕೆಸರುಮಯಗೊಳ್ಳುವ ರೈಲ್ವೆ ಸೇತುವೆ

ಕೊಂಕಣ ರೈಲ್ವೆ ಇಲಾಖೆ ವ್ಯಾಪ್ತಿಗೆ ಸೇರಿದ ನಂದಿಕೂರು ರೈಲ್ವೆ ಸೇತುವೆ ಅವೈಜ್ಞಾನಿಕ ಕಾಮಗಾರಿಯಿಂದ ಪ್ರತಿ ಮಳೆಗಾಲದಲ್ಲಿಯೂ ಕೆಸರುಮಯವಾಗುತ್ತಿದೆ. ಪ್ರತಿ ಬಾರಿಯೂ ತೇಪೆ ಹಾಕುವ ಕಾರ್ಯವಷ್ಟೇ ನಡೆಯುತ್ತಿದೆ. ಸೇತುವೆ ಕಾಂಕ್ರಿಟ್ ಬಿರುಕುಬಿಟ್ಟಿದ್ದು, ಶಾಶ್ವತ ಪರಿಹಾರ ಇನ್ನೂ ಮರೀಚಿಕೆಯಾಗಿದೆ. ಪಡುಬಿದ್ರಿಯಿಂದ ಕಾಂಜರಕಟ್ಟೆವರೆಗೆ ಹಲವು ಬಸ್ ತಂಗುದಾಣಗಳಿದ್ದು, ಎಲ್ಲವೂ ಹುಲ್ಲಿನ ಪೊದೆಗಳಿಂದ ಆವೃತ್ತವಾಗಿವೆ. ಬಸ್‌ಗಾಗಿ ಜನರು ರಸ್ತೆಯಲ್ಲೇ ನಿಲ್ಲಬೇಕಾದ ಪರಿಸ್ಥಿತಿಯಿದ್ದು, ಬಸ್‌ಗಳು ಕೂಡ ಸಮರ್ಪಕವಾಗಿ ಗೋಚರಿಸುವುದಿಲ್ಲ. ಅಲ್ಲದೇ ಭಾರಿ ಗಾತ್ರದ ಟ್ರಕ್‌ಗಳು ಅತಿ ವೇಗವಾಗಿ ಇಲ್ಲಿ ಸಂಚರಿಸುತ್ತಿದ್ದು, ಪೊದೆಗಳಿಂದ ಆವೃತ್ತವಾದ ರಸ್ತೆ ಕಾಣದೆ ಅಪಘಾತಕ್ಕೊಳಗಾಗುತ್ತಿವೆ.