ಪದವಿ ಕಾಲೇಜುಗಳಲ್ಲಿ ಶುಲ್ಕ ತಾರತಮ್ಯ; ಲಕ್ಷಾಂತರ ಬಡ ವಿದ್ಯಾರ್ಥಿಗಳ ಪಾಲಕರಲ್ಲಿ ಆತಂಕ ; ಯಾವುದೇ ವಿದ್ಯಾರ್ಥಿಗಳಿಗೂ ವಿನಾಯಿತಿ ಇಲ್ಲ

ತುಮಕೂರು : ಪದವಿ ಕಾಲೇಜುಗಳ ಪ್ರವೇಶ ಪ್ರಕ್ರಿಯೆ ನಡೆಯುತ್ತಿದ್ದು, ಲಕ್ಷಾಂತರ ಬಡ ವಿದ್ಯಾರ್ಥಿಗಳು ಪ್ರವೇಶ ಶುಲ್ಕ ‘ತಾರತಮ್ಯ’ದಿಂದ ಕಂಗೆಟ್ಟಿದ್ದಾರೆ. ಸಾಮಾನ್ಯ ವರ್ಗದ ವಿದ್ಯಾರ್ಥಿಗಳು ಭರಿಸುವ ಶುಲ್ಕವನ್ನೇ ಇತರ ಹಿಂದುಳಿದ ವರ್ಗಗಳ ಹಾಗೂ ಪ್ರವರ್ಗ-1 ಬಡ ವಿದ್ಯಾರ್ಥಿಗಳು ಪಾವತಿಸಬೇಕಾಗಿದೆ.

ರಾಜ್ಯದ 28 ವಿಶ್ವವಿದ್ಯಾಲಯಗಳು ಹಾಗೂ 432 ಸರ್ಕಾರಿ ಪದವಿ ಕಾಲೇಜುಗಳಲ್ಲಿ ಈ ವರ್ಷ ಲಕ್ಷಾಂತರ ವಿದ್ಯಾರ್ಥಿಗಳು ಪ್ರವೇಶ ಬಯಸಿದ್ದು, ಕಾಲೇಜಿನತ್ತ ಮುಖ ಮಾಡಲು ತವಕಿಸುತ್ತಿದ್ದಾರೆ. ಆದರೆ, ಕರೊನಾ ಸಂಕಷ್ಟದಿಂದ ಹಳಿತಪ್ಪಿದ ಬದುಕು ಸರಿಪಡಿಸಿಕೊಳ್ಳುವ ಮುನ್ನವೇ ಪಾಲಕರಿಗೆ ಮಕ್ಕಳ ಪದವಿ ಪ್ರವೇಶ ಶುಲ್ಕ ಹೊರೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ.

ಶುಲ್ಕ ತಾರತಮ್ಯ: ವಿವಿ ಸಂಯೋಜಿತ ಕಾಲೇಜುಗಳಲ್ಲಿ ಓದಲು ಬಯಸುವ ಪ್ರತಿಭಾನ್ವಿತ ಬಡ ವಿದ್ಯಾರ್ಥಿಗಳು ಸಾಮಾನ್ಯ ವರ್ಗದ ವಿದ್ಯಾರ್ಥಿಗಳಷ್ಟೇ ಶುಲ್ಕ ಪಾವತಿಸಬೇಕಿದೆ.

2.50 ಲಕ್ಷ ರೂ., ಆದಾಯ ಮಿತಿಯೊಳಗಿನ ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಹಾಗೂ ಅದರ ಮೇಲ್ಪಟ್ಟು 10 ಲಕ್ಷ ರೂ., ವರೆಗಿನ ಆದಾಯ ಮಿತಿ ಎಸ್ಸಿ-ಎಸ್ಟಿ ವಿದ್ಯಾರ್ಥಿಗಳಿಗೆ ಶುಲ್ಕ ರಿಯಾಯಿತಿ ಇದೆ. ಅದೇ ಪ್ರವರ್ಗ-1 ಹಾಗೂ 2ಎ, 2ಬಿ, 3ಎ, 3ಬಿ, ಇಡಬ್ಲೂೃಎಸ್ ಒಳಗೊಂಡ ಒಬಿಸಿ ಸಮುದಾಯದ ವಿದ್ಯಾರ್ಥಿಗಳು ಸಾಮಾನ್ಯ ವರ್ಗದ ವಿದ್ಯಾರ್ಥಿಗಳು ಭರಿಸುವಷ್ಟೇ ಶುಲ್ಕ ಪಾವತಿಸಬೇಕಿದೆ. ಇದೇ ರೀತಿ ವಿವಿ ವ್ಯಾಪ್ತಿಯ ಪದವಿ ಕಾಲೇಜುಗಳ ಪ್ರವೇಶ ಶುಲ್ಕದಲ್ಲೂ ತಾರತಮ್ಯ ಇದೆ. ಸಾಮಾನ್ಯ ವರ್ಗದವರು ಪಾವತಿಸುವಷ್ಟೇ ಶುಲ್ಕವನ್ನು ಒಬಿಸಿ, ಪ್ರವರ್ಗ-1 ಸಮುದಾಯದ ವಿದ್ಯಾರ್ಥಿಗಳು ಕಟ್ಟಬೇಕಿದೆ. ಈ ಹೊರೆ ತಗ್ಗಿಸುವ ನಿಟ್ಟಿನಲ್ಲಿ ಸರ್ಕಾರ ಮನಸ್ಸು ಮಾಡಬೇಕೆಂಬುದು ಪಾಲಕರ ಆಗ್ರಹಪೂರ್ವಕ ಒತ್ತಾಯವಾಗಿದೆ.