ಪಟ್ಟಣದ ತಾಲೂಕು ಕಚೇರಿಯ ಮುಂಭಾಗ ತಾಲೂಕಿನ ದರಸಗುಪ್ಪೆ ಗ್ರಾಮದ ರೈತ ಹೋರಾಟಗಾರ ಪ್ರಭಾಕರ್ ಸಿಡಿಎಸ್ ಪಿಕಪ್ ನಾಲೆಯ ಒತ್ತುವರಿ, ಏರಿ ರಸ್ತೆಯ ದುರಸ್ತಿ ಹಾಗೂ ತಮ್ಮ ಮೇಲೆ ನಡೆದ ಹಲ್ಲೆ ಪ್ರಕರಣಕ್ಕೆ ಸೂಕ್ತ ನ್ಯಾಯ ಕೊಡಿಸುವಂತೆ 14 ದಿನಗಳಿಂದ ಧರಣಿ ನಡೆಸುತ್ತಿದ್ದೂ ಯುಗಾದಿ ಹಬ್ಬದಮದೂ ಹೋರಾಟ ನಿರತರಾಗಿದ್ದರು. ಇವರ ಈ ಹೋರಾಟಕ್ಕೆ ಮಂಡ್ಯ ರಕ್ಷಣಾ ವೇದಿಕೆ ಬಿ.ಶಂಕರ್ ಬಾಬು, ರೈತ ಮುಖಂಡ ಕಿರಂಗೂರು ಪಾಪು, ಕರವೇ ಅಧ್ಯಕ್ಷ ಚಂದಗಾಲು ಶಂಕರ್, ಪ್ರಜ್ಞಾವಂತರ ವೇದಿಕೆಯ ಚಿಕ್ಕತಮ್ಮೇಗೌಡ ಸೇರಿದಂತೆ ಹಲವು ಸಂಘಟನೆ ಮುಖಂಡರು ಬೆಂಬಲ ವ್ಯಕ್ತಪಡಿಸಿ ಪ್ರತಿಭಟನಾನಿರತ ಸ್ಥಳದಲ್ಲೇ ನಾಡಧ್ವಜಗಳೊಂದಿಗೆ ಮಾವಿನ ತೋರಣ ಕಟ್ಟಿ, ಮಹಾತ್ಮ ಗಾಂಧೀಜಿ ಹಾಗೂ ಬಾಬಾ ಸಾಹೇಬ್ ಡಾ.ಬಿ.ಆರ್.ಅಂಬೇಡ್ಕರ್ ಭಾವಚಿತ್ರಗಳಿಗೆ ಪೂಜೆ ಸಲ್ಲಿಸಿದರು. ನಂತರ ಜಾಗಟೆ ಬಡಿದು, ಒಬ್ಬಟ್ಟು ತಯಾರಿಸಿ, ತಿನ್ನುವ ಮೂಲಕ ನ್ಯಾಯಕ್ಕಾಗಿ ತಾಲೂಕು ಆಡಳಿತ ಹಾಗೂ ನೀರಾವರಿ ಇಲಾಖೆಯ ಅಧಿಕಾರಿ-ಸಿಬ್ಬಂದಿ ಹಾಗೂ ಕ್ಷೇತ್ರದ ಶಾಸಕರ ವಿರುದ್ಧ ಕಹಿ ಹಬ್ಬದ ಆಚರಣೆ ನಡೆಸಿ ಆಕ್ರೋಶ ವ್ಯಕ್ತಪಡಿಸಿದರು.
