ಮೈಸೂರು ದಸರಾ ಎಂದರೆ ಅರಮನೆ, ಅಂಬಾರಿ, ಆನೆಗಳು, ರಾಜಮನೆತನ ಕಣ್ಮುಂದೆ ಬಂದರೆ, ಮಡಿಕೇರಿ ದಸರಾ ವಿಶೇಷ ಕಾರಣಕ್ಕೆ ಗಮನ ಸೆಳೆಯುತ್ತದೆ. ಇಲ್ಲಿ ಝಗಮಗಿಸುವ ಬೆಳಕು, ಅಬ್ಬರದ ಸಂಗೀತ, ಹುಚ್ಚೆದ್ದು ಕುಣಿಯುವ ಯುವ ಸಮೂಹ, ಪೌರಾಣಿಕ ಕತೆಗಳನ್ನು ಹೇಳುವ ಟ್ಯಾಬ್ಲೋಗಳು, ಆ ಟ್ಯಾಬ್ಲೋಗಳಲ್ಲಿ ಬೆಂಕಿಯುಗುಳುವ ರಾಕ್ಷಸರ ಪ್ರತಿಕೃತಿಗಳು ನೆನಪಾಗುತ್ತದೆ. ಮೈಸೂರು ದಸರಾದಂತೆ ಮಡಿಕೇರಿ ದಸರಾಕ್ಕೂ ಐತಿಹಾಸಿಕ ಹಿನ್ನೆಲೆ ಇದೆ. ಧಾರ್ಮಿಕತೆ ನಂಟು ಅಂಟಿಕೊಂಡಿದೆ. ಸ್ಥಳೀಯರಿಗೆ ಭಾವನಾತ್ಮಕತೆಯ ಬಂಧವೂ ಇದೆ. ಹಾಗಾಗಿಯೇ ಮಡಿಕೇರಿ ದಸರಾ ಎಂದರೆ ಸಾಕು ಸ್ಥಳೀಯರು ಎಲ್ಲಾ ಮರೆತು ಹಬ್ಬದ ಯಶಸ್ಸಿಗಾಗಿ ಹಗಲಿರುಳು ದುಡಿಯಲು ಸಜ್ಜಾಗಿಬಿಡುತ್ತಾರೆ.
