ರಸ್ತೆಗಿಳಿದ ಕೆಎಸ್​ಆರ್​ಟಿಸಿ ಬಸ್

ಶಿವಮೊಗ್ಗ: ಸಾರಿಗೆ ನಿಗಮಗಳ ನೌಕರರು ನಡೆಸುತ್ತಿದ್ದ ಮುಷ್ಕರ ನಾಲ್ಕನೇ ದಿನಕ್ಕೆ ಅಂತ್ಯಗೊಂಡಿದ್ದು ಸೋಮವಾರ ಮಧ್ಯಾಹ್ನದಿಂದಲೇ ಶಿವಮೊಗ್ಗದಿಂದ ಹೊರ ಜಿಲ್ಲೆಗಳಿಗೂ ಕೆಎಸ್​ಆರ್​ಟಿಸಿ ಬಸ್ ಸಂಚಾರ ಪುನರಾಂಭಗೊಂಡಿತು. ಕೊನೆಗೂ ಪ್ರಯಾಣಿಕರು ನಿಟ್ಟುಸಿರು ಬಿಟ್ಟರು.

ಕರ್ತವ್ಯಕ್ಕೆ ಮರಳುವಂತೆ ಎಲ್ಲ ಸಿಬ್ಬಂದಿಗೆ ಸಂದೇಶ ರವಾನಿಸಿದ್ದ ಅಧಿಕಾರಿಗಳು ಪ್ರಯಾಣಿಕರ ಸಂಖ್ಯೆಗೆ ಅನುಗಣವಾಗಿ ಬಸ್​ಗಳನ್ನು ಓಡಿಸಿದರು. ಬೆಳಗ್ಗೆಯಿಂದಲೇ ಪೊಲೀಸ್ ಭದ್ರತೆಯಲ್ಲಿ ಶಿವಮೊಗ್ಗ-ಭದ್ರಾವತಿ, ಶಿವಮೊಗ್ಗ-ಉಡುಪಿ, ಶಿವಮೊಗ್ಗ-ಹರಿಹರ ನಡುವೆ ಬಸ್​ಗಳು ಸಂಚರಿಸಿದವು. ಬೆಂಗಳೂರು, ಮೈಸೂರಿಗೆ ತಲಾ ಎರಡು ಬಸ್​ಗಳ ಪ್ರಯಾಣಿಸಿದ್ದವು. ಈ ವೇಳೆ ಮೈಸೂರಿಗೆ ತೆರಳುತ್ತಿದ್ದ ಎರಡು ಬಸ್​ಗಳು ಮುಷ್ಕರದ ಹಿನ್ನೆಲೆಯಲ್ಲಿ ಕಡೂರಿನಲ್ಲಿ ಪ್ರಯಾಣಿಕರನ್ನು ಇಳಿಸಿ ವಾಪಸ್ ಡಿಪೋಗೆ ಮರಳಿದ್ದವು.

ಮಧ್ಯಾಹ್ನದವರೆಗೆ 30 ಬಸ್ ಸಂಚಾರ: ಸರ್ಕಾರದ ಸಂಧಾನ ಯತ್ನದ ನಡುವೆಯೂ ಶಿವಮೊಗ್ಗ ವಿಭಾಗದ 4 ಡಿಪೋದಿಂದ 320ರಲ್ಲಿ ಕೇವಲ 30 ಬಸ್​ಗಳು ಮಾತ್ರ ಆಪರೇಟ್ ಆಗಿದ್ದವು. ಮಧ್ಯಾಹ್ನದ ಬಳಿಕ ಎಂದಿನಂತೆ ಬಸ್ ರೂಟ್​ಗಳು ಆಪರೇಟ್ ಆದವು. ಪೊಲೀಸ್ ಬೆಂಗಾವಲು ಮತ್ತು ಭದ್ರತೆಯಲ್ಲಿ ಬಸ್​ಗಳನ್ನು ನಿಲ್ದಾಣದಿಂದ ಹೊರಗೆ ಕಳುಹಿಸಲಾಯಿತು. ಬಸ್ ನಿಲ್ದಾಣದಲ್ಲೂ ಪೊಲೀಸರು ಮೊಕ್ಕಂ ಹೂಡಿ ಅಹಿತಕರ ಘಟನೆಗಳು ನಡೆಯದಂತೆ ನೋಡಿಕೊಂಡರು.