ಕೈದಿಗಳ ಗಿಡಗಳಿಗಿಲ್ಲ ಮಾರ್ಕೇಟ್ .... !

• ಪ್ರಕಾಶ್ ಮಂಜೇಶ್ವರ ಮಂಗಳೂರು
  ಜೈಲು ಹಕ್ಕಿಗಳಿಗೆ ರಚನಾತ್ಮಕ ಕೆಲಸ ಒದಗಿಸುವ ನಿಟ್ಟಿನಲ್ಲಿ ಅಲಂಕಾರಿಕ ಗಿಡಗಳನ್ನು ನೆಟ್ಟು ಬೆಳೆಸುವ ಕಾರ್ಯ ಕಾರಾಗೃಹದಲ್ಲಿ ನಡೆದಿದೆ. ಗಿಡಗಳೂ ಬೆಳೆದು ನಿಂತಿವೆ. ಈ ಸಸಿಗಳನ್ನು ಮಾರಾಟ ಮಾಡಲು ಮಂಗಳೂರು ಜಿಲ್ಲಾ ಕಾರಾಗೃಹದ ಮುಂಭಾಗ ಅಲಂಕಾರಿಕ ಗಿಡಗಳ ಮಾರಾಟ ಕೇಂದ್ರವನ್ನೂ ತೆರೆಯಲಾಗಿದೆ. ಆದರೆ ಈ ಮಾರಾಟ ಕೇಂದ್ರ ಇನ್ನೂ ಪೂರ್ಣ ಪ್ರಮಾಣದಲ್ಲಿ ಕಾರ್ಯಾರಂಭಿಸಿಲ್ಲ !
  ಕಾರಾಗೃಹದ ಹೊರಗೆ ಬೀಗ ಜಡಿದ ಸಸಿ ಮಾರಾಟ ಕೇಂದ್ರದ ಒಳಗೆ ಗಿಡಗಳು ಹಾಗೆಯೇ ಇವೆ. ಆಸುಪಾಸಿನಲ್ಲಿ ಗಿಡಗಳ ಕುರಿತು ಸಾರ್ವಜನಿಕರ ಗಮನ ಸೆಳೆಯಲು, ಮಾಹಿತಿ ನೀಡಲು ಸಿಬ್ಬಂದಿ ಇಲ್ಲ. ಸುತ್ತ ಶಿಕ್ಷಣ ಸಂಸ್ಥೆಯ ವಿಶಾಲ ಕ್ಯಾಂಪಸ್, 200 ಮೀಟರ್ ದೂರದಲ್ಲೇ ಬಹುಮಹಡಿ ಐಷಾರಾಮಿ ಹೊಟೇಲ್, ಜನದಟ್ಟಣೆಯ ರಸ್ತೆಗಳ ನಡುವೆ ಇರುವ ಮಂಗಳೂರು ಕಾರಾಗೃಹದಲ್ಲಿ ಭದ್ರತಾ ವ್ಯವಸ್ಥೆಯೇ ದೊಡ್ಡ ಸವಾಲು. ಆದ್ದರಿಂದ ಇಲ್ಲಿ ಜೈಲುವಾಸಿಗಳಿಗಾಗಿ ಹೆಚ್ಚಿನ ರಚನಾತ್ಮಕ ಕೆಲಸಗಳಿಗೆ ಅವಕಾಶ ಕಡಿಮೆ.
  ಈ ಹಿನ್ನೆಲೆಯಲ್ಲಿ ಆಯ್ದ ಕೈದಿಗಳಿಗೆ ಇಲ್ಲಿ ರಾಯಲ್ ಫಾರ್ಮಿಂಗ್, ಸಿಂಪಲ್ ಫಾರ್ಮಿಂಗ್, ಕ್ರೋಟನ್ ಸಹಿತ ವಿವಿಧ ಅಲಂಕಾರಿಕ ಗಿಡಗಳನ್ನು ಪೋಷಿಸುವ ಕೆಲಸ ನೀಡಲಾಗುತ್ತದೆ. ಇದಕ್ಕಾಗಿ ಅಲೋಶಿಯಸ್ ಶಿಕ್ಷಣ ಸಂಸ್ಥೆಯ ಪ್ರೊ.ಎಡ್ಮಂಡ್ ಫ್ರಾಂಕ್ ನೇತೃತ್ವದ ಸಂಪನ್ಮೂಲ ವ್ಯಕ್ತಿಗಳ ತಂಡ ಔಷಧೀಯ, ಆಯುರ್ವೇದಿಕ್, ಅಲಂಕಾರಿಕ ಗಿಡಗಳ ಪೋಷಣೆ ಕುರಿತು ಕೈದಿಗಳಿಗೆ ತರಬೇತಿ ನೀಡಿದೆ. ಜತೆಗೆ, ಕಾನೂನು ಅರಿವು ಕಾರ್ಯಕ್ರಮ, ಮಾದಕ ವ್ಯಸನ, ತಂಬಾಕು ದುಷ್ಪರಿಣಾಮ ಮುಂತಾದ ವಿಷಯಗಳ ಕುರಿತು ಸಂಬಂಧಪಟ್ಟ ಕ್ಷೇತ್ರಗಳ ಸಂಪನ್ಮೂಲ ವ್ಯಕ್ತಿಗಳ ನೆರವಿನೊಂದಿಗೆ ಜಾಗೃತಿ ಕಾರ್ಯಕ್ರಮಗಳನ್ನು ಕೂಡ ಆಯೋಜಿಸಲಾಗಿದೆ.
  ಮಂಗಳೂರು ಜಿಲ್ಲಾ ಕಾರಾಗೃಹದಲ್ಲಿ ಅಲಂಕಾರಿಕ ಗಿಡಗಳನ್ನು ಬೆಳೆಸುವ ಕುರಿತು ಎರಡು ವರ್ಷಗಳ ಹಿಂದೆಯೇ ತರಬೇತಿ ಆರಂಭ ಗೊಂಡಿತ್ತು. ಕೈದಿಗಳು ಉತ್ಸಾಹದಿಂದಲೇ ಈ ಕೆಲಸದಲ್ಲಿ ತೊಡಗಿಕೊಂಡರು. ಸಂಪನ್ಮೂಲ ವ್ಯಕ್ತಿಗಳ ಮಾರ್ಗದರ್ಶನ ಪ್ರಕಾರ ಸಿದ್ಧಪಡಿಸಿದ ಗಿಡಗಳು ಎತ್ತರಕ್ಕೆ ಬೆಳೆದಾಗ ಏನು ಮಾಡುವುದು? ಎನ್ನುವ ಪ್ರಶ್ನೆ ಹುಟ್ಟಿಕೊಳ್ಳುತ್ತದೆ. ಇದನ್ನು ಮಾರಾಟ ಮಾಡುವುದು ಸೂಕ್ತ ಎನ್ನುವ ಉದ್ದೇಶದಿಂದ ಜೈಲು ಮುಂಭಾಗದಲ್ಲಿಯೇ ಕೊಠಡಿ ಸಿದ್ಧಪಡಿಸಲಾಯಿತು. ಆದರೆ ಈ ಗಿಡಗಳಿಗೆ ಮಾರುಕಟ್ಟೆ ಸೃಷ್ಟಿ ಹೇಗೆ ಎನ್ನುವುದು ಸದ್ಯ ಜೈಲು ಅಧಿಕಾರಿಗಳ ಮುಂದಿರುವ ಪ್ರಶ್ನೆ.
• ................

ಜೈಲುವಾಸಿಗಳಿಗೆ ರಚನಾತ್ಮಕ ಕೆಲಸಗಳನ್ನು ಒದಗಿಸುವ ಕಾರ್ಯಕ್ರಮದ ಭಾಗವಾಗಿ ಅಲಂಕಾರಿಕ ಗಿಡಗಳ ಪೋಷಣೆ ಹಾಗೂ ಮಾರಾಟ ವ್ಯವಸ್ಥೆ ಆರಂಭಿಸಲಾಗಿದೆ. ಗಿಡಗಳೇನೋ ಸಿದ್ಧವಾಗಿದೆ. ಮಾರುಕಟ್ಟೆ ಒದಗಿಸುವ ಪ್ರಯತ್ನ ನಡೆಯುತ್ತವೆ. ಗಿಡಗಳನ್ನು ಪ್ಲಾಸ್ಟಿಕ್ ತೊಟ್ಟೆಗಳ ಬದಲು ಮಣ್ಣಿನ ಕುಂಡಗಳಲ್ಲಿ ಒದಗಿಸಿದರೆ ಗ್ರಾಹಕರಿಗೆ ಕೊಂಡೊಯ್ಯಲು ಮತ್ತು ಮನೆಗಳಲ್ಲಿ ಬೆಳೆಸಲು ಅನುಕೂಲ ಎಂಬ ಅಭಿಪ್ರಾಯವಿದೆ. ಪ್ರಯತ್ನ ನಡೆಯುತ್ತಿದೆ. ಗಿಡ ಮಾರಾಟಕ್ಕೆ ಪ್ರತ್ಯೇಕ ಸಿಬ್ಬಂದಿ ಇಲ್ಲ. ಅಗತ್ಯ ಇರುವವರು ಮಂಗಳೂರು ಜೈಲ್ ರೋಡ್ ನಲ್ಲಿರುವ ಜೈಲಿನ ಮುಂಭಾಗದಲ್ಲಿರುವ ಸಿಬ್ಬಂದಿಯನ್ನು ಸಂಪರ್ಕಿಸಬಹುದು.

• ಓಬಳೇಶಪ್ಪ
  ಜೈಲು ಅಧೀಕ್ಷಕರು, ಮಂಗಳೂರು ಜಿಲ್ಲಾ ಕಾರಾಗೃಹ