ಸಾವಯವ ಗೊಬ್ಬರ, ಜೀವಾಮೃತದ ಭಂಡಾರ: ಹನಿ ನೀರಾವರಿ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿರುವ ಇವರು ಸಂಪೂರ್ಣ ಕೃಷಿ ಕಾಯಕದಲ್ಲಿ ತೊಡಗಿದ್ದಾರೆ. ಒಣಮೇವಿನ ಕಸದಿಂದ ಹೊದಿಕೆ ಗೊಬ್ಬರವನ್ನು ಜಮೀನಿನಲ್ಲಿ ತಯಾರಿಸಿಕೊಳ್ಳುತ್ತಿದ್ದಾರೆ. ಕೊಟ್ಟಿಗೆ ಗೊಬ್ಬರವನ್ನು ಬಳಕೆ ಮಾಡುತ್ತಿದ್ದಾರೆ. ಬೆಳೆಗಳಿಗೆ ರೋಗಬಾಧೆ ತಗುಲದಂತೆ ಇನ್ನಿಲ್ಲದ ಕಾಳಜಿಯನ್ನು ವಹಿಸಿರುವ ಇವರು ಬೆಲ್ಲ, ಕಡ್ಲೆಹಿಟ್ಟು, ಗಂಜಲ ಹಾಗೂ ಸಗಣಿಯಿಂದ ತಯಾರಿಸಿದ ಜೀವಾಮೃತ ಹಾಗೂ ಗೋ ಕೃಪಾಮೃತವನ್ನು ಬೆಳೆಗಳಿಗೆ ಸಿಂಪಡಿಸುತ್ತಿದ್ದಾರೆ. ಅಲ್ಲದೇ ಬೇವು, ಹರಳೆಲೆ, ಸೀತಾಫಲ, ಹೊಂಗೆ, ಬೆಪ್ಪಲೆಲೆ, ಲಕ್ಕಿ ಇತರ ಮೇಕೆ, ಕುರಿ ಮೇಯದ 10 ಎಲೆಗಳಿಂದ ತಯಾರಿಸಿದ ದಶಪರಣಿ ಜೀವಾಮೃತವನ್ನು ಬೆಳೆಗಳಿಗೆ ಬಳಸುತ್ತಿರುವುದು ವಿಶೇಷವಾಗಿದೆ. ಗೊಬ್ಬರ ಹಾಗೂ ಜೀವಾಮೃತವನ್ನು ಇವರೇ ಸ್ವತಃ ತಯಾರಿಕೆಯ ಅನುಭವವನ್ನು ಹೊಂದಿದ್ದು, ಕೃಷಿ ಇಲಾಖೆಯ ಅಧಿಕಾರಿಗಳಿಂದ ಮೆಚ್ಚುಗೆ ಗಳಿಸಿದ್ದಾರೆ. ಹಾಗಾಗಿ, ಕೃಷಿ ಇಲಾಖೆಯ ಕಾರ್ಯಕ್ರಮದಲ್ಲಿ ಇವರು ಭಾಗವಹಿಸಿ ತಯಾರಿಕೆಯ ವಿಧಾನವನ್ನು ರೈತರಿಗೆ ತಿಳಿಸಿ ಕೊಡುವ ಕೆಲಸ ಮಾಡುತ್ತಿದ್ದಾರೆ.
