ಜೆಜೆಎಂ ಕಾಮಗಾರಿ ಅಪೂರ್ಣಕ್ಕೆ ಆಕ್ಷೇಪ

ನರಸಾಪುರ: ಕೋಲಾರ ತಾಲೂಕು ನರಸಾಪುರ ಗ್ರಾಮದಲ್ಲಿ ಸುಮಾರು 3.22 ಕೋಟಿ ರೂ.ಗಳ ವೆಚ್ಚದಲ್ಲಿ 2023ರ ಡಿಸೆಂಬರ್​ನಲ್ಲಿ ಆರಂಭಗೊಂಡ ಜಲ ಜೀವನ್​ ಮಿಷನ್​ ಯೋಜನೆಯ ಕಾಮಗಾರಿ ನಡೆಸಿದ ಗುತ್ತಿಗೆದಾರ ರಸ್ತೆಗಳನ್ನು ಅಗೆದು ಸರಿಯಾಗಿ ಮುಚ್ಚದೆ ಹಾಗೆಯೇ ಬಿಟ್ಟಿದ್ದರಿಂದ ಯೋಜನೆಯಿಂದ ಅನುಕೂಲಕ್ಕಿಂತ ಅನಾನುಕೂಲವೇ ಹೆಚ್ಚಾಗಿ ಜನರನ್ನು ಕಾಡುತ್ತಿದೆ.

ಕಾಮಗಾರಿ ಪ್ರಾರಂಭದಿಂದ ಈವರೆಗೂ ಈ ಯೋಜನೆಯ ಅನುಕೂಲಕ್ಕೆ ಬದಲಾಗಿ ಸಾರ್ವಜನಿಕರು ಬಿದ್ದು ಕೈಕಾಲು ಮುರಿದುಕೊಂಡು ಮೂಲೆ ಸೇರುವಂತಾಗಿದೆ. ಇದರಿಂದ ಜನರು ಆಕ್ರೋಶ ಭರಿತರಾಗಿದ್ದು, ತಕ್ಷಣವೇ ಗುತ್ತಿಗೆದಾರನ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಗ್ರಾಪಂ ಸದಸ್ಯ ಕೆಇಬಿ ಚಂದ್ರು ಒತ್ತಾಯಿಸಿದ್ದಾರೆ.

ಜೆಜೆಎಂ ಕಾಮಗಾಗಿ ಮಾಡುವ ವೇಳೆ ಡಾಂಬರ್​ ರಸ್ತೆ, ಸಿಮೆಂಟ್​ ರಸ್ತೆಗಳನ್ನು ಅಗೆದು ಪೈಪ್​ಗಳ ಹಾಕಿದ ಬಳಿಕ ಸರಿಯಾಗಿ ಮಣ್ಣು ತುಂಬದೆ ಹಳ್ಳ, ಗುಂಡಿಗಳು ನಿರ್ಮಾಣವಾಗುವಂತೆ ಮಾಡಲಾಗಿದೆ. ಇದರಿಂದ ಬೈಕ್​ ಸವಾರರು ಹಾಗೂ ವೃದ್ಧರು ಬಿದ್ದು ಗಾಯಗೊಂಡಿದ್ದಾರೆ. ಸಂಬಂಧಪಟ್ಟ ಅಧಿಕಾರಿಗಳೊಂದಿಗೆ ಹಲವು ಬಾರಿ ಗುತ್ತಿಗೆದಾರನ ಕಾರ್ಯ ವೈಖರಿ ಕುರಿತು ಮೌಖಿಕವಾಗಿ ದೂರು ನೀಡಿದ್ದರೂ ಪ್ರಯೋಜನವಾಗಿಲ್ಲ ಎಂದು ವರದಿಗಾರರಿಗೆ ತಿಳಿಸಿದರು. ಕಾಮಗಾರಿ ಕೈಗೊಂಡ ಗುತ್ತಿಗೆದಾರ ಹಂತ ಹಂತವಾಗಿ ಮಾಡದೆ ಎಲ್ಲ ಬ್ಲಾಕ್​ಗಳಲ್ಲಿ ಏಕಾಏಕಿ ಕೈಗೊಂಡಿದ್ದರಿಂದ ರಸ್ತೆಗಳ ಮಧ್ಯೆ ಹಳ್ಳ ಮಾಡಿದ್ದಾರೆ. ಸಂಬಂಧಪಟ್ಟ ಅಧಿಕಾರಿಗಳು ಕೂಡಲೇ ಗುತ್ತಿಗೆದಾರನ ವಿರುದ್ಧ ಕಾನೂನು ರೀತ್ಯಾ ಕ್ರಮ ವಹಿಸಿ ಕಾಮಗಾರಿಯನ್ನು ಸಮರ್ಪಕವಾಗಿ ಪೂರ್ಣಗೊಳಿಸಬೇಕು. ಇಲ್ಲದಿದ್ದರೆ ಮುಂದಿನ ದಿನಗಳಲ್ಲಿ ಹೋರಾಟ ಮಾಡಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದರು.