ಎರಡು ವರ್ಷವಾದ್ರೂ ಬಸ್ ಕಾಣದ ಬಸಾಪೂರ

ಅಣ್ಣಿಗೇರಿ: ಅಣ್ಣಿಗೇರಿ ಮತ್ತು ನವಲಗುಂದ ಎರಡು ತಾಲೂಕು ಕೇಂದ್ರಗಳಿಂದ ಬರೋಬ್ಬರಿ ತಲಾ 9 ಕಿಮೀ ಅಂತರದಲ್ಲಿದೆ ಬಸಾಪೂರ ಗ್ರಾಮ. ಎರಡೂ ಬದಿಯಿಂದ ಸಂಚರಿಸುವ ಬಸ್​ಗಳು ಬಸಾಪೂರ ಕ್ರಾಸ್​ನಲ್ಲಿ ಮಾತ್ರ ನಿಲುಗಡೆಯಾಗುತ್ತವೆ. ಮುಖ್ಯ ರಸ್ತೆಯಲ್ಲಿರುವ ಕ್ರಾಸ್​ನಿಂದ 1.5 ಕಿಮೀ ದೂರದಲ್ಲಿ ಬಸಾಪೂರ ಗ್ರಾಮವಿದೆ. ಆದರೆ, ಗ್ರಾಮಕ್ಕೆ ಬಸ್ ಪ್ರವೇಶಿಸಿದೆ ಎರಡು ವರ್ಷಗಳು ಕಳೆದಿವೆ.

ಮುಖ್ಯ ರಸ್ತೆ ಕ್ರಾಸ್​ನಿಂದ ಬಸ್ ಆಗಮಿಸಿದೇ ಇರುವುದರಿಂದ ಗ್ರಾಮಸ್ಥರಿಗೆ ತೀವ್ರ ತೊಂದರೆಯಾಗುತ್ತಿದೆ. ಮಳೆಗಾಲದಲ್ಲಂತೂ ಗ್ರಾಮದಿಂದ ಮುಖ್ಯ ರಸ್ತೆಯಲ್ಲಿರುವ ಬಸ್ ನಿಲ್ದಾಣ ತಲುಪಲು ವೃದ್ಧರು, ಅಂಗವಿಕಲರು, ವಿದ್ಯಾರ್ಥಿಗಳು, ಗರ್ಭಿಣಿಯರು, ರೋಗಿಗಳು ಹಾಗೂ ಪ್ರಯಾಣಿಕರು ತೀವ್ರ ತೊಂದರೆ ಅನುಭವಿಸುವಂತಾಗಿದೆ.

ಕಿರಿದಾದ, ಇಕ್ಕಟ್ಟಾದ ಹದಗೆಟ್ಟ ರಸ್ತೆ. ಪ್ರಸ್ತುತ ರಸ್ತೆಯ ಇಕ್ಕೆಲಗಳಲ್ಲಿ ನಿಲ್ಲಿಸಲಾಗುತ್ತಿದ್ದ ಟ್ರ್ಯಾಕ್ಟರ್, ಚಕ್ಕಡಿ ಹಾಗೂ ಇನ್ನಿತರ ಕೃಷಿ ಸಾಮಗ್ರಿಗಳು ಸುಗಮ ಸಂಚಾರಕ್ಕೆ ಅಡೆತಡೆ ಉಂಟು ಮಾಡುತ್ತಿದ್ದವು. ಇದನ್ನೇ ಮುಂದಿಟ್ಟುಕೊಂಡು ಸಾರಿಗೆ ಅಧಿಕಾರಿಗಳು ಬಸ್ ಸಂಚಾರ ಸ್ಥಗಿತಗೊಳಿಸಿದ್ದರು. ಆದರೆ, ಇದೀಗ ಪರಿಸ್ಥಿತಿ ಬದಲಾಗಿದೆ. ಪಿಎಂ ಗ್ರಾಮ ಸಡಕ್ ಯೋಜನೆಯಡಿ ಉತ್ತಮ ರಸ್ತೆ ನಿರ್ವಿುಸಲಾಗಿದೆ. ಪ್ರಸ್ತುತ ವಿಶಾಲವಾಗಿರುವ ರಸ್ತೆಯಲ್ಲಿ ಭಾರಿ ಗಾತ್ರದ ವಾಹನಗಳು ಎರಡೂ ಬದಿಯಿಂದ ಯಾವುದೇ ಅಡೆತಡೆ ಇಲ್ಲದೆ ಸುರಕ್ಷಿತವಾಗಿ ಸಂಚರಿಸಬಹುದು. ಬದಲಾದ ಸನ್ನಿವೇಶ ಹಾಗೂ ವಸ್ತು ಸ್ಥಿತಿಗೆ ಅನುಗುಣವಾಗಿ ಸಾರಿಗೆ ಸಂಸ್ಥೆಯ ಬಸ್​ಗಳನ್ನು ಬಸಾಪೂರಕ್ಕೆ ಸರಾಗವಾಗಿ ಓಡಿಸಬಹುದಾಗಿದೆ. ಆದ್ದರಿಂದ ಸಾರಿಗೆ ಸಂಸ್ಥೆಯ ಅಧಿಕಾರಿಗಳು ವಾಸ್ತವ ಅರಿತು ಗ್ರಾಮಕ್ಕೆ ಬಸ್​ಗಳನ್ನು ಓಡಿಸಿ ಪ್ರಯಾಣಿಕರಿಗೆ ಅನುಕೂಲ ಮಾಡಿಕೊಡಬೇಕು ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.

ಶಾಸಕ ಶಂಕರಪಾಟೀಲ ಮುನೇನಕೊಪ್ಪ ಅವರು ರಸ್ತೆಯ ಸುಸ್ಥಿತಿಯ ಬಗೆಗೆ ಸಾರಿಗೆ ಸಂಸ್ಥೆಯ ಅಧಿಕಾರಿಗಳಿಗೆ ಮನವರಿಕೆ ಮಾಡಿಕೊಟ್ಟು ಬಸಾಪೂರ ಗ್ರಾಮಕ್ಕೆ ಬಸ್​ಗಳನ್ನು ಓಡಿಸಲು ಕ್ರಮ ಜರುಗಿಸಬೇಕಿದೆ.