ಆದಾಯಕ್ಕೆ ಹೊಡೆತ: ಗ್ರಾಪಂಗಳು ಸ್ಥಳೀಯವಾಗಿ ನೇಮಿಸಿಕೊಳ್ಳುವ ಸಿಬ್ಬಂದಿಯ ಸಂಬಳ, ಕಚೇರಿ ನಿರ್ವಹಣೆಯ ವೆಚ್ಚವನ್ನು ಆಸ್ತಿಕರದಿಂದ ಬರುವ ಸಂಪನ್ಮೂಲದಿಂದಲೇ ನಿಭಾಯಿಸಬೇಕು. ಆದರೆ, ಮುಮ್ಮಿಗಟ್ಟಿ ಮತ್ತು ಬೇಲೂರು ಗ್ರಾಪಂನಲ್ಲಿ ಬಹುತೇಕ ಎಲ್ಲ ಜಮೀನುಗಳು ಕೈಗಾರಿಕೆಗಳ ಪಾಲಾಗಿರುವುದರಿಂದ ಆದಾಯಕ್ಕೆ ಹೊಡೆತ ಬಿದ್ದಿದೆ. ಇಲ್ಲಿ ಕೈಗಾರಿಕೆಗಳಿಗೆ ಜಮೀನು ನೀಡಿರುವುದು ಕೆಐಎಡಿಬಿ. ಕೈಗಾರಿಕೋದ್ಯಮಿಗಳ ವ್ಯವಹಾರ ಏನಿದ್ದರೂ ಅದು ಕೆಐಎಡಿಬಿ ಜತೆಗೆ ಇದೆ. ಕೆಲ ದೊಡ್ಡ ಕೈಗಾರಿಕೆಗಳು ಸರ್ಕಾರದ ಮಟ್ಟದಲ್ಲಿ ಒಡಂಬಡಿಕೆ ಮಾಡಿಕೊಂಡು ಬಂದಿವೆ. ಅವರು, ಗ್ರಾಪಂನವರು ಕೊಡುತ್ತಿರುವ ನೋಟಿಸ್ಗಳು ಸಂಬಂಧ ಇಲ್ಲ, ನಾವು ನೇರವಾಗಿ ಸರ್ಕಾರದ ಜತೆ ವ್ಯವಹರಿಸುತ್ತೇವೆ ಎಂದು ಹೇಳುತ್ತಿದ್ದಾರಂತೆ. ಇನ್ನು ಕೈಗಾರಿಕೋದ್ಯಮಿಗಳ ಕಡೆಯಿಂದಲೂ ಅನೇಕ ಬೇಡಿಕೆಗಳಿವೆ. ನಾವು ಗ್ರಾಪಂಗೆ ತೆರಿಗೆ ಕೊಟ್ಟರೂ ಮೂಲಸೌಕರ್ಯಗಳು ಸಿಗುತ್ತಿಲ್ಲ. ತೆರಿಗೆ ಗ್ರಾಪಂಗೆ ಕಟ್ಟಿ, ಬೇಡಿಕೆಗಳಿಗಾಗಿ ಸರ್ಕಾರವನ್ನೇ ಕೇಳಬೇಕಾಗಿದೆ. ಹೀಗಾಗಿ ನಾವು ಸ್ಥಳೀಯವಾಗಿ ತೆರಿಗೆ ಕಟ್ಟುವುದರಿಂದ ಪ್ರಯೋಜನವೇನು? ಎಂಬುದು ಕೈಗಾರಿಕೋದ್ಯಮಿಗಳ ವಾದ. ಈ ಬೇಡಿಕೆಗಳ ಬಗ್ಗೆ ಈಗಾಗಲೇ ಕೈಗಾರಿಕೋದ್ಯಮಿಗಳು ಕೈಗಾರಿಕಾ ಸಚಿವ ಎಂ.ಬಿ. ಪಾಟೀಲ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಸಂತೋಷ ಲಾಡ್ ಗಮನಕ್ಕೂ ತಂದಿದ್ದಾರೆ.
