ಕಿರು ಸೇತುವೆಗಳಿಗಿಲ್ಲ ದುರಸ್ತಿ ಭಾಗ್ಯ

ಕಡಬ: ರಾಜ್ಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರದ ಯೋಜನೆಯಡಿ ಆಲಂಕಾರು- ಸುರುಳಿ- ಮಾಪಲ ರಸ್ತೆ ಅಭಿವೃದ್ಧಿಯಲ್ಲಿ ಈ ಭಾಗದ ಸೇತುವೆಗಳಿಗೆ ದುರಸ್ತಿ ಭಾಗ್ಯ ಕೂಡಿಬಂದಿಲ್ಲ. ರಸ್ತೆ ವಿಸ್ತರಣೆ ಹಾಗೂ ಮರು ಡಾಂಬರು ಕಾಮಗಾರಿ ಸಾಗುತ್ತಿದ್ದು, ಕುಸಿದು ಬೀಳುವ ಹಂತದಲ್ಲಿರುವ ಸೇತುವೆಗಳಿಗೆ ಅನುದಾನ ಕೊರತೆ ಕಾಡುತ್ತಿದೆ.

5 ಕೋಟಿ ರೂ. ಅನುದಾನದಲ್ಲಿ 2020ರಿಂದ ಈ ಕಾಮಗಾರಿ ಆರಂಭವಾಗಿದ್ದು, ಕಾಮಗಾರಿ ನಿಧಾನಗತಿಯಲ್ಲೇ ಸಾಗುತ್ತಿದೆ. ಆಲಂಕಾರಿನಿಂದ ಮಾಪಲದವರಿಗಿನ 3.5 ಕಿ.ಮೀ. ರಸ್ತೆಯನ್ನು 5.5 ಅಡಿ ವಿಸ್ತರಣೆ ಮತ್ತು ಡಾಂಬರು ಕಾಮಗಾರಿ ನಡೆಯುತ್ತಿದೆ. ಈ ವ್ಯಾಪ್ತಿಯಲ್ಲಿ ಬರುವ ಎರಡು ಕಿರು ಸೇತುವೆಗಳಿಗೆ ಅನುದಾನ ಕೊರತೆಯಿಂದಾಗಿ ದುರಸ್ತಿ ಹಾಗೂ ವಿಸ್ತರಣೆ ಕೈಬಿಟ್ಟು ಕಾಮಗಾರಿ ನಡೆಸಲಾಗುತ್ತಿದೆ.

ತೀರಾ ನಾದುರಸ್ತಿಯಲ್ಲಿರುವ ಸುರುಳಿ ಸೇತುವೆಗಳು ಮುಂದಿನ ದಿನಗಳಲ್ಲಿ ಕುಸಿಯುವ ಮೊದಲು ಕಾಯಕಲ್ಪವಾಗಬೇಕಾಗಿದೆ. ಈ ರಸ್ತೆಯು ಮೈಸೂರು- ಮಡಿಕೇರಿ- ಧರ್ಮಸ್ಥಳ ರಾಜ್ಯ ಹೆದ್ದಾರಿಗೆ ಸಂಪರ್ಕ ರಸ್ತೆಯಾಗಿದೆ. ಈಗಾಗಲೇ ಕುಮಾರಧಾರಾ ನದಿಯ ಶಾಂತಿಮುಗೇರು ಎಂಬಲ್ಲಿ ಸೇತುವೆ ನಿರ್ಮಾಣವಾಗಿದ್ದು, ಸಂಚಾರಕ್ಕೆ ಮುಕ್ತವಾದ ಬಳಿಕ ಈಗ ಮೈಸೂರಿನಿಂದ ಸುಳ್ಯ- ಬೆಳ್ಳಾರೆ- ಸವಣೂರು- ಶಾಂತಿಮೊಗೇರು- ಆಲಂಕಾರು- ನೆಲ್ಯಾಡಿ- ಧರ್ಮಸ್ಥಳಕ್ಕೆ ಸುಲಭ ಸಂಪರ್ಕ ಕಲ್ಪಿಸುತ್ತಿದೆ. ಮಂಗಳೂರು ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿ, ಮಡಿಕೇರಿ- ಸಂಪಾಜೆ- ಮೈಸೂರು ರಾಜ್ಯ ಹೆದ್ದಾರಿಗೆ, ಜಾಲ್ಸೂರು- ಸುಬ್ರಹ್ಮಣ್ಯ- ಬೆಂಗಳೂರು ಹೆದ್ದಾರಿಗೆ, ಸುಬ್ರಹ್ಮಣ್ಯ- ಮಂಜೇಶ್ವರ- ಕಾಸರಗೋಡು ಹೆದ್ದಾರಿಗಳಿಗೆ ಈ ರಸ್ತೆ ಸಂಪರ್ಕ ಕೊಂಡಿಯಾಗಿದ್ದು, ಮುಂದಿನ ದಿನಗಳಲ್ಲಿ ಅತೀ ಹೆಚ್ಚು ವಾಹನ ಸಂಚಾರಕ್ಕೆ ಪೂರಕ ರಸ್ತೆಯಾಗಲಿದೆ. ರಸ್ತೆ ಅಭಿವೃದ್ಧಿ ಪೂರ್ಣಗೊಂಡ ಬಳಿಕ ಈ ರಸ್ತೆಯಲ್ಲಿ ವಾಹನಗಳ ಸಂಚಾರ ಹೆಚ್ಚಾಗಲಿದ್ದು, ಕಿರಿದಾದ ಸೇತುವೆಗಳಿಂದಾಗಿ ಅಪಾಯಗಳು ಎದುರಾಗಲಿವೆ.