ಹೊಸ ಮುಖ... ಹಳೇ ಸಮಸ್ಯೆ...

ನೂತನ ಸರ್ಕಾರ ರಚನೆ ಆಗಿದ್ದೇ ತಡ ಆಯಕಟ್ಟಿನ ಹುದ್ದೆಗಳಿಗೆ ಹೊಸ ಅಧಿಕಾರಿಗಳ ಆಗಮನವಾಗಿದೆ. ಹುಬ್ಬಳ್ಳಿ-ಧಾರವಾಡ ಮಹಾನಗರ ಪೊಲೀಸ್ ಆಯುಕ್ತೆಯಾಗಿ ರೇಣುಕಾ ಸುಕುಮಾರ ಗುರುವಾರ ಅಧಿಕಾರ ವಹಿಸಿಕೊಂಡಿದ್ದಾರೆ. ಇದಕ್ಕೂ ಮುನ್ನ ಹು-ಧಾ ಮಹಾನಗರ ಪಾಲಿಕೆಗೆ ಆಯುಕ್ತರಾಗಿ ಡಾ. ಈಶ್ವರ ಉಳ್ಳಾಗಡ್ಡಿ, ಅವಳಿ ನಗರದ ಅಭಿವೃದ್ಧಿಗೆ ಹೈಟೆಕ್ ಟಚ್ ನೀಡುತ್ತಿರುವ ಸ್ಮಾರ್ಟ್ ಸಿಟಿ ಲಿಮಿಟೆಡ್​ನ ವ್ಯವಸ್ಥಾಪಕ ನಿರ್ದೇಶಕರಾಗಿ ಡಾ. ರುದ್ರೇಶ ಘಾಳಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಇವರು ಹೊಸಬರಾಗಿದ್ದರೂ ಅವಳಿ ನಗರದ ಸಮಸ್ಯೆಗಳು ಹಳೆಯದ್ದಾಗಿವೆ. ಈ ಸಮಸ್ಯೆಗಳಿಗೆ ಪರಿಹಾರ ಕಲ್ಪಿಸಲಿ ಎನ್ನುವ ಉದ್ದೇಶದಿಂದ ‘ವಿಜಯವಾಣಿ’ ಇಲ್ಲಿ ಪ್ರಮುಖ ಸಂಗತಿಗಳ ಬಗ್ಗೆ ಗಮನ ಸೆಳೆದಿದೆ.

ಪೊಲೀಸ್ ಆಯುಕ್ತೆ ರೇಣುಕಾ ಸುಕುಮಾರ

ಈಗ ಹು-ಧಾ ಪೊಲೀಸ್ ಆಯುಕ್ತೆ ರೇಣುಕಾ ಸುಕುಮಾರ. 2018ರಲ್ಲಿ ಅವರು ಹು-ಧಾ ಪೊಲೀಸ್ ಆಯುಕ್ತಾಲಯದಲ್ಲಿ ಡಿಸಿಪಿಯಾಗಿ (ಕಾನೂನು ಮತ್ತು ಸುವ್ಯವಸ್ಥೆ) ಕರ್ತವ್ಯ ನಿರ್ವಹಿಸಿದ್ದರು. ಇಲ್ಲಿನ ಕಾನೂನು ಮತ್ತು ಸುವ್ಯವಸ್ಥೆ ಬಗ್ಗೆ ಅವರಿಗೆ ಅರಿವಿದೆ. ಆಯುಕ್ತರಾಗಿರುವುದರಿಂದ ಹು-ಧಾ ಅವಳಿ ನಗರದ ಜನರು ಶಾಂತಿಯಿಂದಿರಬಹುದು ಎಂಬ ನಂಬಿಕೆ. ಇವರ ಮುಂದಿರುವ ಸವಾಲುಗಳು ಹೀಗಿವೆ.

• ಬಾಲಾಪರಾಧಿಗಳ ಸಂಖ್ಯೆಯಲ್ಲಿ ಏರುಮುಖವಾಗುತ್ತಿದೆ
• ಗಾಂಜಾ ಹಾವಳಿ ಮಿತಿ ಮೀರಿದ್ದು, ಯುವ ಜನಾಂಗ ದಾರಿ ತಪ್ಪುತ್ತಿದೆ. ಡ್ರಗ್ ಜಾಲ ಭೇದಿಸಬೇಕಿದೆ
• ಮನೆಗಳ್ಳತನ ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿವೆ
• ಲ್ಯಾಂಡ್ ಮಾಫಿಯಾ ತಲೆ ಎತ್ತಿದೆ. ಅಮಾಯಕರಿಗೆ ಕಿರುಕುಳ ನೀಡಿ ಜಾಗ ಕಬಳಿಸುವವರ ಸಂಖ್ಯೆ ಹೆಚ್ಚಾಗಿದೆ
• ಕೆಲ ಪ್ರದೇಶಗಳಲ್ಲಿ ಪುಡಿರೌಡಿಗಳ ಹಾವಳಿ ಮಿತಿ ಮೀರಿದೆ
• ಸೈಬರ್ ಕ್ರೖೆಂ ಪ್ರಕರಣ ಹೆಚ್ಚಾಗಿದ್ದು ಜಾಗೃತಿ ಮೂಡಿಸಬೇಕು
• ಸಂಚಾರ ದಟ್ಟಣೆಯಲ್ಲಿ ಜನರು ಬೆಂದು ಹೋಗಿದ್ದು, ಸುಗಮ ಸಂಚಾರದ ಕನಸು ನನಸಾಗಬೇಕು
• ಕೆಲ ಯುವಕರು ತಮ್ಮ ಜೇಬು, ಬೈಕ್​ಗಳಲ್ಲಿ ಚಾಕು ಇಟ್ಟುಕೊಂಡು ಓಡಾಡುತ್ತಿದ್ದು, ತಪಾಸಣೆ ನಡೆಯಬೇಕಿದೆ
• ಹುಬ್ಬಳ್ಳಿಗೆ ಅಂಟಿಕೊಂಡಿರುವ ಹವಾಲಾ ದಂಧೆ ಕುಖ್ಯಾತಿ ಅಳಿಸಬೇಕಿದೆ
• ಮಟಕಾ, ಕ್ರಿಕೆಟ್ ಬೆಟ್ಟಿಂಗ್ ದಂಧೆ ಇಂದಿಗೂ ಹುಬ್ಬಳ್ಳಿ-ಧಾರವಾಡದಲ್ಲಿ ಜೋರಾಗಿದೆ
• ಯುವತಿಯರ ಅಪಹರಣ, ಅತ್ಯಾಚಾರ, ನಾಪತ್ತೆ ಪ್ರಕರಣಕ್ಕೆ ಬೇಕಿದೆ ಕಡಿವಾಣ
• ಸದ್ದಿಲ್ಲದೇ ನಡೆಯುತ್ತಿರುವ ಬಾಲ್ಯ ವಿವಾಹ ಪ್ರಕರಣದಲ್ಲಿ ಹಣದ ಹರಿದಾಟವಿದೆ
• ದ್ವೇಷಾಸೂಯೆ ಕೆರಳಿಸುವ, ಮೂಡಿಸುವ ಜಾಲತಾಣಗಳ ಮೇಲೆ ಕಣ್ಗಾವಲು ಅಗತ್ಯ
• ಕೆಲಸ ಕೊಡಿಸುವುದಾಗಿ ನಂಬಿಸಿ ಹಣ ವರ್ಗಾಯಿಸಿಕೊಳ್ಳುವ ವಂಚಕರ ವಿರುದ್ಧ ಕ್ರಮವಾಗಲಿ
• ಅವಳಿ ನಗರದಲ್ಲಿ ಅತ್ಯುತ್ತಮ ಸಿಸಿ ಕ್ಯಾಮರಾ ಜಾಲ ಅಭಿವೃದ್ಧಿಪಡಿಸುವುದು

ಪಾಲಿಕೆ ಆಯುಕ್ತ ಡಾ. ಈಶ್ವರ ಉಳ್ಳಾಗಡ್ಡಿ

ಹಿರಿಯ ಶ್ರೇಣಿಯ ಕೆಎಎಸ್ ಅಧಿಕಾರಿ ಡಾ. ಈಶ್ವರ ಉಳ್ಳಾಗಡ್ಡಿ ಜುಲೈ 7ರಂದು ಹು-ಧಾ ಮಹಾನಗರ ಪಾಲಿಕೆಯ ಆಯುಕ್ತರಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಹುಬ್ಬಳ್ಳಿ-ಧಾರವಾಡವನ್ನು ಪ್ರಮುಖವಾಗಿ ಕಾಡುತ್ತಿರುವುದು ಸ್ವಚ್ಛತೆ ಸಮಸ್ಯೆ ಹಾಗೂ ಮೂಲಸೌಕರ್ಯದ್ದು. ಇನ್ನಿತರ ಏನೆಲ್ಲಾ ಸಮಸ್ಯೆಗಳಿಗೆ ಪರಿಹಾರ ಬೇಕು ಎನ್ನುವುದು ಇಲ್ಲಿದೆ.

• ಇ-ಆಸ್ತಿ ಸೃಜನೆಯು ವಿಳಂಬ ಮತ್ತು ಭ್ರಷ್ಟಾಚಾರದಿಂದ ಕೂಡಿದ್ದು, ತ್ವರಿತ ಕ್ರಮ ಜರುಗಬೇಕಿದೆ
• ಹು-ಧಾ ಅವಳಿ ನಗರದ ಒಳ ರಸ್ತೆಗಳು ಸಂಪೂರ್ಣ ಹದಗೆಟ್ಟಿದ್ದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗುತ್ತಿದೆ
• ಕಟ್ಟಡ ನಿರ್ವಣಕ್ಕೆ ಪರವಾನಗಿ ಹಾಗೂ ಸಿಸಿ ನೀಡುವ ಯೋಜನೆ ಶಾಖೆಯಲ್ಲಿ ಹಣವಿಲ್ಲದೆ ಕೆಲಸ ನಡೆಯುವುದಿಲ್ಲ ಎಂಬ ಆರೋಪಗಳಿವೆ
• ಕೆಲ ವಾರ್ಡ್​ಗಳಲ್ಲಿ ಮಾತ್ರ ನಿತ್ಯವೂ ಮನೆ ಮನೆಯಿಂದ ಕಸ ಸಂಗ್ರಹಿಸಲಾಗುತ್ತಿದೆ. ಇನ್ನು ಕೆಲ ವಾರ್ಡ್​ಗಳಲ್ಲಿ 2-3 ದಿನಗಳಿಗೊಮ್ಮೆ ಸಂಗ್ರಹಿಸಲಾಗುತ್ತಿದ್ದು, ನೈರ್ಮಲ್ಯ ಕಾಪಾಡಲು ಸಾಧ್ಯವಾಗುತ್ತಿಲ್ಲ
• ನಗರ ಸ್ವಚ್ಛತೆ ಕೆಲಸ ನಿರ್ವಹಿಸುವ ಪೌರ ಕಾರ್ವಿುಕರಿಗೆ ಬೆಳಗ್ಗೆ ಗುಣಮಟ್ಟದ ಉಪಾಹಾರ ಪೂರೈಸಬೇಕಿದೆ
• ಪ್ರಸಕ್ತ ವರ್ಷ ಜುಲೈ ತಿಂಗಳಲ್ಲಿ ಉತ್ತಮ ಮಳೆಯಾಗಿದ್ದು, ಎಲ್ಲ ವಾರ್ಡ್​ಗಳಿಗೆ ಕನಿಷ್ಠ 3-4 ದಿನಗಳಿಗೊಮ್ಮೆ ನೀರು ಪೂರೈಸುವ ವ್ಯವಸ್ಥೆ ಆಗಬೇಕು
• ಒಳಚರಂಡಿಯ ಕೊಳಚೆ ನೀರು ರಸ್ತೆ ಮೇಲೆ ಹರಿಯುವ ಹಾಗೂ ಬ್ಲಾಕ್ ಆಗುವ ಕುರಿತು ನಿತ್ಯವೂ 8-10 ಪ್ರಕರಣಗಳು ಇದ್ದೇ ಇರುತ್ತವೆ
• ಅವಳಿ ನಗರದ ಅಭಿವೃದ್ಧಿಯಲ್ಲಿ ನಾಗರಿಕರ ಸಹಭಾಗಿತ್ವ ಬಯಸುವ ವಾರ್ಡ್ ಸಮಿತಿ ರಚನೆಯಲ್ಲಿ ಈಗಾಗಲೇ ಸಾಕಷ್ಟು ವಿಳಂಬವಾಗಿದ್ದು, ಇನ್ನಷ್ಟು ಕಾಲಹರಣ ಮಾಡುವುದರಲ್ಲಿ ಅರ್ಥವಿಲ್ಲ.

ಸ್ಮಾರ್ಟ್ ಸಿಟಿ ಎಂಡಿ ಡಾ. ರುದ್ರೇಶ ಘಾಳಿ

ಹಿರಿಯ ಶ್ರೇಣಿ (ಸೂಪರ್ ಟೈಮ್ ಸ್ಕೇಲ್) ಕೆಎಎಸ್ ಅಧಿಕಾರಿ ಡಾ. ರುದ್ರೇಶ ಘಾಳಿ ಜುಲೈ 19ರಂದು ಹು-ಧಾ ಸ್ಮಾರ್ಟ್ ಸಿಟಿ ಲಿಮಿಟೆಡ್​ನ ವ್ಯವಸ್ಥಾಪಕ ನಿರ್ದೇಶಕರಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಹುಬ್ಬಳ್ಳಿ-ಧಾರವಾಡ ಸಿಟಿಗಳನ್ನು ಸ್ಮಾರ್ಟ್ ಮಾಡುವ ಗುರುತರ ಜವಾಬ್ದಾರಿ ಇವರ ಮೇಲಿದೆ. ಇದಕ್ಕೊಂದಿಷ್ಟು ಗಮನಸೆಳೆಯುವ ಟಿಪ್ಸ್ ಇಲ್ಲಿವೆ.

• ಇಂದಿರಾ ಗಾಜಿನಮನೆಯಲ್ಲಿ ಸ್ಮಾರ್ಟ್ ಸಿಟಿ ಯೋಜನೆಯಡಿ 26.11 ಕೋಟಿ ರೂ. ವೆಚ್ಚದಲ್ಲಿ ಪೂರ್ಣಗೊಂಡ 2 ಕಾಮಗಾರಿಗಳು ಲೋಕಾಯುಕ್ತ ತನಿಖೆಯನ್ನು ಎದುರಿಸುತ್ತಿವೆ
• ಪೂರ್ಣಗೊಂಡ ಕಾಮಗಾರಿಗಳನ್ನು ಹು-ಧಾ ಮಹಾನಗರ ಪಾಲಿಕೆಗೆ ಹಸ್ತಾಂತರಿಸುವ ವಿಷಯ ಇನ್ನೂ ಬಗೆಹರಿದಿಲ್ಲ
• ಸೂಕ್ತ ನಿರ್ವಹಣೆಯಿಲ್ಲದೇ ಅಧೋಗತಿ ಹೊಂದಿದ ಇ-ಟಾಯ್ಲೆಟ್​ಗಳನ್ನು ಪುನಃ ಬಳಕೆಗೆ ತರುವ ಜವಾಬ್ದಾರಿಯನ್ನು ಯಾರೂ ತೆಗೆದುಕೊಳ್ಳುತ್ತಿಲ್ಲ
• ಹಸ್ತಾಂತರ ಗೊಂದಲದಿಂದ ಜನತಾ ಬಜಾರ್ ವಾಣಿಜ್ಯ ಸಂಕೀರ್ಣ, ಉಣಕಲ್ ಮಾರುಕಟ್ಟೆ, ಇತ್ಯಾದಿ ನಿರ್ವಣಗಳು ಅನಾಥವಾಗಿವೆ
• ಅಸಮರ್ಪಕ ಅನುಷ್ಠಾನದ ಹಿನ್ನೆಲೆಯಲ್ಲಿ ಪಾಲಿಕೆ ರಚಿಸಿದ ತಾಂತ್ರಿಕ ಪರಿಣತರ ಸಮಿತಿಗೆ ಸ್ಮಾರ್ಟ್ ಸಿಟಿ ಲಿಮಿಟೆಡ್​ನ ಅಧಿಕಾರಿಗಳು ಸಹಕಾರ ನೀಡುತ್ತಿಲ್ಲ
• ಪ್ರಗತಿಯಲ್ಲಿರುವ ಗ್ರೀನ್ ಮೊಬಿಲಿಟಿ ಕಾರಿಡಾರ್, ಮಲ್ಟಿಲೆವಲ್ ಕಾರ್ ರ್ಪಾಂಗ್, ಹಳೇ ಬಸ್ ನಿಲ್ದಾಣ ಅಭಿವೃದ್ಧಿ ಕಾಮಗಾರಿಗಳು ವೇಗ ಪಡೆಯಬೇಕಿದೆ
• ಹದಗೆಟ್ಟು ಹೋದ ಆರ್​ಎಫ್​ಐಡಿ ಟ್ಯಾಗ್ ಮತ್ತು ಟ್ಯಾಗ್ ರೀಡರ್ ವ್ಯವಸ್ಥೆ ಬಗ್ಗೆ ಪಾಲಿಕೆ ಹಾಗೂ ಸ್ಮಾರ್ಟ್​ಸಿಟಿ ಇಬ್ಬರಿಗೂ ಉತ್ತರ ದಾಯಿತ್ವ ಇಲ್ಲವಾಗಿದೆ
• ಕೆಲವೆಡೆ ರಸ್ತೆ ಕಾಮಗಾರಿಗಳು ಕಳಪೆಯಾಗಿರುವ ಬಗ್ಗೆ ಸಾರ್ವಜನಿಕರಿಂದ ವ್ಯಾಪಕ ದೂರುಗಳು ಕೇಳಿ ಬಂದಿವೆ
• ಸ್ಮಾರ್ಟ್ ಸಿಟಿ ಲಿಮಿಟೆಡ್​ನ ಅವಧಿ 2024ರ ಮೇ ತಿಂಗಳಲ್ಲಿ ಕೊನೆಗೊಳ್ಳಲಿದೆ. ಅಷ್ಟರೊಳಗೆ ಎಲ್ಲ ಕಾಮಗಾರಿಗಳು ಪೂರ್ಣಗೊಳ್ಳಬೇಕಿದೆ.