ಬೆಂಗಳೂರಿನಲ್ಲಿ ತರಬೇತಿ: ಅಪರಾಧ ಪತ್ತೆ ವಿಭಾಗದಲ್ಲಿ ಬ್ರೌನಿ ಹೆಸರಿನ ಡಾಬರ್ಮನ್ ತಳಿಯ ಶ್ವಾನ ಕಾರ್ಯನಿರ್ವಹಿಸುತ್ತಿದೆ. ಈಗ ಹೊಸದಾಗಿ ಎರಡು ತಿಂಗಳ ಮರಿ ಸ್ನೈಫರ್ ಸೇರ್ಪಡೆಯಾಗಿದೆ. ಜಿಲ್ಲಾ ಪೊಲೀಸ್ ಅಧೀಕ್ಷಕರು ತಳಿಯ ವಿಶೇಷತೆ, ಕಾರ್ಯನಿರ್ವಹಣೆ ಚುರುಕುತನದ ಬಗ್ಗೆ ತಿಳಿದು, ಮುತುವರ್ಜಿ ವಹಿಸಿ ಇದೇ ತಳಿಯನ್ನು ವಿಶೇಷ ತರಬೇತಿಗೆ ಆಯ್ಕೆ ಮಾಡಿದ್ದಾರೆ. ಬೆಂಗಳೂರು ಆಡುಗೋಡಿಯಲ್ಲಿರುವ ಪೊಲೀಸ್ ಶ್ವಾನ ತರಬೇತಿ ಘಟಕಕ್ಕೆ ಶೀಘ್ರ ಸ್ನೈಫರ್ ತೆರಳಲಿದೆ. ಇದರೊಂದಿಗೆ ಸಶಸ್ತ್ರ ಮೀಸಲು ಪಡೆಯ ಇಬ್ಬರು ಸಿಬ್ಬಂದಿ ಹ್ಯಾಂಡ್ಲರ್ಗಳಾಗಿ ತೆರಳುತ್ತಾರೆ. ಶ್ವಾನಗಳಿಗೆ ಅಲ್ಲಿ ಶಿಸ್ತು, ವಿಧೇಯತೆ, ಇಲಾಖೆಗೆ ಬೇಕಾದ ಪೂರಕ ತರಬೇತಿ ಕೊಡಲಾಗುತ್ತದೆ. ಅಪರಾಧ ಸೇರಿದಂತೆ ವಿವಿಧ ವಿಭಾಗ ತಜ್ಞರಿಂದ ತರಬೇತಿ ಪಡೆದು ಬಳಿಕ ಶ್ವಾನದಳದಲ್ಲಿ ಕರ್ತವ್ಯ ನಿರ್ವಹಿಸಲಿದೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
