ಅವಿಮುಕ್ತೇಶ್ವರ ಸ್ವಾಮಿಗೆ ನೂತನ ರಥ

ಹೊಸಕೋಟೆ: ಪ್ರತಿ ವರ್ಷ ನಡೆಯುವ ಅವಿಮುಕ್ತೇಶ್ವರ ಬ್ರಹ್ಮ ರಥೋತ್ಸವಕ್ಕೆ ಈ ಬಾರಿ ಬೆಂಡಿಗಾನಹಳ್ಳಿ ಬಚ್ಚೇಗೌಡ ಕುಟುಂಬದವರು ನೂತನ ರಥ ನಿರ್ಮಿಸಿಕೊಡಲಿದ್ದಾರೆ. ಈ ಕುರಿತು ಶಾಸಕ ಶರತ್​ ಬಚ್ಚೇಗೌಡ ನೂತನ ರಥ ನಿರ್ಮಾಣಕ್ಕಾಗಿ ಹುಣಸೂರಿನಲ್ಲಿ ಅಗತ್ಯ ಮರಗಳನ್ನು ವೀಕ್ಷಣೆ ಮಾಡಿದರು.

ಕಳೆದ ವರ್ಷ ಹೊಸಕೋಟೆ ನಗರದ ಅವಿಮುಕ್ತೇಶ್ವರಸ್ವಾಮಿ ಬ್ರಹ್ಮರಥೋತ್ಸವ ಪೂರ್ವಭಾವಿ ಸಭೆಯಲ್ಲಿ ಭಾಗವಹಿಸಿದ್ದ ಶರತ್​ ಬಚ್ಚೇಗೌಡ, 5&6 ದಶಗಳಿಂದ ಇರುವ ರಥದ ಬದಲಾಗಿ ನೂತನ ರಥ ಮಾಡಿಸಿಕೊಡುವುದಾಗಿ ಭರವಸೆ ನೀಡಿದ್ದರು. ಕೊಟ್ಟ ಮಾತಿನಂತೆ ರಥಕ್ಕೆ ಬೇಕಾಗಿರುವ ಮರಗಳನ್ನು ಬೆಂಡಿಗಾನಹಳ್ಳಿ ಬಚ್ಚೇಗೌಡರ ಕುಟುಂಬದಿಂದ ಕೊಡಿಸಲು ನಿರ್ಧರಿಸಿದ್ದಾರೆ.

ಮುಖಂಡರಾದ ಎಚ್​.ಎಸ್​.ಗೋಪಾಲ್​, ಶುಭಾಷ್​ ಗೌಡ ಇತರರು ಶಾಸಕರ ಜತೆ ಮರಗಳನ್ನು ವೀಕ್ಷಣೆ ಮಾಡಿದರು.

ಇಂದು ಪೂರ್ವಭಾವಿ ಸಭೆ

ಮೇ 12 ರಂದು ನಡೆಯಲಿರುವ ಅವಿಮುಕ್ತೇಶ್ವರಸ್ವಾಮಿ ಬ್ರಹ್ಮರಥೋತ್ಸವದ ಪ್ರಯುಕ್ತ ತಾಲೂಕು ಆಡಳಿತ ಸೌಧದಲ್ಲಿ ಏ.30ರ ಮಧ್ಯಾಹ್ನ 3 ಗಂಟೆಗೆ ಶಾಸಕ ಶರತ್​ ಬಚ್ಚೇಗೌಡರ ಅಧ್ಯಕ್ಷತೆಯಲ್ಲಿ ಪೂರ್ವಭಾವಿ ಸಭೆ ಹಮ್ಮಿಕೊಳ್ಳಲಾಗಿದೆ.