ನಗರಸಭೆ ಅಧ್ಯಕ್ಷ, ಉಪಾಧ್ಯಕ್ಷ ಸ್ಥಾನಗಳ ಚುನಾವಣೆಗೂ ಮುನ್ನ ಮೂರು ಪಕ್ಷಗಳ ಸದಸ್ಯರು ಹಾಗೂ ಹೆಚ್ಚುವರಿ ಸದಸ್ಯರು ಸಭೆ ನಡೆಸಿ, ಅಧಿಕಾರವನ್ನು ಸಮಾನವಾಗಿ ಹಂಚಿಕೊಳ್ಳಲು ಒಮ್ಮತದ ಅಭಿಪ್ರಾಯಕ್ಕೆ ಬಂದಿದ್ದರು. ಅದರಂತೆ ಸಾಮಾನ್ಯ ಮಹಿಳೆಗೆ ಮೀಸಲಿದ್ದ ಅಧ್ಯಕ್ಷ ಸ್ಥಾನಕ್ಕೆ ಜೆಡಿಎಸ್ ಅಭ್ಯರ್ಥಿ, ಎಸ್ಸಿ ಮಹಿಳೆಗೆ ಮೀಸಲಿದ್ದ ಉಪಾಧ್ಯಕ್ಷ ಸ್ಥಾನಕ್ಕೆ ಕಾಂಗ್ರೆಸ್ ಅಭ್ಯರ್ಥಿಯನ್ನು ಆಯ್ಕೆ ಮಾಡಲಾಗಿದೆ. ಈಗ ಖಾಲಿ ಇರುವ ಸ್ಥಾಯಿ ಸಮಿತಿ ಸ್ಥಾನಕ್ಕೆ ಆಕಾಂಕ್ಷಿತರು ಹೆಚ್ಚಾಗಿದ್ದು, ಅವಿರೋಧ ಆಯ್ಕೆಗೆ ತೊಡಕಾಗಿದೆ.ಆಕಾಂಕ್ಷಿತರು ಯಾರು: ನಗರಸಭೆ ಸ್ಥಾಯಿ ಸಮಿತಿ ಅಧ್ಯಕ್ಷ ಸ್ಥಾನಕ್ಕೆ ಬಿಜೆಪಿಯ ಎನ್.ಗಣೇಶ್, ಜೆಡಿಎಸ್ನ ಜಿ.ಆನಂದ್, ಆರ್.ಸುನೀಲ್ ಮೂಡ್, ಕಾಂಗ್ರೆಸ್ನ ಸಿ.ಪ್ರದೀಪ್ ಅವರ ಹೆಸರು ಕೇಳಿ ಬರುತ್ತಿದೆ. ಹಾಗೆಯೇ ನಗರಸಭೆಯಿಂದ ನೆಲಮಂಗಲ ಯೋಜನಾ ಪ್ರಾಧಿಕಾರಕ್ಕೆ ನಾಮನಿರ್ದೇಶನ ಮಾಡುವ ಸ್ಥಾನಕ್ಕೆ ಜೆಡಿಎಸ್ನ ಕೆ.ಎಂ.ಶಿವಕುಮಾರ್ ಆಕಾಂಕ್ಷಿತರಾಗಿದ್ದಾರೆ.
