ವಿಜಯವಾಣಿ ಸುದ್ದಿಜಾಲ ಧಾರವಾಡ
ಧಾರವಾಡ- ಯಾದವಾಡ ಮಾರ್ಗದ ದಾಸನಕೊಪ್ಪ ಗ್ರಾಮದ ಬಳಿಯ ಹಾತರಕಿ ಹಳ್ಳ ಬಲಿಗಾಗಿ ಕಾಯುತ್ತಿದೆ. ಮಳೆಯಾದಾಗೊಮ್ಮೆ ತುಂಬಿ ಹರಿಯುವ ಸೇತುವೆಯನ್ನು ಮೇಲಕ್ಕೆ ಎತ್ತರಿಸಬೇಕು ಎಂಬ ಬೇಡಿಕೆ ದಶಕಗಳಿಂದ ಈಡೇರಿಲ್ಲ. ಈ ಸೇತುವೆ ಬಲಿಗಾಗಿ ಕಾಯುತ್ತಿದ್ದರೂ ಲೋಕೋಪಯೋಗಿ ಇಲಾಖೆ ಅಽಕಾರಿಗಳ ಗಮನಕ್ಕೆ ಬಂದಿಲ್ಲ.
ಯಾದವಾಡ ಮಾರ್ಗವಾಗಿ ಹತ್ತಾರು ಗ್ರಾಮಗಳ ಜನ ನಿತ್ಯ ಸಂಚರಿಸುತ್ತಾರೆ. ಈ ರಸ್ತೆ ದಾಸನಕೊಪ್ಪ, ಲಕಮಾಪುರ, ಶಿಬಾರಗಟ್ಟಿ, ಲೋಕೂರ, ಉಪ್ಪಿನ ಬೆಟಗೇರಿ ಸೇರಿ ಹಲವು ಗ್ರಾಮಗಳನ್ನು ಸಂಚರಿಸುತ್ತದೆ. ಉಪ್ಪಿನ ಬೆಟಗೇರಿ ಮಾರ್ಗವಾಗಿ ಬೈಲಹೊಂಗಲಕ್ಕೂ ಇದೇ ಮಾರ್ಗ. ನಿತ್ಯ ನೂರಾರು ಬೈಕ್, ವಾಹನ, ಬಸ್ಗಳು ಇದೇ ಮಾರ್ಗವಾಗಿ ಓಡಾಡುತ್ತವೆ.
ಕೆಲ ದಿನಗಳಿಂದ ಸುರಿಯುತ್ತಿರುವ ಮಳೆಯಿಂದ ಸೇತುವೆ ಮೇಲೆ ನೀರು ಹರಿಯುತ್ತದೆ. ಹಳ್ಳದ ನೀರು ಸಂಪೂರ್ಣ ಕಡಿಮೆಯಾಗುವವರೆಗೆ ವಾಹನ ಸಂಚಾರ ಸ್ಥಗಿತಗೊಳ್ಳುತ್ತದೆ. ಕೆಲವೊಮ್ಮೆ 2- 3 ಗಂಟೆ ಕಾಲ ವಾಹನಗಳು ನಿಂತ ಉದಾಹರಣೆ ಇದೆ. ಮೈ ಮರೆತು ವಾಹನ ಚಲಾಯಿಸಿದರೆ ನೀರು ಪಾಲಾಗುವುದು ಖಚಿತ. ಇಳಿಜಾರು ಮತ್ತು ತಿರುವಿನಲ್ಲಿ ಹಳ್ಳವಿದ್ದು, ಲೋಕೋಪಯೋಗಿ ಇಲಾಖೆಯಿಂದ ಒಂದೇ ಒಂದು ಎಚ್ಚರಿಕೆ ಫಲಕವನ್ನೂ ಅಳವಡಿಸಿಲ್ಲ.
