ನಾಯಕನಹಟ್ಟಿ ಜಾತ್ರೆ: ಸೈಕಲ್ ಏರಿ ಸಿದ್ಧತೆ ಪರಿಶೀಲಿಸಿದ ಎಸ್ಪಿ

ಚಿತ್ರದುರ್ಗ: ನಾಯಕನಹಟ್ಟಿಯಲ್ಲಿ ಮಾ.5ರಿಂದ 16ರವರೆಗೆ ಪ್ರಸಿದ್ಧ ನಡೆಯಲಿರುವ ಶ್ರೀ ಗುರು ತಿಪ್ಪೇರುದ್ರಸ್ವಾಮಿ ಜಾತ್ರಾ ಮಹೋತ್ಸವ ಸಿದ್ಧತೆ ಕುರಿತಂತೆ ಎಸ್ಪಿ ಜಿ.ರಾಧಿಕಾ,ಅಧಿಕಾರಿ ಹಾಗೂ ಸಿಬ್ಬಂದಿಯೊಂದಿಗೆ ಸೈಕಲ್ ಏರಿ ಪಟ್ಟಣದಲ್ಲಿ ಭಾನುವಾರ ಪರಿಶೀಲನೆ ನಡೆಸಿದರು.

ವಾಹನ ನಿಲುಗಡೆ,ಸಿಸಿ ಕ್ಯಾಮರಾ,ಪ್ರಾಣಿ ಬಲಿ ತಡೆಯಲು ಚೆಕ್‌ಪೋಸ್ಟ್,ಕಳ್ಳತನ ಮತ್ತು ತಪ್ಪಿಸಿಕೊಂಡ ಮಕ್ಕಳ ಬಗ್ಗೆ ತುರ್ತು ಕ್ರಮಕ್ಕೆ ಪ್ರಮುಖ ಸ್ಥಳಗಳಲ್ಲಿ ಕೌಂಟರ್‌ಗಳ ಹಾಗೂ ಚೆಕ್‌ಪೋಸ್ಟ್ ನಿರ್ಮಾಣ ಕುರಿತಂತೆ ಪರಿಶೀಲನೆ ನಡೆಸಿದರು.

ಈ ವೇಳೆ ಎಎಸ್ಪಿ ಎಂ.ಬಿ.ನಂದಗಾವಿ, ಚಳ್ಳಕೆರೆ ಡಿವೈಎಸ್ಪಿ ರೋಷನ್ ಜಮೀರ್ ಸೇರಿದಂತೆ ಪೊಲೀಸ್ ಅಧಿಕಾರಿಗಳು, ಪಟ್ಟಣ ಪಂಚಾಯಿತಿ ಹಾಗೂ ಕಂದಾಯ ಇಲಾಖೆ ಅಧಿಕಾರಿಗಳು, ದೇವಾಲಯ ಸಮಿತಿ ಪ್ರಮುಖರು ಇದ್ದರು.

ಚಿತ್ರದುರ್ಗದಲ್ಲಿ ಫೆ.26ರಂದು ಜಿಲ್ಲಾಧಿಕಾರಿ ಆರ್.ವಿನೋತ್‌ಪ್ರಿಯಾ ಜಿಲ್ಲಾಮಟ್ಟದ ಅಧಿಕಾರಿಗಳೊಂದಿಗೆ ಜಾತ್ರೆ ಸಿದ್ಧತೆ ಸಭೆ ನಡೆಸಿ ಕಾಮಗಾರಿಗಳನ್ನು ತ್ವರಿತವಾಗಿ ಪೂರ್ಣಗೊಳಿಸಲು ತಾಕೀತು ಮಾಡಿದ್ದರು.