ರಾಷ್ಟ್ರೀಯ ಹೆದ್ದಾರಿಯ ಎರಡೂ ಕಡೆ ಕಟ್ಟಡ ನಿರ್ಮಿಸಬೇಕಾದವರು ರಾಷ್ಟ್ರೀಯ ಹೆದ್ದಾರಿ ಇಲಾಖೆಯಿಂದ ಅನುಮತಿ ಪಡೆಯುವುದು ಕಡ್ಡಾಯ. ಜತೆಗೆ ಹೆದ್ದಾರಿಯ ಮಧ್ಯಭಾಗದಿಂದ 40 ಮೀ. ಅಂತರ ಕಾಯಬೇಕು. ಜಿಪಂ ರಸ್ತೆ ಪಕ್ಕ ಕಟ್ಟಡ ನಿರ್ಮಿಸಬೇಕಾದರೆ ಕನಿಷ್ಟ 12.5 ಮೀ. ಅಂತರ ಬಿಡಬೇಕು. ಬಳಿಕ ಸೆಟ್ಬ್ಯಾಕ್, ಎರಡಕ್ಕಿಂತ ಅಧಿಕ ಮಹಡಿ ನಿರ್ಮಿಸಬೇಕಾದರೆ ಪ್ರತ್ಯೇಕ ಅನುಮತಿ, ಪಾರ್ಕಿಂಗ್, ಅಗ್ನಿಶಾಮಕ ಸೇರಿದಂತೆ ಹಲವು ನಿಯಮಗಳಿವೆ. ಆದರೆ ಉಪ್ಪುಂದದಿಂದ ಬೈಂದೂರಿನ ಹೊಸ ಬಸ್ ನಿಲ್ದಾಣದವರೆಗೆ ಹಾಗೂ ಬೈಂದೂರು ರಥಬೀದಿಗಳಲ್ಲಿ ನಿಯಮ ಪಾಲಿಸದೆ ಹಲವು ಕಟ್ಟಡಗಳು ತಲೆ ಎತ್ತಿವೆ. ಉಪ್ಪುಂದ ಗ್ರಾಪಂ ಹಾಗೂ ಬೈಂದೂರು ಪಪಂ ವ್ಯಾಪ್ತಿಯಲ್ಲಿ 108/15ರಲ್ಲಿ ನಿಯಮಾನುಸಾರ ಅನುಮತಿ ಪಡೆಯದೆ ಬಹುಮಹಡಿ ಕಟ್ಟಡ ನಿರ್ಮಾಣವಾಗುತ್ತಿರುವ ಕುರಿತು ಗ್ರಾಪಂ ಪಿಡಿಒ ಮೂಲಕ ಜಿಲ್ಲಾಧಿಕಾರಿಗೆ ದೂರು ನೀಡಲಾಗಿದೆ. ಹೆದ್ದಾರಿ ಇಲಾಖೆ, ಅಧಿಕಾರಿಗಳ ನಿರ್ಲಕ್ಷೃದ ಕುರಿತು ಸಾಮಾಜಿಕ ಹೋರಾಟಗಾರರು ದಾವೆ ಕೂಡ ಹೂಡಿದ್ದಾರೆ. ಆದರೂ ಅಕ್ರಮಗಳ ತೆರವಿಗೆ ಯಾರೂ ಮುಂದಾಗಿಲ್ಲ.
