ಜೆ.ಜಿ.ಶ್ರೀನಿವಾಸಮೂರ್ತಿ ಬೇತಮಂಗಲ
ಕೆಜಿಎಫ್ ತಾಲೂಕು ಬೇತಮಂಗಲ ಸಮುದಾಯ ಆರೋಗ್ಯ ಕೇಂದ್ರ ರಾಷ್ಟ್ರಮಟ್ಟದ ಮಾನ್ಯತೆ ಪಡೆದಿದ್ದು, ಈ ರಾಷ್ಟ್ರೀಯಮಟ್ಟದ ಪ್ರಶಸ್ತಿ ಲಭಿಸುವ ನಿರೀೆ ಮೂಡಿದೆ.
ಕೆಜಿಎಫ್ ತಾಲೂಕು ಬೇತಮಂಗಲ ಸಮುದಾಯ ಆರೋಗ್ಯ ಕೇಂದ್ರ 5 ವರ್ಷಗಳ ಹಿಂದೆ ರಾಜ್ಯಮಟ್ಟದ ಕಾಯಕಲ್ಪ ಪ್ರಶಸ್ತಿ ಪಡೆದಿದ್ದು, ಈಗ ರಾಷ್ಟ್ರೀಯ ಗುಣಮಟ್ಟದ ಭರವಸೆ ಮತ್ತು ಮಾನದಂಡಗಳ ಸಮಿತಿ (ಎನ್ಕ್ಯೂಎಎಸ್) ಪರಿಶೀಲನೆಯಲ್ಲಿ ರಾಷ್ಟ್ರಮಟ್ಟದಲ್ಲಿ ಮಾನ್ಯತೆ ಪಡೆಯುವುದರೊಂದಿಗೆ ರಾಷ್ಟ್ರಮಟ್ಟದಲ್ಲಿ ಸಿಗಬೇಕಾಗಿರುವ ಸೌಲಭ್ಯಗಳಿಗೆ ಅರ್ಹತೆ ಪಡೆದಿದೆ. ಆದರೆ ಹತ್ತಾರು ಕೊರತೆಗಳು ಆಸ್ಪತ್ರೆಗಳಲ್ಲಿದ್ದು, ಅವುಗಳನ್ನು ನೀಗಿಸುವ ನಿಟ್ಟಿನಲ್ಲಿ ಅಧಿಕಾರಿಗಳು ಕಾರ್ಯಪ್ರವೃತ್ತರಾದರೆ ರಾಷ್ಟ್ರೀಯಮಟ್ಟದ ಪ್ರಶಸ್ತಿ ಮುಡಿಗೇರುವುದು ಖಚಿತ.
ಪ್ರಶಸ್ತಿಗೆ ಮಾನದಂಡಗಳೇನು?: ಆಸ್ಪತ್ರೆ ಆವರಣಗಳಲ್ಲಿ ಸ್ವಚ್ಛತೆ, ರೋಗಿಗಳ ಹಕ್ಕು ರಕ್ಷಣೆ, ರೋಗಿಗಳೊಂದಿಗೆ ಸಿಬ್ಬಂದಿ ಬಾಂಧವ್ಯ, ಗುಣಮಟ್ಟದ ಚಿಕಿತ್ಸೆ ಜತೆಗೆ ಆಸ್ಪತ್ರೆಯ ಎಲ್ಲ ಸೌಲಭ್ಯ ಒದಗಿಸುವುದು, ವೈದ್ಯರ ಕೊಠಡಿ, ವಾರ್ಡ್, ಶೌಚಗೃಹ ಸ್ವಚ್ಛತೆ, ರೋಗ ಹರಡದಂತೆ ಮುನ್ನೆಚ್ಚರಿಕಾ ಕ್ರಮ, ಸಿಬ್ಬಂದಿ ಹಾಜರಾತಿ ಹಾಗೂ ಆಸ್ಪತ್ರೆಯ ಪ್ರತಿ ಚಟುವಟಿಕೆಯನ್ನೂ ಪರಿಗಣಿಸಲಾಗುವುದು. ಹಣಕಾಸು ವ್ಯವಹಾರ, ಔಷಧ ವಿತರಣೆ, ವಿಶೇಷವಾಗಿ ವೈದ್ಯರು, ಸಿಬ್ಬಂದಿ ಸೇರಿ ಆಸ್ಪತ್ರೆಯ ವಿರುದ್ಧ ಸಾರ್ವಜನಿಕರಿಂದ ಯಾವುದೇ ಆರೋಪ, ಆಕ್ಷೇಪಣೆ ಇರಬಾರದು. ಸಿಬ್ಬಂದಿಯ ಸೇವಾ ಮನೋಭಾವ, ಮಾನವೀಯತೆ, ಕರ್ತವ್ಯ ನಿಷ್ಠೆ ಸೇರಿ ಹಲವು ಅಂಶಗಳನ್ನು ಪರಿಗಣಿಸಿ ರಾಷ್ಟ್ರಮಟ್ಟದ ಪ್ರಶಸ್ತಿಗೆ ಆಯ್ಕೆ ಮಾಡಲಾಗುವುದು.
ಹೃದಯವಂತ ಮಕ್ಕಳ ತಜ್ಞ: ಹೃದಯವಂತ ವೈದ್ಯ ಎಂದೇ ಖ್ಯಾತಿ ಹೊಂದಿರುವ ಮಕ್ಕಳ ತಜ್ಞ ಡಾ.ವಿನಯ್ ಅವರು ಇಲ್ಲಿ ಸೇವೆ ಸಲ್ಲಿಸುತ್ತಿದ್ದು, ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಹೀಗಿದೆ ಸ್ಥಿತಿಗತಿ
ಬೇತಮಂಗಲ ಮೀಸಲು ವಿಧಾನಸಭಾ ಕ್ಷೇತ್ರದಿಂದ ಶಾಸಕರಾಗಿದ್ದ ಚಿನ್ನಪ್ಪ ಅವರು ಸ್ವಂತ ಜಮೀನಿನಲ್ಲಿ ಉಚಿತವಾಗಿ ನೀಡಿರುವ ಸುಮಾರು 2 ಎಕರೆ ಜಾಗದಲ್ಲಿ ಟ್ರಾಮಾ ಕೇರ್ ಯೋಜನೆಯಡಿ ಒಟ್ಟು 2 ಕೋಟಿ ರೂ. ವೆಚ್ಚದಲ್ಲಿ ಆರೋಗ್ಯ ಕೇಂದ್ರ ನಿಮಾರ್ಣಗೊಂಡಿದ್ದು, 7 ವರ್ಷಗಳ ಹಿಂದೆ ನಿರ್ಮಿಸಿರುವ ಸುಸಜ್ಜಿತ ಕಟ್ಟಡ ಯಾವ ಖಾಸಗಿ ಆಸ್ಪತ್ರೆಗೂ ಕಮ್ಮಿ ಇಲ್ಲ ಎನ್ನುವಂತಿದೆ. ಆಸ್ಪತ್ರೆ ಒಳಗೆ&ಹೊರ ರೋಗಿಗಳ ಚೀಟಿ ವಿತರಣೆ, ವೈದ್ಯಾಧಿಕಾರಿ ಕೊಠಡಿ, 4 ವೈದ್ಯರ ಕೊಠಡಿಗಳಿವೆ. ಚುಚ್ಚುಮದ್ದು ಕೊಠಡಿ, ಆಪ್ತ ಸಮಾಲೋಚನಾ ಕೊಠಡಿ, ಕೇಂದ್ರ ಮತ್ತು ರಾಜ್ಯಸರ್ಕಾರ ನೀಡುವ ವಿಶೇಷ ಯೋಜನೆಗಳ ಅನುಷ್ಠಾನಕ್ಕಾಗಿ ನೇಮಿಸಿರುವ ಸಿಬ್ಬಂದಿ ಕೊಠಡಿ, ಸಂವಾದ, ತರಬೇತಿ, ಕಾರ್ಯಕ್ರಮಗಳನ್ನು ಆಯೋಜಿಸುವ ಸಭಾಂಗಣ ಹೊಂದಿದೆ. ಸುಸಜ್ಜಿತ ಹೆರಿಗೆ ಕೇಂದ್ರ ಮತ್ತು ಶಸ್ತ್ರಚಿಕಿತ್ಸಾ ಕೊಠಡಿ, ಸ್ವಾಗತ ಕೌಂಟರ್, ಮಹಿಳೆಯರ, ಪುರುಷರ ಪ್ರತ್ಯೇಕ ಶೌಚಗೃಹಗಳೂ ಲಭ್ಯವಿದೆ.
ಇನ್ನೂ ಏನೇನು ಅಗತ್ಯವಿದೆ?
ಪ್ರಾಥಮಿಕ ಆರೋಗ್ಯ ಕೇಂದ್ರದಿಂದ ಸಮುದಾಯ ಆರೋಗ್ಯ ಕೇಂದ್ರವಾಗಿ ಮೇಲ್ದರ್ಜೆಗೆ ಏರಿದರೂ ಹಲವು ಸೌಲಭ್ಯ ಒದಗಿಸಿಲ್ಲ. ಕನಿಷ್ಠ 400 ರೋಗಿಗಳು ಬರುವ ಆಸ್ಪತ್ರೆಯಲ್ಲಿ ಎಕ್ಸ್ರೇ ಯಂತ್ರ ಇತ್ಯಾದಿ ಅವಶ್ಯಕ ಸೌಲಭ್ಯ ಕಲ್ಪಿಸಬೇಕಿದೆ. 5 ವೈದ್ಯರ ಅಗತ್ಯವಿದ್ದು, 4 ಮಂದಿ ಇದ್ದಾರೆ. ಆಡಳಿತಾಧಿಕಾರಿ ನೇಮಕವಾಗಿಲ್ಲ. ರಾತ್ರಿ ಪಾಳಿಯಲ್ಲಿ ವೈದ್ಯರೇ ಇರುವುದಿಲ್ಲ. ಆದ್ದರಿಂದ ರಾತ್ರಿವೇಳೆ ರೋಗಿಗಳಿದ್ದರೆ ಕೆಜಿಎಫ್, ಕೋಲಾರಕ್ಕೆ ಕಳುಹಿಸಲಾಗುತ್ತದೆ ಎಂಬ ಆರೋಪವೂ ಕೇಳಿಬರುತ್ತಿದೆ. ಆಸ್ಪತ್ರೆಗೆ ರಾತ್ರಿ&ಹಗಲು ಯಾವುದೇ ಭದ್ರತೆ ಇಲ್ಲದ ಕಾರಣ ರಾತ್ರಿ ಕರ್ತವ್ಯ ನಿರ್ವಹಿಸುವ ಮಹಿಳಾ ಆರೋಗ್ಯ ಅಧಿಕಾರಿ ಮತ್ತು ದಾದಿಯರಿಗೆ ರಕ್ಷಣೆ ಇಲ್ಲದೆ ಸಮಸ್ಯೆ ಉಂಟಾಗುತ್ತಿದೆ. ಕೆಜಿಎಫ್ ಶಾಸಕಿ ರೂಪಕಲಾ ಆಸ್ಪತ್ರೆಗೆ ಉಚಿತವಾಗಿ ಆಂಬುಲೆನ್ಸ್ ನೀಡಿದ್ದಾರೆ. ಆದರೆ, ಅದಕ್ಕೆ ಚಾಲಕರಿಲ್ಲದೆ ತುರ್ತು ಸಂದರ್ಭದಲ್ಲಿ ರೋಗಿಗಳು ಪರದಾಡುವಂತಾಗಿದೆ. ಈ ಎಲ್ಲ ಸಮಸ್ಯೆಗಳಿಗೆ, ಆರೋಪಗಳಿಗೆ ಇತಿಶ್ರೀ ಹಾಡಿ, ಎಲ್ಲ ಸಿಬ್ಬಂದಿ ಜವಾಬ್ದಾರಿಯುತವಾಗಿ ಕರ್ತವ್ಯ ನಿರ್ವಹಿಸಿದಲ್ಲಿ ಬೇತಮಂಗಲ ಸಮುದಾಯ ಆರೋಗ್ಯ ಕೇಂದ್ರ ಈಗ ರಾಷ್ಟ್ರಮಟ್ಟದ ಮಾನ್ಯತೆ ಪಡೆದಿರುವ ಜತೆಗೆ ಮುಂದಿನ ದಿನಗಳಲ್ಲಿ ರಾಷ್ಟ್ರೀಯ ಪ್ರಶಸ್ತಿಗೂ ಅರ್ಹವಾಗಬಹುದಾಗಿದೆ.
