13ರಿಂದ ಶಿವಸಂಚಾರ ನಾಟಕೋತ್ಸವ: ಕರ್ನಾಟಕ ಸಂಘದ ಕಾರ್ಯಾಧ್ಯಕ್ಷ ತಗ್ಗಹಳ್ಳಿ ವೆಂಕಟೇಶ್ ಮಾಹಿತಿ

ಮಂಡ್ಯ: ಕರ್ನಾಟಕ ಸಂಘ ಹಾಗೂ ಚಿತ್ರದುರ್ಗ ಜಿಲ್ಲೆ ಸಾಣೇಹಳ್ಳಿ ಶಿವಕುಮಾರ ಕಲಾಸಂಘದ ಸಹಯೋಗದಲ್ಲಿ ನಗರದ ಪಿಇಎಸ್ ಕಾಲೇಜಿನ ಸ್ವಾಮಿವಿವೇಕಾನಂದ ರಂಗಮಂದಿರದಲ್ಲಿ ಡಿ.13ರಿಂದ ಮೂರು ದಿನ ಶಿವಸಂಚಾರ-22 ನಾಟಕೋತ್ಸವ ಆಯೋಜಿಸಲಾಗಿದೆ ಎಂದು ಕರ್ನಾಟಕ ಸಂಘದ ಕಾರ್ಯಾಧ್ಯಕ್ಷ ತಗ್ಗಹಳ್ಳಿ ವೆಂಕಟೇಶ್ ತಿಳಿಸಿದರು.

12ರಂದು ಎಸ್.ಜಿ.ಸಿದ್ದರಾಮಯ್ಯ ರಚನೆ ಮತ್ತು ನವೀನ್ ಮಂಡ್ಯ ನಿರ್ದೇಶನದ ‘ಬಿಜ್ಜಳ ನ್ಯಾಯ’, 13ರಂದು ಶಶಿರಾಜ್ ಕಾವೂ ರಚನೆಯ ಎಚ್.ಎಸ್.ಭೀಮೇಶ್ ನಿರ್ದೇಶನದ ‘ನೆಮ್ಮದಿ ಅಪಾರ್ಟ್‌ಮೆಂಟ್’ ಹಾಗೂ 14ರಂದು ರಾಷ್ಟ್ರಕವಿ ಕುವೆಂಪು ರಚನೆ ಪ್ರಮೋದ್ ಶಿಗ್ಗಾಂವ್ ನಿರ್ದೇಶನದ ‘ಚಂದ್ರಹಾಸ’ ನಾಟಕ ಪ್ರದರ್ಶನಗೊಳ್ಳಲಿದೆ. ಪ್ರತಿದಿನ ಸಂಜೆ 7 ಗಂಟೆಗೆ ನಾಟಕ ಪ್ರದರ್ಶನ ಆರಂಭಗೊಳ್ಳಲಿದೆ. ಸಾರ್ವಜನಿಕರಿಗೆ ಉಚಿತ ಪ್ರವೇಶವಿರಲಿದೆ. ಪ್ರತಿ ನಾಟಕ ಸುಮಾರು ಒಂದೂವರೆ ಗಂಟೆ ಪ್ರದರ್ಶನವಿರಲಿದೆ ಎಂದು ಶನಿವಾರ ಸುದ್ದಿಗೋಷ್ಠಿಯಲ್ಲಿ ವಿವರಿಸಿದರು.

12ರಂದು ಸಂಜೆ 6ಕ್ಕೆ ಮುಡಾ ಆಯುಕ್ತ ಆರ್.ಐಶ್ವರ್ಯಾ ನಾಟಕೋತ್ಸವಕ್ಕೆ ಚಾಲನೆ ನೀಡುವರು. ಹಿರಿಯ ವಕೀಲ ಎಚ್.ಬಸವಯ್ಯ ಅಧ್ಯಕ್ಷತೆ ವಹಿಸುವರು. ಜಿಲ್ಲಾ ಶರಣ ಸಾಹಿತ್ಯ ಪರಿಷತ್ತಿನ ಮಾಜಿ ಅಧ್ಯಕ್ಷ ಸಿದ್ದಲಿಂಗಯ್ಯ ಬನ್ನಂಗಾಡಿ, ಕಾಯಕಯೋಗಿ ಫೌಂಡೇಷನ್‌ನ ಅಧ್ಯಕ್ಷ ಎಂ.ಶಿವಕುಮಾರ್, ಹೊನಗಳ್ಳಿಮಠದ ಅವಿನಾಶ್ ಭಾಗವಹಿಸುವರು. 14ರಂದು ಸಂಜೆ ಸಮಾರೋಪ ಸಮಾರಂಭದಲ್ಲಿ ಜಿಪಂ ಸಿಇಒ ಶಾಂತಾ ಎಲ್.ಹುಲ್ಮನಿ ಸಮಾರೋಪ ಭಾಷಣ ಮಾಡುವರು. ವೈದ್ಯ ಡಾ.ವಿ.ಎಲ್.ನಂದೀಶ್ ಅಧ್ಯಕ್ಷತೆ ವಹಿಸುವರು. ವಕೀಲ ಮಲ್ಲಿಕಾರ್ಜುನಸ್ವಾಮಿ, ಹಿರಿಯ ವಕೀಲರ ಸದಾಶಿವಪ್ಪ ಹೊನಗಳ್ಳಿಮಠ ಭಾಗವಹಿಸುವರು ಎಂದು ಹೇಳಿದರು.

ಕರ್ನಾಟಕ ಸಂಘದ ಕಾರ್ಯದರ್ಶಿ ಸೋಮಶೇಖರ್, ನಿರ್ದೇಶಕರಾದ ಹನಕೆರೆ ನಾಗಪ್ಪ, ಮೋಹನ್‌ಕುಮಾರ್ ಹಾಜರಿದ್ದರು.