ಕೃಷಿಯ ಜತೆಗೆ ಸಾವಿರಾರು ಕುಟುಂಬಗಳು ಹೈನುಗಾರಿಕೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಕುರಿ, ಮೇಕೆ, ಪಶು ಸಾಕಣೆಗೆ ಸುಸಜ್ಜಿತ ಕಟ್ಟಡ ಇಲ್ಲದೆ ರೈತರು ಪರಿತಪಿಸುತ್ತಿದ್ದಾರೆ. ಬಿಸಿಲು, ಮಳೆ, ಚಳಿಗೆ ಸಿಲುಕಿ ರೋಗಗಳಿಗೆ ತುತ್ತಾಗುವಂತಹ ಪರಿಸ್ಥಿತಿ ಉಂಟಾಗಿದೆ. ಜತೆಗೆ ಸೂಕ್ತ ರಕ್ಷಣೆ ಇಲ್ಲದೆ ಜಾನುವಾರುಗಳ ಕಳವು ಸಹ ಹೆಚ್ಚಾಗಿದ್ದು, ಹಲವು ಕಡೆ ಚಿರತೆ ದಾಳಿಗಳಿಂದ ಕುರಿ ಮೇಕೆಗಳು ಸತ್ತಿರುವ ಉದಾಹರಣೆಗಳಿವೆ. ನರೇಗಾ ಯೋಜನೆಯಡಿ ಗ್ರಾಪಂ ಮೂಲಕ ಜಾನುವಾರುಗಳ ಶೆಡ್ ನಿಮಾರ್ಣ ಮಾಡಿಕೊಳ್ಳಲು ಹಣಕಾಸು ಸಹಾಯ ದೊರೆಯುತ್ತಿದೆ. 20/10 ಅಡಿಗೆ 57 ಸಾವಿರ ರೂ., ಕುರಿ ಮತ್ತು ಮೇಕೆ ಶೆಡ್ನ 14/10 ಅಡಿಗೆ 70 ಸಾವಿರ ರೂ. ಕೂಲಿ ಮತ್ತು ಸಾಮಗ್ರಿಗಳ ವೆಚ್ಚವಾಗಿ ನರೇಗಾ ಯೋಜನೆಯಲ್ಲಿ ನೀಡಲಾಗುತ್ತಿದೆ. ಈಗಾಗಲೇ ಎನ್ಎಂಆರ್ ಮೂಲಕ ಕೂಲಿಯಿಂದ ಇಂತಿಷ್ಟು ಹಣ ಮತ್ತು ಸಾಮಗ್ರಿ ವೆಚ್ಚ ನೀಡಲಾಗುತ್ತಿದೆ. ಆದರೆ, ಇದಕ್ಕಾಗಿ ವರ್ಷಾನುಗಟ್ಟಲೆ ಕಾಯುವ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ರೈತರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಕೆಲಸ ಮುಗಿದ ಕೂಲಿ ಹಣ 2 ರಿಂದ 3 ತಿಂಗಳಿನಲ್ಲಿ ಕೂಲಿ ಹಣ ಕೈ ಸೇರಿದರೆ, ಸಾಮಗ್ರಿಗಳ ಹಣಕ್ಕೆ ಕಾಯುವಂತ ಪರಿಸ್ಥಿತಿ ಇದೆ. ಸಾಮಗ್ರಿ ಹಣವು ಸಪ್ಲೆ ಬಿಲ್ ಮೂಲಕ ನೀಡಲಾಗುತ್ತಿರುವುದರಿಂದ ಸರ್ಕಾರದಿಂದ ಬಿಡುಗಡೆಯಾಗಿಲ್ಲ ಎಂದು ರೈತರು ಆರೋಪಿಸುತ್ತಿದ್ದಾರೆ.
