ದಶಕದಲ್ಲಿ 16 ಸಾವು
2013ರಿಂದ 2023ರ ತನಕ ನಂತೂರು ವೃತ್ತದಲ್ಲಿ ನಡೆದ ಅಪಘಾತದಲ್ಲಿ 16 ಮಂದಿ ಸಾವನ್ನಪ್ಪಿದ್ದಾರೆ. 80 ಕ್ಕಿಂತಲೂ ಅಧಿಕ ಮಂದಿ ಗಾಯಗೊಂಡಿದ್ದಾರೆ. 2014ರಲ್ಲಿ ಲಾರಿ -ಬಸ್ ನಡುವಿನ ಅಪಘಾತದಲ್ಲಿ ಕೆಪಿಟಿ ವಿದ್ಯಾರ್ಥಿ ಉಮಾನಾಥ ಮತ್ತು ಬಸ್ ಕ್ಲೀನರ್ ಗಣೇಶ್ ಮೃತಪಟ್ಟಿದ್ದರು. 2015 ಫೆ.27ರಂದು ನಡೆದ ಲಾರಿ, ಕಾರು, ಬೈಕ್ ಸರಣಿ ಅಪಘಾತದಲ್ಲಿ ಪಣಂಬೂರು ಶಾಲಾ ಶಿಕ್ಷಕಿ ವೀಣಾ, ಇವರ ಪುತ್ರ ನಿತಿನ್ ಹಾಗೂ ಬೈಕ್ ಸವಾರ ಪ್ರೀತಂ ಪಿಂಟೊ ಮೃತಪಟ್ಟಿದ್ದರು. ಮೂವರು ಗಂಭೀರ ಗಾಯಗೊಂಡಿದ್ದರು. 2016ರಲ್ಲಿ ಸೇಂಟ್ ಆಗ್ನೆಸ್ ಕಾಲೇಜು ಉಪನ್ಯಾಸಕಿ ಜೋಯ್ಲಿನ್ ಲೋಬೊ ಬಸ್ನಡಿ ಬಿದ್ದು ಮೃತಪಟ್ಟಿದ್ದರು. 2017ರಲ್ಲಿ ನಗರದ ಕಾಲೇಜೊಂದರ ವಿದ್ಯಾರ್ಥಿನಿ ಬಿಂದು, 2021ರಲ್ಲಿ ನರ್ಸಿಂಗ್ ವಿದ್ಯಾರ್ಥಿನಿ ಮಾನಸ ರಮಾನಾಥ ಹಿಟ್ ಆ್ಯಂಡ್ ರನ್ ಆಗಿ, 2022ರಲ್ಲಿ ಬಸ್ ಹಿಂದಿನಿಂದ ಡಿಕ್ಕಿಯಾಗಿ ಸ್ಕೂಟರ್ ಸವಾರ ವಿಶ್ವನಾಥ ಆಳ್ವ ಎಂಬವರು ಮೃತಪಟ್ಟಿದ್ದರು. ಶನಿವಾರ ಮತ್ತೆ ಇಬ್ಬರು ಬಲಿಯಾಗಿರುವುದು ದುರಂತ. ನಂತೂರು ವೃತ್ತದಲ್ಲಿ ಓವರ್ಪಾಸ್ ನಿರ್ಮಾಣಕ್ಕೆ ಕೇಂದ್ರ ಭೂ ಸಾರಿಗೆ ಸಚಿವಾಲಯದಿಂದ ಅನುಮೋದನೆ ಲಭಿಸಿ, ಟೆಂಡರ್ ಕೂಡ ಆಗಿದೆ. ಕಂಪೆನಿಯವರು ಒಪ್ಪಂದ ಪತ್ರ ನೀಡಬೇಕಾಗಿದೆ. ಈ ಪ್ರಕ್ರಿಯೆ ನಡೆದು ಶೀಘ್ರದಲ್ಲೇ ಕಾಮಗಾರಿ ಆರಂಭಗೊಳ್ಳಲಿದೆ. ಆದರೆ ಅಷ್ಟರಲ್ಲಿ ಮಳೆಗಾಲ ಆರಂಭವಾದರೆ ಮತ್ತೆ ವಿಳಂಬವಾಗುವ ಸಾಧ್ಯತೆ ಇದೆ.
ಲಿಂಗೇ ಗೌಡ
ಯೋಜನಾ ನಿರ್ದೇಶಕ
ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ
