ತಂತ್ರಜ್ಞಾನದ ಮೇಲೆ ವೃದ್ಧಗರ್ಗನ ಹಸ್ತಪ್ರತಿ ಬೆಳಕು: ಸಂಸ್ಕೃತ ವಿದ್ವಾಂಸ ವಾರಿಜ ಅಡಿಗ ಅಭಿಮತ

ಬೆಂಗಳೂರು: ಕ್ರಿ.ಪೂ. 500ರಲ್ಲಿ ಬರೆಯಲಾಗಿದೆ ಎಂದು ನಂಬಲಾದ ವೃದ್ಧಗರ್ಗನ ವಾಸ್ತುವಿದ್ಯಾ ಹಸ್ತಪ್ರತಿಯ ವೈಜ್ಞಾನಿಕ ಅಧ್ಯಯನದಿಂದ ಪ್ರಾಚಿನ ಕಾಲದ ನಗರ ವಿನ್ಯಾಸ ಮತ್ತು ಅದಕ್ಕೆ ಸಂಬಂಧಿಸಿದ ತಂತ್ರಜ್ಞಾನ ಕುರಿತು ಹೊಸ ವಿಷಯಗಳನ್ನು ತಿಳಿಯಲು ಸಾಧ್ಯವಾಗುತ್ತಿದೆ ಎಂದು ಸಂಸ್ಕೃತ ವಿದ್ವಾಂಸ ವಾರಿಜ ಅಡಿಗ ಹೇಳಿದ್ದಾರೆ.

ಮಿಥಿಕ್​ ಸೊಸೈಟಿ ಭಾನುವಾರ ಆಯೋಜಿಸಿದ್ದ ಪೊ.ಜಿ.ಎಸ್​. ದೀಕ್ಷಿತ್​ ಸ್ಮಾರಕ ದತ್ತಿ ಉಪನ್ಯಾಸದಲ್ಲಿ "ವೃದ್ಧಗರ್ಗ ವಾಸ್ತುವಿದ್ಯಾ ಗ್ರಂಥ' ವಿಷಯ ಕುರಿತು ಉಪನ್ಯಾಸ ನೀಡಿದರು. ನೇಪಾಳದ ಕಠ್ಮಂಡುವಿನಲ್ಲಿರುವ ವಸ್ತುಸಂಗ್ರಹಾಲಯದಲ್ಲಿ ದೊರೆತ ಅಪ್ರಕಟಿತ ಈ ಹಸ್ತಪ್ರತಿಯನ್ನು ಬೆಂಗಳೂರಿನ ಜೈನ್​ ವಿಶ್ವವಿದ್ಯಾಲಯದ ಪ್ರಾಚಿನ ಇತಿಹಾಸ ಅಧ್ಯಯನ ಕೇಂದ್ರದ ವಿದ್ವಾಂಸರು ಕೂಲಂಕಷವಾಗಿ ಪರಿಶೀಲಿಸಿದ್ದಾರೆ. ಈ ಹಸ್ತಪ್ರತಿಯಲ್ಲಿ ಸಂಸ್ಕೃತ ಹಾಗೂ ನೇಪಾಳದ ಭಿಜುಮೋಲ್​ ಭಾಷೆಯಲ್ಲಿ 34 ಅಧ್ಯಾಯಗಳು ಹಾಗೂ 930ಕ್ಕೂ ಹೆಚ್ಚು ಶ್ಲೋಕಗಳನ್ನು ಬರೆಯಲಾಗಿದೆ ಎಂದು ತಿಳಿಸಿದರು.

ನಗರ ನಿರ್ಮಾಣದ ಉಸ್ತುವಾರಿ ವಹಿಸಿದ್ದ ಸ್ಥಪತಿಯು ಕಟ್ಟಡ ನಿರ್ಮಾಣಕ್ಕೂ ಮುನ್ನ ಕೂಲಂಕಷವಾಗಿ ನಿವೇಶನದ ಭೂಮಿ ಪರೀಕ್ಷೆ ನಡೆಸುತ್ತಿದ್ದರು ಎಂದು ಗ್ರಂಥದಲ್ಲಿ ವಿವರಿಸಲಾಗಿದೆ. ಈ ಹಸ್ತಪ್ರತಿಯ ಮತ್ತಷ್ಟು ವೈಜ್ಞಾನಿಕ ವಿಶ್ಲೇಷಣೆಯಿಂದ ಭಾರತೀಯರು ಕಟ್ಟಡ ವಿಜ್ಞಾನ ತಂತ್ರಜ್ಞಾನ ಕುರಿತಂತೆ ನೀಡಿದ ವಿಶೇಷ ಕೊಡುಗೆಗಳ ಬಗ್ಗೆ ಮತ್ತಷ್ಟು ಹೊಸಬೆಳಕನ್ನು ಚೆಲ್ಲಬಹುದು ಎಂದು ಅಭಿಪ್ರಾಯಪಟ್ಟರು.

ಭಾರತೀಯ ಅಧ್ಯಯನಕ್ಕೆ ಸಂಬಂಧಿಸಿದಂತೆ ಹೊಸ ಚಿಂತನೆಯ ಅವಶ್ಯಕತೆ ಇದೆ ಎಂದು ಮಿಥಿಕ್​ ಸೊಸೈಟಿ ಉಪಾಧ್ಯೆ ಡಾ.ವಿ. ಅನುರಾಧಾ ಹೇಳಿದರು. ಪೊ.ಆರ್​.ಎನ್​. ಅಯ್ಯಂಗಾರ್​, ಮಿಥಿಕ್​ ಸೊಸೈಟಿಯ ಗೌರವ ಕಾರ್ಯದರ್ಶಿ ಎಸ್​. ರವಿ, ಆಡಳಿತ ಮಂಡಳಿಯ ಸದಸ್ಯ ಎಂ.ಆರ್​. ಪ್ರಸನ್ನಕುಮಾರ್​ ಮತ್ತಿತರರಿದ್ದರು.

https://www.vijayavani.net/union-minister-a-narayana-swamy-said-implementation-of-internal-reservation-is-possible-even-without-a-court-order