ಬರಹದಿಂದ ಸುಸಂಸ್ಕೃತ ಸಮಾಜ ನಿರ್ಮಾಣ ಸಾಧ್ಯ: ಡಾ.ಕೃಷ್ಣಮೂರ್ತಿ ಹನೂರು

ನಗರದ ಕೇಂದ್ರ ಸಾರ್ವಜನಿಕ ಗ್ರಂಥಾಲಯದಲ್ಲಿ ಹಮ್ಮಿಕೊಂಡಿದ್ದ ‘ಅಲ್ಕೆಬುಲಾನಾದ ಹೃದಯದಿಂದ’ ಪುಸ್ತಕವನ್ನು ಸಾಹಿತಿ ಡಾ.ಕೃಷ್ಣಮೂರ್ತಿ ಹನೂರು ಬಿಡುಗಡೆಗೊಳಿಸಿದರು. ಚೆನ್ನಬಸವಣ್ಣ, ಡಾ.ಡಿ.ಸಿ. ರಾಜಪ್ಪ, ಅಭಿರುಚಿ ಗಣೇಶ್,ಮಂಜುನಾಥ ಇನ್ನಿತರರಿದ್ದರು

Published on:

18 Aug 2026, 3:52 pm

ಪ್ರಮುಖ ಮುಖ್ಯಾಂಶಗಳು

ಅಲ್ಕೆಬುಲಾನಾದ ಹೃದಯದಿಂದ ಪುಸ್ತಕ ಬಿಡುಗಡೆ
ಪೊಲೀಸರು ಬರೆದರೆ ಬದುಕಿನ ಬಹಳ ದೊಡ್ಡ ಸತ್ಯವನ್ನು ಹೇಳಿದಂತೆ ಆಗುತ್ತದೆ.
ಸುಸಂಸ್ಕೃತ ಸಮಾಜ ನಿರ್ಮಾಣ ಸಾಧ್ಯ
. ಕುವೆಂಪು, ದ.ರಾ. ಬೇಂದ್ರೆ, ಕಾರಂತರಂತಹ ಲೇಖಕರನ್ನು ವರ್ತಮಾನದಲ್ಲಿ ಕಾಣುತ್ತಿಲ್ಲ.
ಉತ್ತಮ ಕೃತಿಗಳೂ ಬರುತ್ತಿಲ್ಲ

ಮೈಸೂರು:

ಪೊಲೀಸರು, ವೈದ್ಯರು ಸೇರಿ ಎಲ್ಲ ಕ್ಷೇತ್ರಗಳ ಜನರು ಬರೆಯಬೇಕು ಎಂದು ಸಾಹಿತಿ ಡಾ.ಕೃಷ್ಣಮೂರ್ತಿ ಹನೂರು ಹೇಳಿದರು.

ಅಭಿರುಚಿ ಪ್ರಕಾಶನದ ವತಿಯಿಂದ ಕೇಂದ್ರ ಸಾರ್ವಜನಿಕ ಗ್ರಂಥಾಲಯದಲ್ಲಿ ಶುಕ್ರವಾರ ಸಂಜೆ ಹಮ್ಮಿಕೊಂಡಿದ್ದ ‘ಅಲ್ಕೆಬುಲಾನಾದ ಹೃದಯದಿಂದ’ ಪುಸ್ತಕ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ವಿವಿಧ ಕ್ಷೇತ್ರಗಳ ಲೇಖಕರ ಅನುಭವ ಮೇಲ್ಪಂಕ್ತಿಯದ್ದು. ಆಯಾಯ ಕ್ಷೇತ್ರಗಳವರು ಬರೆದಾಗ ಪೂರ್ಣ ಅನುಭವ ಇರುತ್ತದೆ. ಪೊಲೀಸರು ಬರೆದರೆ ಬದುಕಿನ ಬಹಳ ದೊಡ್ಡ ಸತ್ಯವನ್ನು ಹೇಳಿದಂತೆ ಆಗುತ್ತದೆ. ಇದರಿಂದ ಸುಸಂಸ್ಕೃತ ಸಮಾಜ ನಿರ್ಮಾಣ ಸಾಧ್ಯವಿದೆ ಎಂದು ಹೇಳಿದರು.

ಕನ್ನಡದ ಕಾವ್ಯ ಭಾಷಾಂತರ ಕಷ್ಟ. ಅದು ಕನ್ನಡದ ಘನತೆ ಮತ್ತು ಇಂಗ್ಲಿಷ್‌ನ ದೌರ್ಬಲ್ಯವೂ ಹೌದು. ಕುವೆಂಪು, ದ.ರಾ. ಬೇಂದ್ರೆ, ಕಾರಂತರಂತಹ ಲೇಖಕರನ್ನು ವರ್ತಮಾನದಲ್ಲಿ ಕಾಣುತ್ತಿಲ್ಲ. ಉತ್ತಮ ಕೃತಿಗಳೂ ಬರುತ್ತಿಲ್ಲ ಎಂದು ವಿಷಾದಿಸಿದರು.

ಅಧಿಕಾರಕ್ಕೆ ಕೊನೇ ಬರಬಹುದು. ಅಕ್ಷರಕ್ಕೆ ಅಳಿವಿಲ್ಲ. 2500 ವರ್ಷಗಳ ಹಿಂದೆ ವ್ಯಾಸ, ಮಹರ್ಷಿ ವಾಲ್ಮೀಕಿ ಬರೆದ ಮಹಾಕಾವ್ಯಗಳು ನಮ್ಮ ಕಣ್ಣ ಮುಂದಿವೆ. ನೆಲ-ಜಲ, ಬೆಟ್ಟ-ಗುಡ್ಡಗಳಿಗೆ ಹೆಸರಿಟ್ಟಿದ್ದೇವೆ. ಎಲ್ಲದರ ಮೇಲೆ ಪರಿಣಾಮ ಬೀರಿವೆ. ಹಾಗಾಗಿಯೇ ಗದಗಿನ ಕೋಳಿವಾಡದ ಕುಮಾರವ್ಯಾಸನ ಕಾವ್ಯವನ್ನು ಹಾರ್ವರ್ಡ್ ವಿವಿ ಪ್ರಕಟಿಸುತ್ತಿದೆ ಎಂದರು.

ಪೊಲೀಸ್ ಅಧಿಕಾರಿಯಾದ ಚನ್ನಬಸವಣ್ಣನವರು ದಕ್ಷಿಣಾ ಸುಡಾನಿನ ಅನುಭವವನ್ನು ಹೃದಯದಿಂದ ಬರೆದಿದ್ದಾರೆ. ಕನ್ನಡ ಸಾಹಿತ್ಯದಲ್ಲಿ ಪ್ರವಾಸ ಕಥನಗಳಿವೆ. ಅವುಗಳು ಮನರಂಜನೆಯಿಂದ ಕೂಡಿವೆ. ಆದರೆ, ಚನ್ನಬಸವಣ್ಣನವರ ಆಫ್ರಿಕಾದ ಅನುಭವ ಕಥನ ಭಯಾನಕ ಮತ್ತು ರೋಚಕತೆಯಿಂದ ಕೂಡಿದೆ. ಸಮಸ್ಯೆಯನ್ನು ಆಹ್ವಾನಿಸಿಕೊಂಡು ಕರ್ತವ್ಯ ನಿರ್ವಹಿಸಿ ಆ ಅನುಭವವನ್ನು ದಾಖಲು ಮಾಡಿರುವುದು ಕನ್ನಡದ ಹೆಮ್ಮೆ ಎಂದು ತಿಳಿಸಿದರು.

ಕೃತಿಯ ಲೇಖಕ ಚೆನ್ನಬಸವಣ್ಣ ಮಾತನಾಡಿ, ವಿಶ್ವಸಂಸ್ಥೆಯ ಶಾಂತಿ ಪಾಲನಾ ಪಡೆಯ ಅಧಿಕಾರಿಯಾಗಿ ವಿಭಿನ್ನವಾದ ಅನುಭವ ನಾನು ಪಡೆದುಕೊಂಡೆ. ಅನುಭವ ಗಂಭೀರವಾಗಿದ್ದರೂ ನೆನಪಿನ ಅಂಚಿಗೆ ಸರಿಯುತ್ತದೆ. ಕೃತಿಯಾದಾಗ ಇತಿಹಾಸದ ಭಾಗವಾಗುತ್ತದೆ. ಈ ಆಶಯದಲ್ಲಿ ಕೃತಿ ರೂಪುಗೊಂಡಿತು ಎಂದರು.

ದಕ್ಷಿಣಾ ಸುಡಾನ್ ಜಗತ್ತಿನ ಅತ್ಯಂತ ಕಿರಿಯ ದೇಶ. ಈಗ ಅದರ ವಯಸ್ಸು 15 ವರ್ಷ. ಸುದೀರ್ಘ 36 ವರ್ಷಗಳ ಬಳಿಕ 2011ರಲ್ಲಿ ಸ್ಥಾಪನೆಯಾಯಿತು. ವಿಶ್ವದ ಬೇರೆ ಬೇರೆ ಕಡೆಗಳಿಂದ ಬಂದ 39 ದೇಶಗಳ ಪೊಲೀಸ್ ಅಧಿಕಾರಿಗಳು ಆಫ್ರಿಕಾದ ನೆಲದಲ್ಲಿ ಮಾನವೀಯ ಮೌಲ್ಯವನ್ನು ಎತ್ತಿ ಹಿಡಿಯುವ ಕೆಲಸ ಮಾಡಿದ್ದರ ಅನುಭವವೇ ಈ ಕೃತಿ. ಅಲ್ಕೆಬುಲಾನ ಎಂದರೆ ಕಪ್ಪುವರ್ಣೀಯರ ನೆಲ ಎಂದರು.

ಒಬ್ಬ ಅಧಿಕಾರಿಯಾಗಿ ನನ್ನ ಅನುಭವವನ್ನು ತನಿಖಾಧಿಕಾರಿಯಂತೆ ಬರೆದಿದ್ದೇನೆ. ಕನ್ನಡದ ಸಹೃದಯ ಓದುಗರು ನ್ಯಾಯಾಧೀಶರಾಗಿ ಪರಾಮರ್ಶೆ ಮಾಡಿ ಅಭಿಪ್ರಾಯ ತಿಳಿಸಿದರೆ ನನ್ನ ಕೆಲಸ ಸಾರ್ಥಕವಾಗುತ್ತದೆ ಎಂದರು

ನಿವೃತ್ತ ಡಿಐಜಿಪಿ ಡಾ.ಡಿ.ಸಿ. ರಾಜಪ್ಪ, ಪ್ರಕಾಶಕ ಅಭಿರುಚಿ ಗಣೇಶ್, ಸಾರ್ವಜನಿಕ ಗ್ರಂಥಾಲಯ ಇಲಾಖೆ ಉಪ ನಿರ್ದೇಶಕ ಮಂಜುನಾಥ ಪಾಲ್ಗೊಂಡಿದ್ದರು

ಮೈಸೂರು