ಕೊಟ್ಟ ಹಣ ಮರಳಿಸಲಾಗದೆ ವೃದ್ಧೆಯನ್ನೇ ಕೊಂದ!

ಕೊಲೆಯಾದ ವೃದ್ಧೆ, ದಿ.ಮೂಡ್ಲಶೆಟ್ಟಿ ಅವರ ಪತ್ನಿ ಗೌರಮ್ಮ (90) ಎಂಬುವರಾಗಿದ್ದು, ಇದೇ ಗ್ರಾಮದ ವೀರಭದ್ರ ಕೊಲೆಗೈದು ಜೈಲು ಪಾಲಾಗಿದ್ದಾನೆ. ಹದಿನೈದು ದಿನಗಳ ಹಿಂದೆ ಕೊಲೆ ಮಾಡಿ ನಾಪತ್ತೆಯಾಗಿದ್ದ ವೀರಭದ್ರ ಶುಕ್ರವಾರ ಮರಳಿ ಊರಿಗೆ ಬಂದಿದ್ದ. ಈ ವೇಳೆ ಪೊಲೀಸರು ಈತನನ್ನು ಬಂಧಿಸಿ ವಿಚಾರಣೆ ನಡೆಸಿದಾಗ ತಾನೇ ಕೊಲೆ ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾನೆ. ನಂತರ ಆರೋಪಿಯನ್ನು ಗ್ರಾಮಕ್ಕೆ ಕರೆತಂದು ಶೌಚಗೃಹದ ಗುಂಡಿಯಲ್ಲಿ ಹೂತಿದ್ದ ಶವವನ್ನು ಹೊರತೆಗೆದು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದಾರೆ.

ಪ್ರಕರಣದ ಹಿನ್ನೆಲೆ: ಗೌರಮ್ಮಳಿಗೆ ಮೂವರು ಮಕ್ಕಳಿದ್ದು, ಪ್ರತ್ಯೇಕವಾಗಿ ವಾಸವಿದ್ದರು. ವೀರಭದ್ರ ಗೌರಮ್ಮಗೆ ತೀರ ಪರಿಚಿತನಾಗಿದ್ದು, ಬಹಳ ವಿಶ್ವಾಸ ಗಳಿಸಿದ್ದ. ಬ್ಯಾಂಕ್ ವ್ಯವಹಾರ, ಇತರ ಸಹಾಯಕ್ಕಾಗಿ ಗೌರಮ್ಮ ವೀರಭದ್ರನನ್ನು ಅವಲಂಬಿಸಿದ್ದರು. ಹದಿನೈದು ದಿನಗಳ ಹಿಂದೆ ಗೌರಮ್ಮ ವೀರಭದ್ರನ ಜತೆ ಬ್ಯಾಂಕ್ ಹೋಗಿ 75 ಸಾವಿರ ರೂ. ಡ್ರಾ ಮಾಡಿದ್ದರು. ಬಳಿಕ ತುರ್ತಾಗಿ ಹಣ ಬೇಕು, ವಾರದ ನಂತರ ಮರಳಿ ಕೊಡುವುದಾಗಿ ಗೌರಮ್ಮ ಬಳಿ ಇದ್ದ 75 ಸಾವಿರ ರೂ.ಗಳನ್ನು ವೀರಭದ್ರ ಪಡೆದುಕೊಂಡಿದ್ದ.

ವಾರ ಮುಗಿದರೂ ಹಣ ವಾಪಸ್ ಕೊಡದೆ ಇದ್ದಾಗ ಗೌರಮ್ಮ ಹಣಕ್ಕಾಗಿ ಪಟ್ಟು ಹಿಡಿದಿದ್ದಾರೆ. ಇದರಿಂದ ಕ್ರೋಧಗೊಂಡ ವೀರಭದ್ರ ರಾತ್ರಿ ಗೌರಮ್ಮ ಮನೆಗೆ ಹೋಗಿ ಕಪಾಳಕ್ಕೆ ಹೊಡೆದು ಉಸಿರುಗಟ್ಟಿಸಿ ಕೊಲೆ ಮಾಡಿ, ಆಕೆಯ ಕೈಯಲ್ಲಿ ಇದ್ದ ಬಂಗಾರದ ಒಡವೆಗಳನ್ನು ದೋಚಿ ಶವವನ್ನು ಮನೆಯ ಹಿಂದೆ ಇರುವ ಶೌಚಗೃಹದ ಗುಂಡಿಗೆ ಹಾಕಿ ಮುಚ್ಚಿದ್ದಾನೆ.

ತಾಯಿ ಗೌರಮ್ಮ ಕಾಣದೇ ಇರುವ ಬಗ್ಗೆ ಮಕ್ಕಳು ಪಟ್ಟಣದ ಪೊಲೀಸ್ ಠಾಣೆಗೆ ದೂರು ನೀಡಿದರು. ಇದೇ ವೇಳೆ ವೀರಭದ್ರ ಕೂಡ ಗ್ರಾಮದಿಂದ ನಾಪತ್ತೆಯಾಗಿದ್ದ. ತನಿಖೆ ಆರಂಭಿಸಿದ ಪೊಲೀಸರು ವೀರಭದ್ರ ಶುಕ್ರವಾರ ಗ್ರಾಮಕ್ಕೆ ಬಂದ ಮಾಹಿತಿ ತಿಳಿದು ಠಾಣೆಗೆ ಕರೆತಂದು ವಿಚಾರಣೆ ನಡೆಸಿದಾಗ ಹಣ ಮರಳಿ ಕೊಡುವುದಕ್ಕೆ ಆಗದ ಕಾರಣ ಗೌರಮ್ಮನನ್ನು ಕೊಲೆಗೈದುದ್ದಾಗಿ ತಿಳಿಸಿದ್ದಾನೆ.

ಸ್ಥಳಕ್ಕೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಮಲ್ಲಿಕಾರ್ಜುನ ಬಾಲದಂಡಿ, ಎಎಸ್‌ಪಿ ಮಲ್ಲಿಕ್, ಡಿವೈಎಸ್‌ಪಿ ಟಿ.ಬಿ. ರಾಜಣ್ಣ ಭೇಟಿ ನೀಡಿ ಸ್ಥಳ ಪರಿಶೀಲನೆ ನಡೆಸಿ, ಪಟ್ಟಣದ ಪೊಲೀಸ್ ಇನ್ಸ್‌ಪೆಕ್ಟರ್ ಶಿವಪ್ರಕಾಶ್‌ರಿಂದ ಮಾಹಿತಿ ಪಡೆದುಕೊಂಡಿದ್ದಾರೆ.