ದೇಶ ಶಕ್ತಿಯುತವಾಗಿ ಬೆಳೆಯದಿದ್ದರೆ ಅಪಾಯ ಹೆಚ್ಚು: ರಕ್ಷಣಾ ಮತ್ತು ಬಾಹ್ಯಾಕಾಶ ವಿಶ್ಲೇಷಕ ಗಿರೀಶ್ ಲಿಂಗಣ್ಣ

ಮೈಸೂರು ವಿಶ್ವವಿದ್ಯಾಲಯದ ಪ್ರಸಾರಾಂಗ,ಸಿದ್ಧಾರ್ಥ ನಗರದ ಟೆರಿಷಿಯನ್ ಕಾಲೇಜಿನ ಕನ್ನಡ ವಿಭಾಗದಿಂದ ಟೆರಿಷಿಯನ್ ಕಾಲೇಜಿನ ಸಭಾಂಗಣದಲ್ಲಿ ಆಯೋಜಿಸಿದ್ದ ಪ್ರಚಾರೋಪನ್ಯಾಸ ಕಾರ್ಯಕ್ರಮದಲ್ಲಿ ಅವರು ಕ್ಷಿಪಣಿಗಳ ಇತಿಹಾಸ ಕುರಿತು ಮಾತನಾಡಿದರು.

ಹಿಂದೆ ಯುದ್ಧ ಮಾಡಲು ಮದ್ದು ಗುಂಡು ಬೇಕಿತ್ತು. ಆದರೆ ಇತೀಚಿನ ದಿನಗಳಲ್ಲಿ ತಂತ್ರಜ್ಞಾನ ಮುಂದುವರಿದಿದ್ದು, ಸೈಬರ್ ದಾಳಿ ನಡೆಸುತ್ತಿವೆ. ಕ್ಷಿಪಣಿ ಎಂದರೆ ಸ್ವಯಂ ಚಾಲಿತವಾಗಿ ನಿಖರವಾದ ಗುರಿಯನ್ನು ತಲುಪುವ ಸಾಧನ ವಾಗಿದೆ ಎಂದರು.

ಕ್ಷಿಪಣಿಗಳಲ್ಲಿ ಪ್ರಮುಖವಾಗಿ ಬ್ಯಾಲಿಸ್ಟಿಕ್ ಕ್ಷಿಪಣಿಗಳು, ಕ್ರೂಸ್ ಕ್ಷಿಪಣಿಗಳು, ಗಾಳಿ-ಗಾಳಿ ಕ್ಷಿಪಣಿಗಳು, ಗಾಳಿ-ನೆಲೆಗೆ ಕ್ಷಿಪಣಿಗಳು, ಭೂಮಿಯಿಂದ-ಗಾಳಿಗೆ ಕ್ಷಿಪಣಿಗಳು, ಹೈಪರ್ ಸಾನಿಕ್ ಕ್ಷಿಪಣಿ ಸೇರಿದಂತೆ ಇನ್ನಿತರ ಕ್ಷಿಪಣಿಗಳು ಅಭಿವೃದ್ಧಿಗೊಂಡಿವೆ ಎಂದು ಮಾಹಿತಿ ನೀಡಿದರು.

ರಾಕೆಟ್ ಮತ್ತು ಮಿಸೈಲ್ (ಕ್ಷಿಪಣಿ) ನಡುವಿನ ಮುಖ್ಯ ವ್ಯತ್ಯಾಸವೆಂದರೆ ಮಾರ್ಗದರ್ಶನ ವ್ಯವಸ್ಥೆ ರಾಕೆಟ್‌ಗಳು ಸಾಮಾನ್ಯವಾಗಿ ಗುರಿ ಇಲ್ಲದೆ ಉಡಾಯಿಸುವ ಸಾಧನಗಳಾಗಿವೆ. ಆದರೆ ಕ್ಷಿಪಣಿಯು ಗುರಿಯನ್ನು ತಲುಪಿಸಲು ಆಂತರಿಕ ಮಾರ್ಗದರ್ಶನ ವ್ಯವಸ್ಥೆಯನ್ನು ಹೊಂದಿರುವ ಶಸ್ತ್ರಾಸ್ತ್ರವಾಗಿದೆ ಎಂದು ವಿಶ್ಲೇಷಿಸಿದರು.

ಪ್ರಸಾರಾಂಗದ ನಿರ್ದೇಶಕ ಪ್ರೊ.ಎಂ. ನಂಜಯ್ಯ ಹೊಂಗನೂರು ಮಾತನಾಡಿ, ವಿದ್ಯಾರ್ಥಿಗಳು ಮೂಢನಂಬಿಕೆಯನ್ನು ಬಿಟ್ಟು ವಿಜ್ಞಾನದ ಕಡೆ ವಿದ್ಯಾರ್ಥಿಗಳು ಮುಖ ಮಾಡಬೇಕಿದೆ. ಮೊಬೈಲ್ ಬಂದ ಮೇಲೆ ವಿದ್ಯಾರ್ಥಿಗಳು ಪುಸ್ತಕದ ಕಡೆ ಮುಖ ಮಾಡುತ್ತಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.

ವಿಜ್ಞಾನಿಯಾಗಿ ಗಿರೀಶ್ ಲಿಂಗಣ್ಣ ಅವರು 600ಕ್ಕೂ ಹೆಚ್ಚು ಲೇಖನಗಳನ್ನು ಬರೆದಿದ್ದಾರೆ. ಇದು ಹೆಮ್ಮೆಯ ಸಂಗತಿ. ಈ ಕಾರ್ಯ ಮುಂದುವರಿಯಬೇಕು. ವಿದ್ಯಾರ್ಥಿಗಲು ಹೊಸ ಆವಿಷ್ಕಾರಗಳ ಕಡೆ ಗಮನ ನೀಡಬೇಕು ಎಂದರು.

ಕಾಲೇಜಿನ ಪ್ರಾಂಶುಪಾಲೆ ರೆವರೆಂಡ್ ಸಿಸ್ಟರ್ ಡಾ. ರೋಹಿಣಿ, ಕನ್ನಡ ವಿಭಾಗದ ಡಾ.ಸಿ.ಸಿ ವೆಂಕಟೇಶ್, ಸಂಯೋಜಕ ವಿವೇಕ್‌ಚಾರ್ಲ್ಸ್ ಮತ್ತಿತರು ಇದ್ದರು.