ಕೊಂಚ ದೂರವಾದ ಅಪೌಷ್ಟಿಕ ಸಮಸ್ಯೆ

ಅಂಗನವಾಡಿ ಮಕ್ಕಳು

Published on:

12 Sep 2026, 10:35 am

ಪ್ರಮುಖ ಮುಖ್ಯಾಂಶಗಳು

3 ವರ್ಷದಲ್ಲಿ 692ರಿಂದ 142ಕ್ಕೆ ಇಳಿಕೆ
ವರ್ಷಕ್ಕೆ 76 ಕೋಟಿ ರೂ. ವ್ಯಯ
ಮಕ್ಕಳಿಗೆ ಪೂರಕ ಪೌಷ್ಟಿಕ ಆಹಾರ ವಿತರಣೆ

ಮಂಜುನಾಥ ತಿಮ್ಮಯ್ಯ ಭೋವಿ ಮೈಸೂರು

ಆರೋಗ್ಯ, ಶಿಕ್ಷಣ, ಸಮಾಜದ ಮೇಲೆ ಪರಿಣಾಮ ಬೀರುವ ಮಕ್ಕಳ ಅಪೌಷ್ಟಿಕತೆಯ ಸಮಸ್ಯೆ ಜಿಲ್ಲೆಯಲ್ಲಿ ಸಂಪೂರ್ಣವಾಗಿ ನಿರ್ಮೂಲನೆಯಾಗಿಲ್ಲ. ಆದರೆ, ಸರ್ಕಾರದ ಪೌಷ್ಟಿಕ ಕಾರ್ಯಕ್ರಮಗಳ ಪರಿಣಾಮ ಅಪೌಷ್ಟಿಕ ಪ್ರಕರಣಗಳ ಸಂಖ್ಯೆ ನಿಯಂತ್ರಣಕ್ಕೆ ಬಂದಿದ್ದು, ವರ್ಷದಿಂದ ವರ್ಷಕ್ಕೆ ಇಂತಹ ಮಕ್ಕಳ ಸಂಖ್ಯೆ ಕಡಿಮೆಯಾಗುತ್ತಿರುವುದು ಆಶಾದಾಯಕ ಬೆಳವಣಿಗೆ...!

ಅಪೌಷ್ಟಿಕತೆ ಒಂದು ಮಗುವಿನ ಸಮಸ್ಯೆ ಮಾತ್ರವಲ್ಲ, ಅದು ಮುಂದಿನ ಪೀಳಿಗೆಯ ಆರೋಗ್ಯ, ಶಿಕ್ಷಣ ಮತ್ತು ಸಮಾಜದ ಆರ್ಥಿಕ ಅಭಿವೃದ್ಧಿಗೆ ಸಂಬಂಧಿಸಿದ ಸಮಸ್ಯೆ. ಪೌಷ್ಟಿಕ ಆಹಾರ, ತಾಯಂದಿರ ಅರಿವು, ಆರೋಗ್ಯ ತಪಾಸಣೆ, ಪೌಷ್ಟಿಕ ಕಾರ್ಯಕ್ರಮಗಳು ಮುಖ್ಯ. ಇಂತಹ ಪ್ರಯತ್ನದ ಫಲವಾಗಿ ಜಿಲ್ಲೆಯಲ್ಲಿ ತೀವ್ರ ಅಪೌಷ್ಟಿಕ ಮಕ್ಕಳ ಸಂಖ್ಯೆ ತಗ್ಗುತ್ತಿದೆ. ಕಳೆದ ಮೂರು ವರ್ಷದಲ್ಲಿ ಇದು ಶೇ.0.36 ಇಳಿಕೆಯಾಗಿದೆ.

ಎಸ್‌ಎಎಂ ಮಕ್ಕಳ ಸಂಖ್ಯೆಯಲ್ಲಿ ಇಳಿಕೆ:

2023-24ರಲ್ಲಿ ತೀವ್ರ ಅಪೌಷ್ಟಿಕ(ಎಸ್‌ಎಎಂ) ಮಕ್ಕಳ ಸಂಖ್ಯೆ 692 ಆಗಿತ್ತು. ಅಂಗನಾಡಿಯಲ್ಲಿರುವ ಒಟ್ಟಾರೆ ಮಕ್ಕಳಲ್ಲಿ ಇದರ ಪ್ರಮಾಣ ಶೇ.0.67 ಆಗಿತ್ತು. ಈ ಪ್ರಮಾಣ 2024-25ರಲ್ಲಿ 275ಕ್ಕೆ ಇಳಿಕೆಯಾಯಿತು. 2025-26ರಲ್ಲಿ 207ಕ್ಕೆ ತಗ್ಗಿತು. ಪ್ರಸಕ್ತ ಸಾಲಿನಲ್ಲಿ ಆಗಸ್ಟ್‌ವರೆಗೆ ಈ ಸಂಖ್ಯೆ 142ಕ್ಕೆ ಕುಸಿದಿದೆ. ಆದರೆ, ಈಗಲೂ ಶೇ.0.13 ಮಕ್ಕಳು ಈ ಸಮಸ್ಯೆಯಿಂದ ಬಳಲುತ್ತಿದ್ದಾರೆ.

ಕಳೆದ ಮೂರು ವರ್ಷದಲ್ಲಿ ಈ ಮಕ್ಕಳ ಸಂಖ್ಯೆ ಹುಣಸೂರು ತಾಲೂಕಿನಲ್ಲಿ 153ರಿಂದ 19ಕ್ಕೆ, ಮೈಸೂರು ನಗರದಲ್ಲಿ 115ರಿಂದ 23ಕ್ಕೆ, ಬಿಳಿಗೆರೆಯಲ್ಲಿ 89ರಿಂದ 13ಕ್ಕೆ, ತಿ.ನರಸೀಪುರದಲ್ಲಿ 96ರಿಂದ 20, ಎಚ್.ಡಿ.ಕೋಟೆಯಲ್ಲಿ 64ರಿಂದ 10ಕ್ಕೆ ಇಳಿಕೆಯಾಗಿದೆ. ಜಿಲ್ಲೆಯ ಎಲ್ಲ ತಾಲೂಕಿನಲ್ಲಿ ಈ ಸಂಖ್ಯೆ 10ರಿಂದ 24ರ ಒಳಗೆ ಇದೆ.

ಮೈಸೂರು ನಗರದಲ್ಲಿ 23, ನಂಜನಗೂಡಿನಲ್ಲಿ 23, ತಿ.ನರಸೀಪುರದಲ್ಲಿ 20, ಹುಣಸೂರಿಲ್ಲಿ 19 ಅಪೌಷ್ಟಿಕ ಮಕ್ಕಳಿದ್ದಾರೆ. ಉಳಿದಂತೆ ಎಚ್.ಡಿ.ಕೋಟೆಯಲ್ಲಿ 10, ಕೆ.ಆರ್.ನಗರದಲ್ಲಿ 13, ಮೈಸೂರು ಗ್ರಾಮಾಂತರದಲ್ಲಿ 10, ಪಿರಿಯಾಪಟ್ಟಣದಲ್ಲಿ 10 ಅಪೌಷ್ಟಿಕ ಮಕ್ಕಳಿದ್ದಾರೆ. ಸದ್ಯಕ್ಕೆ ಪುನರ್ವಸತಿ ಸೇವೆಗಳ ಅವಶ್ಯ ಇರುವ ಮತ್ತು ಸೇವೆ ಒದಗಿಸಲಾದ ಅಪೌಷ್ಟಿಕ ಮಕ್ಕಳ ಸಂಖ್ಯೆ 7ರಷ್ಟಿದೆ.

ಬುಡಕಟ್ಟು ಮಕ್ಕಳೇ ಹೆಚ್ಚು:

ಎಚ್.ಡಿ.ಕೋಟೆ, ಹುಣಸೂರು ತಾಲೂಕಿನ ಕಾಡಂಚಿನಲ್ಲಿರುವ ಬುಡಕಟ್ಟು ಸಮುದಾಯದ ಹೆಚ್ಚಿನ ಮಕ್ಕಳು ಅಪೌಷ್ಟಿಕತೆಗೆ ತುತ್ತಾಗುತ್ತಿದ್ದು, ಈ ಭಾಗದಲ್ಲಿರುವ ಅಂಗನವಾಡಿ, ಆಶ್ರಮ ಶಾಲೆಯಲ್ಲಿ ದಾಖಲಾಗಿರುವ ಈ ಮಕ್ಕಳಲ್ಲಿ ಇದು ಕಾಣಿಸಿಕೊಂಡಿದೆ. ಉಳಿದಂತೆ ಜಿಲ್ಲೆಯ ವಿವಿಧ ಭಾಗದಲ್ಲೂ ಅಪೌಷ್ಟಿಕ ಮಕ್ಕಳಿದ್ದಾರೆ.

ಪೂರಕ ಪೌಷ್ಟಿಕ ಆಹಾರ ವಿತರಣೆ:

ಮಕ್ಕಳಿನಲ್ಲಿ ಅಪೌಷ್ಟಿಕತೆ ಸಮಸ್ಯೆಯನ್ನು ಗಂಭೀರವಾಗಿ ಪರಿಗಣಿಸಬೇಕಿದ್ದು, ಈ ನಿಟ್ಟಿನಲ್ಲಿ ಪರಿಣಾಮಕಾರಿ ಕ್ರಮ ವಹಿಸಲಾಗುತ್ತಿದೆ. ಅಂಗನವಾಡಿ ಕೇಂದ್ರಗಳಲ್ಲಿರುವ ಮಕ್ಕಳಿಗೆ ಪೂರಕ ಪೌಷ್ಟಿಕ ಆಹಾರ ನೀಡುವ ಮೂಲಕ ಅಪೌಷ್ಟಿಕತೆ ಕಡಿಮೆ ಮಾಡಲಾಗುತ್ತಿದೆ. 6 ತಿಂಗಳಿಂದ 3 ವರ್ಷದೊಳಗಿ ತೀವ್ರ ಪೌಷ್ಟಿಕ ಮಕ್ಕಳಿಗೆ ಮೊಟ್ಟೆ, ಹಾಲಿನಪುಡಿ, ಸಕ್ಕರೆ ನೀಡಲಾಗುತ್ತಿದೆ. 3 ವರ್ಷದಿಂದ 6 ವರ್ಷದ ಅಪೌಷ್ಟಿಕ ಮಕ್ಕಳಿಗೆ ಬೆಳಗಿನ ಉಪಾಹಾರಕ್ಕೆ ಮಿಲೆಟ್ ಲಾಡು, ಮಧ್ಯಾಹ್ನದ ಬಿಸಿಯೂಟದಲ್ಲಿ ಉಪ್ಪಿಟ್ಟು, ಪಾಯಸ, ಅನ್ನ ಸಾಂಬಾರ್, ಹಾಲು, ಮೊಟ್ಟೆ ಕೊಡಲಾಗುತ್ತದೆ. ಸಾಮಾನ್ಯ ಮಕ್ಕಳು, ಸಾಧಾರಣ ಅಪೌಷ್ಟಿಕ ಮಕ್ಕಳಿಗೂ ಈ ರೀತಿ ಪೌಷ್ಟಿಕ ಆಹಾರ ವಿತರಣೆ ಮಾಡಲಾಗುತ್ತದೆ.

ವರ್ಷಕ್ಕೆ 76 ಕೋಟಿ ರೂ. ವ್ಯಯ:

ಕೇಂದ್ರ ಸರ್ಕಾರದ ಮಾರ್ಗಸೂಚಿಯಂತೆ 300 ದಿನಗಳ ಕಾಲ ಪೂರಕ ಪೌಷ್ಟಿಕ ಆಹಾರ ನೀಡಲಾಗುತ್ತಿದ್ದು, ಇದಕ್ಕಾಗಿ ಪ್ರತಿ ಮಗುವಿಗೆ ನಿತ್ಯ 8 ರೂ., ತೀವ್ರ ಅಪೌಷ್ಟಿಕ ಮಕ್ಕಳಿಗೆ 12 ರೂ. ಖರ್ಚು ಮಾಡಲಾಗುತ್ತಿದೆ. 2025-26ನೇ ಸಾಲಿನಲ್ಲಿ ಪೂರಕ ಪೌಷ್ಟಿಕ ಆಹಾರ ಕಾರ್ಯಕ್ರಮಕ್ಕಾಗಿ ಜಿಲ್ಲೆಯಲ್ಲಿ 46.20 ಕೋಟಿ ರೂ. ಬಿಡುಗಡೆಯಾಗಿದ್ದು, ಅಷ್ಟ್ಟೂ ಹಣ ಖರ್ಚು ಮಾಡಲಾಗಿದೆ. ಕ್ಷೀರಭಾಗ್ಯ, ಸೃಷ್ಟಿ, ಮಾತೃಪೂರ್ಣಯೋಜನೆಯಡಿ ಸಹ ಜಿಲ್ಲೆಗೆ 30.71 ಲಕ್ಷ ರೂ. ಬಿಡುಗಡೆಯಾಗಿದ್ದು, ಅದು ಸಹ ಖರ್ಚು ಮಾಡಲಾಗಿದೆ.

ಇಲಾಖೆಗಳ ನಡುವೆ ಸಮನ್ವ ಕೊರತೆ:

ಈ ಮಕ್ಕಳ ಸಂಖ್ಯೆಯನ್ನು ಉದ್ದೇಶಪೂರ್ವಕವಾಗಿ ಕಡಿಮೆ ಮಾಡಲಾಗಿದ್ದು, ಅವರ ತೂಕ ಮತ್ತು ಎತ್ತರವನ್ನು ಮರೆ ಮಾಚಲಾಗುತ್ತಿದ್ದು, ಇವರನ್ನು ಸಾಮಾನ್ಯ ಮಕ್ಕಳಂತೆ ಬಿಂಬಿಸಲಾಗುತ್ತಿದೆ ಎಂಬ ಅನುಮಾನವೂ ಇದೆ. ಜತೆಗೆ, ಈ ಮಕ್ಕಳ ಪತ್ತೆ, ತಪಾಸಣೆ, ಆರೈಕೆ, ಚಿಕಿತ್ಸೆ ಪ್ರಕ್ರಿಯೆ ಸರಿಯಾಗಿ ನಡೆಯುತ್ತಿಲ್ಲ. ಇದಕ್ಕೆ ಆರೋಗ್ಯ ಇಲಾಖೆ ಹಾಗೂ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ನಡುವಿನ ಸಮನ್ವಯದ ಕೊರತೆಯೇ ಕಾರಣ.

ಅಪೌಷ್ಟಿಕತೆ ಆರಂಭ ಆಗುವುದು ತಾಯಿಯಿಂದ. ಈ ನಿಟ್ಟಿನಲ್ಲಿ ಪ್ರಸವ ನಂತರ ಮಗುವಿನ ಆರೈಕೆಗಿಂತಲೂ ಪ್ರಸವ ಪೂರ್ವ ಆರೈಕೆ ಅಗತ್ಯವಾಗಿದೆ. ಅಪೌಷ್ಟಿಕತೆಯಿಂದ ಬಳಲುತ್ತಿರುವ ಮಕ್ಕಳಿಗೂ ಸೂಕ್ತ ಪೌಷ್ಟಿಕಾಂಶ ದೊರಕುತ್ತಿಲ್ಲ. ಅಲ್ಲದೆ ಅಂತಹವರನ್ನು ಗುರುತಿಸಿ ನಿರಂತರವಾಗಿ ಪೌಷ್ಟಿಕಾಂಶ ಸರಬರಾಜು ಮಾಡುತ್ತಿಲ್ಲ.

ಜತೆಗೆ, ಕೇವಲ ಬೆರಳೆಣಿಕೆಯಷ್ಟೇ ಹೆಣ್ಣು ಮಕ್ಕಳಿಗೆ ಈ ಸೌಲಭ್ಯ ದೊರೆಯುತ್ತಿದೆ. ಉಳಿದವರಿಗೆ ಇಲ್ಲ ಎನ್ನುವಂತಾಗಿದೆ. ಆದ್ದರಿಂದ ಈ ವಿಷಯದಲ್ಲಿ ಎಲ್ಲ ಇಲಾಖೆಗಳು ಸಮನ್ವಯದಿಂದ ಕೆಲಸ ಮಾಡಿದಾಗ ಅಪೌಷ್ಟಿಕ ಮಕ್ಕಳ ಪತ್ತೆ, ಅವರಿಗೆ ಸೂಕ್ತ ಪೌಷ್ಟಿಕ ಆಹಾರ ವಿತರಣೆ, ಆರೈಕೆ, ಚಿಕಿತ್ಸೆ ನೀಡಲು ಅನುಕೂಲವಾಗಲಿದೆ.

ಪುನರ್ವಸತಿ ಕೇಂದ್ರ ಖಾಲಿ

ಅಪೌಷ್ಟಿಕ ಮಕ್ಕಳನ್ನು ಗುರುತಿಸಿ ಅವರಿಗೆ ಪೌಷ್ಟಿಕ ಆಹಾರ ನೀಡಿ ಆರೈಕೆ, ಚಿಕಿತ್ಸೆ ನೀಡುವ ಸಲುವಾಗಿ ರಾಷ್ಟ್ರೀಯ ಆರೋಗ್ಯ ಅಭಿಯಾನದಡಿ ಜಿಲ್ಲಾ ಆಸ್ಪತ್ರೆಯಲ್ಲಿ ನ್ಯೂಟ್ರಿಷನ್ ಪುನರ್ವಸತಿ ಕೇಂದ್ರ(ಎನ್‌ಆರ್‌ಸಿ) ಸ್ಥಾಪಿಸಲಾಗಿದೆ. ಆದರೆ, ಕೆ.ಆರ್.ಆಸ್ಪತ್ರೆಯ ಚೆಲುವಾಂಬ ಮಕ್ಕಳ ಆಸ್ಪತ್ರೆಯಲ್ಲಿ 20 ಹಾಸಿಗೆ, ಜಿಲ್ಲಾಸ್ಪತ್ರೆಯಲ್ಲಿ 5 ಹಾಸಿಗೆ ಕಾಯ್ದಿರಿಸಲಾಗಿದೆ. ಆದರೆ, ಇವುಗಳು ಬಹುತೇಕ ಸಮಯದಲ್ಲಿ ಹಾಸಿಗೆಗಳು ಖಾಲಿ ಹೊಡೆಯುತ್ತಿವೆ.

ಜಿಲ್ಲೆಯಲ್ಲಿ ಅಪೌಷ್ಟಿಕದಿಂದ ಬಳಲುತ್ತಿರುವ ಮಕ್ಕಳ ಸಂಖ್ಯೆ ಕಡಿಮೆಯಾಗುತ್ತಿದೆ. ಪರಿಣಾಮಕಾರಿಯಾಗಿ ಪೂರಕ ಪೌಷ್ಟಿಕ ಆಹಾರ ಕಾರ್ಯಕ್ರಮ ಜಾರಿಗೆ ತರಲಾಗುತ್ತಿದೆ. ಜತೆಗೆ, ಪ್ರತಿ ಗ್ರಾಮದಲ್ಲೂ ಅರಿವು ಮೂಡಿಸಲಾಗುತ್ತಿದೆ. ಅಂಗನವಾಡಿಯಲ್ಲಿರುವ ಮಕ್ಕಳನ್ನು ನಿಯಮಿತಿವಾಗಿ ಪರಿಶೀಲನೆ ಮಾಡಿ ಆ್ಯಪ್‌ನಲ್ಲಿ ನಮೂದಿಸಲಾಗುತ್ತಿದೆ.

ಮಕ್ಕಳು