ಬಾಲಗ್ರಹ ದೋಷ ನಿವಾರಕ ಹುಚ್ಚಪ್ಪ

ತಾಲೂಕಿನ ವರುಣ ವಿಧಾನ ಸಭಾ ಕ್ಷೇತ್ರದಲ್ಲಿರುವ ಪುರಾತನ ಶ್ರೀ ವೆಂಕಟೇಶ್ವರನ ದೇವಾಲಯವು ಬಾಲಗ್ರಹ ನಿವಾರಕ ಹುಚ್ಚಪ್ಪನ ಸನ್ನಿಧಿ ಎಂದೇ ಪ್ರಸಿದ್ದಿ ಪಡೆದಿದೆ.

ದಾಸನೂರು ಗ್ರಾಮದ ಹೃದಯ ಭಾಗದಲ್ಲಿರುವ ಈ ದೇವಾಲವು ಗುಡಿಮನೆ ಪೂರ್ವಜ ವಂಶದವರಿಂದ 300 ವರ್ಷಗಳ ಹಿಂದೆ ಪ್ರತಿಷ್ಠಾಪನೆಗೊಂಡಿದೆ. ಅಂದು ದಟ್ಟ ಅರಣ್ಯ ಪ್ರದೇಶದಲ್ಲಿದ್ದ ಗ್ರಾಮವು ದೈವ ಸನ್ನಿಧಿ ಸ್ಥಾಪನೆ ನಂತರ ಹಲವು ಕುಟುಂಬಗಳಿಗೆ ಆಶ್ರಯ ನೀಡುವ ಗ್ರಾಮವಾಗಿ ಅಭಿವೃದ್ಧಿ ಹೊಂದಿದೆ.

ತಿರುಮಲ ತಿರುಪತಿ ದೇವಾಲಯದ ಕಲ್ಯಾಣಿಯಲ್ಲಿ ಸ್ನಾನ ಮಾಡುವ ಸಂದರ್ಭದಲ್ಲಿ ಗುಡಿಮನೆ ವಂಶಸ್ಥರಿಗೆ ವೆಂಕಟೇಶ್ವರ ಸ್ವಾಮಿಯ ವಿಗ್ರಹ ಸಿಕ್ಕಿದೆ. ಅದನ್ನು ದಾಸನೂರು ಗ್ರಾಮಕ್ಕೆ ತಂದು ಪ್ರತಿಷ್ಠಾಪಿಸಿ, ಗುಡಿ ನಿರ್ಮಿಸಿದರು. ಅಂದಿನಿಂದ ವೆಂಕಟರಮಣ ಸಾವಿರಾರು ಜನರ ಸಂಕಟ ನಿವಾರಕನಾಗಿ ಖ್ಯಾತನಾಗಿದ್ದಾನೆ.

ಅಂದಿನ ಕಾಲದಲ್ಲಿ ಮಕ್ಕಳಿಗೆ ವಾಂತಿ, ಭೇದಿ, ಜ್ವರ, ಬಾಲಗ್ರಹ, ದುಷ್ಟ ಶಕ್ತಿಗಳ ಆವಾಹನೆ ಇತ್ಯಾದಿ ಸಮಸ್ಯೆ ಎದುರಾದರೆ ಮೊದಲು ದೇವರ ತಾಯತ ಕಟ್ಟಿಸುತ್ತಿದ್ದರು. ಇದರಿಂದ ಎಲ್ಲ ಸಮಸ್ಯೆ ನಿವಾರಣೆ ಆಗುತ್ತದೆ ಎಂದು ದೃಢವಾಗಿ ನಂಬಿದ್ದರು. ಈ ನಂಬಿಕೆ ಇಂದಿಗೂ ದುಪ್ಪಟ್ಟಾಗಿದೆ.

ಹೊರರಾಜ್ಯದ ಮಕ್ಕಳ ಆಗಮನ

ಪ್ರಸ್ತುತ ಗುಡಿಮನೆ ಪೂರ್ವಜ ವಂಶದ 6ನೇ ತಲೆಮಾರಿನವರು ದೇವರ ಪೂಜಾ ಕೈಂಕರ್ಯದ ಜವಾಬ್ದಾರಿ ನಿರ್ವಹಣೆ ಮಾಡುತ್ತಿದ್ದಾರೆ. ಕಪ್ಪು ಶಿಲೆಯ ವೆಂಕಟೇಶ್ವರ ಸ್ವಾಮಿ ಮಕ್ಕಳಿಗೆ ಎರಗುವ ಬಾಲಗ್ರಹದ ದೋಷ ನಿವಾರಿಸುತ್ತಾನೆ ಎನ್ನುವ ನಂಬಿಕೆ ಇಂದಿಗೂ ಇದೆ. ಹಾಗಾಗಿ ಈ ದೇವಾಲಯಕ್ಕೆ ರಾಜ್ಯದ ವಿವಿಧ ಭಾಗಗಳಿಂದ ಭಕ್ತರು ಆಗಮಿಸುತ್ತಾರೆ. ಸೋಮವಾರ, ಶುಕ್ರವಾರ ಮತ್ತು ಭಾನುವಾರಗಳಂದು ಕ್ಷೇತ್ರದಲ್ಲಿ ವಿಶೇಷ ಪೂಜಾದಿಗಳು ನೆರವೇರುತ್ತವೆ. ಸಮಸ್ಯೆ ಇದ್ದವರು ದೇಗುಲದಲ್ಲಿ ತಾಯತ ಕಟ್ಟಿಸಿಕೊಳ್ಳುವುದನ್ನು ರೂಢಿಸಿಕೊಂಡಿದ್ದಾರೆ. ಭಕ್ತರು ಆರ್ಥಿಕ ಪರಿಸ್ಥಿತಿ ಅನುಗುಣವಾಗಿ ಬೆಳ್ಳಿ,ತಾಮ್ರ ಅಥವಾ ಹಿತ್ತಾಳೆ ಲೊಹದ ತಾಯತಗಳನ್ನು ಮಕ್ಕಳಿಗೆ ಕಟ್ಟಿಸುತ್ತಾರೆ. ಸಮಸ್ಯೆ ಪರಿಹಾರ ವಾದ ನಂತರ ಅದನ್ನು ವಿಸರ್ಜನೆ ಮಾಡುತ್ತಾರೆ.

ಚಿಕ್ಕ ಮಕ್ಕಳು ಸದೃಢರಾಗಿ ಬೆಳೆಯಬೇಕು ಎಂಬ ಉದ್ದೇಶದಿಂದ ದೇವಾಲಯದ ಆವರಣದಲ್ಲಿ ಕತ್ತೆ ಹಾಲು ಕುಡಿಸುವ ಪದ್ಧತಿ ಇಂದಿಗೂ ಇದೆ.

ಒಡೆಯರಿಂದಲೂ ಪೂಜೆ

ಮೈಸೂರು ಸಂಸ್ಥಾನವನ್ನು ಆಳಿದ ಒಡೆಯರು ಈ ಸನ್ನಿಧಿಗೆ ನಿಷ್ಠರಾಗಿದ್ದರು ಎನ್ನುತ್ತಾರೆ ಗ್ರಾಮದ ಹಿರಿಯರು. ಅವರ ಆಳ್ವಿಕೆ ಸಂದರ್ಭದಲ್ಲಿ ಸನ್ನಿಧಿಗೆ ಸೇವೆ ಮತ್ತು ದಾನಾದಿಗಳನ್ನು ನೀಡುವ ಮೂಲಕ ಅಭಿವೃದ್ಧಿ ಪಡಿಸಿದ್ದರು. ವಿವಿಧ ಪ್ರಾಂತ್ಯಗಳನ್ನು ಆಳುತ್ತಿದ್ದ ಪಾಳೇಗಾರರು ಮತ್ತು ಮಹಾರಾಜರ ಮಕ್ಕಳ ಆರೋಗ್ಯದಲ್ಲಿ ಏನಾದರೂ ಏರು ಪೇರು ಉಂಟಾದರೆ ವೆಂಕಟೇಶ್ವರನ ಸನ್ನಿಧಿಗೆ ಆಗಮಿಸಿ ತಾಯತ ಕಟ್ಟಿಸುತ್ತಿದ್ದರು.

ಹಬ್ಬಗಳ ಆಚರಣೆ

ವೆಂಕಟೇಶ್ವರ ಸ್ವಾಮಿಯ ಸನ್ನಿಧಿಯಲ್ಲಿ ಸಂಕ್ರಾಂತಿ, ರಥಸಪ್ತಮಿ, ಗ್ರಾಮ ದೇವತೆ ಹಬ್ಬ, ಶ್ರಾವಣ ಶನಿವಾರ ಮತ್ತಿತರ ವಿಶೇಷ ಸಂದರ್ಭಗಳಲ್ಲಿ ದೇವರ ಉತ್ಸವ ಮೂರ್ತಿಯನ್ನು ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ಮಾಡಲಾಗುತ್ತದೆ. ನಾಡಹಬ್ಬ ದಸರಾ ಉತ್ಸವದ 9 ದಿನಗಳಲ್ಲೂ ವಿಶೇಷ ಪೂಜೆ ನೆರವೇರುತ್ತದೆ. ಹಬ್ಬ ಹರಿದಿನ ಸೇರಿದಂತೆ ಸೋಮವಾರ, ಶುಕ್ರವಾರ ಮತ್ತು ಭಾನುವಾರಗಳಂದು ದೇವಾ ಲಯದ ಹಿಂಭಾಗದಲ್ಲಿ ಭಕ್ತರಿಗೆ ಪ್ರಸಾದ ವಿತರಣೆ ವ್ಯವಸ್ಥೆಯೂ ಇರುತ್ತದೆ.

ತಲುಪುವುದು ಹೇಗೆ ?

ನಂಜನಗೂಡು ತಾಲೂಕು ಕೇಂದ್ರದಿಂದ 30 ಕಿ.ಮೀ. ದೂರದಲ್ಲಿ ದಾಸನೂರು ಗ್ರಾಮವಿದೆ. ನಂಜನ ಗೂಡಿನಿಂದ ಕೆಎಸ್‌ಆರ್‌ಟಿಸಿ ಬಸ್ ವ್ಯವಸ್ಥೆ ಇದೆ. ತಗಡೂರು ಮಾರ್ಗವಾಗಿ ತೆರಳುವ ಬಸ್‌ಗಳಲ್ಲಿ ಸನ್ನಿಧಿಗೆ ತಲುಪಬಹುದು. ನಂಜನಗೂಡಿನಿಂದ ಚಾಮರಾಜನಗರಕ್ಕೆ ಸಾಗುವ ಮಾರ್ಗ ಮಧ್ಯೆ ಪಣ್ಯದ ಹುಂಡಿಯಲ್ಲಿ ಇಳಿದು ಆಟೋಗಳ ಮೂಲಕ ದಾಸನೂರು ತಲುಪಬಹುದು.

ಕೋಟ್ ))

ಸುತ್ತ ಮುತ್ತಲಿನ ಗ್ರಾಮಸ್ಥರು ಹುಚ್ಚಪ್ಪ ಎಂದೇ ಕರೆಯುವ ವೆಂಕಪ್ಪನು ಗ್ರಾಮದ ಆರಾಧ್ಯ ದೈವವಾಗಿದ್ದಾನೆ. ಇಂದಿಗೂ ಗುಡಿಮನೆ ಕುಟುಂಬಸ್ಥರೇ ದೇವಾಲಯದ ಸಂಪೂರ್ಣ ನಿರ್ವಹಣೆ ಜವಾಬ್ದಾರಿ ಹೊಂದಿದ್ದಾರೆ. ವೆಂಕಟೇಶ್ವರ ಸ್ವಾಮಿ ಮೂರ್ತಿಯು ತಿರುಮಲ ತಿರುಪತಿಯ ಪುಷ್ಕರಿಣಿಯಲ್ಲಿ ದೊರೆತಿರುವ ಕಾರಣ ಇದಕ್ಕೆ ವಿಶೇಷ ಸಾನ್ನಿಧ್ಯವಿದೆ. ಹಾಗಾಗಿ ಇಲ್ಲಿ ಸಂಕಟಗಳ ನಿವಾರಣೆಯಾಗಿ ಆರೋಗ್ಯ ಸಿದ್ಧಿಸುತ್ತದೆ. ಮೈಸೂರು ಮಹಾರಾಜರ ವಂಶದವರಿಗೂ ಇಲ್ಲಿ ಫಲ ದೊರಕಿದೆ. ಮುಂದಿನ ನಮ್ಮ ತಲೆಮಾರಿನವರೂ ದೇವರ ಪೂಜಾದಿಗಳನ್ನು ಮುಂದುವರಿಸಿಕೊಂಡು ಹೋಗಲಿದ್ದಾರೆ.

ವೆಂಕಟೇಶ್

ಪ್ರಧಾನ ಅರ್ಚಕ, ದಾಸನೂರು.

ನಾಲ್ಕು ತಲೆಮಾರುಗಳಿಂದ ನಮ್ಮ ವಂಶದವರು ಈ ಸನ್ನಿಧಿಗೆ ನಡೆದುಕೊಳ್ಳುತ್ತಿದ್ದಾರೆ. ವರ್ಷದಲ್ಲಿ 5-6 ಬಾರಿ ನಮ್ಮ ಕುಟುಂಬದ ಎಲ್ಲರೂ ದೇವಸ್ಥಾನಕ್ಕೆ ಆಗಮಿಸಿಪೂಜೆ ಸಲ್ಲಿಸುತ್ತಾರೆ. ನಮ್ಮ ಕುಟುಂಬದ ಯಾವುದೇ ಮಕ್ಕಳಿಗೂ ಆರೋಗ್ಯದಲ್ಲಿ ಏರುಪೇರಾದರೆ ಸನ್ನಿಧಿಗೆ ಬಂದು ತಾಯತ ಹಾಕಿಸಲಾಗುತ್ತದೆ. ಸನ್ನಿಧಿಯ ಶಕ್ತಿ ಅಪಾರವಾಗಿದೆ. ಇಲ್ಲಿ ಮಾಡಿಕೊಂಡ ಹರಕೆಗಳೆಲ್ಲವೂ ನೆರವೇರುತ್ತದೆ.

ರಾಗಮಣಿ

ಭಕ್ತೆ, ಮೈಸೂರು