ಗಿಡಗಳ ದಾಹ ತಣಿಸುವ ಭಗೀರಥರು

ವಿಶ್ವ ಪರಿಸರ ದಿನಾಚರಣೆ ಸಂದರ್ಭ ನಗರದಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಸಸಿಗಳನ್ನು ವಿವಿಧ ಸಂಘ ಸಂಸ್ಥೆಗಳು ಹಾಗೂ ಸಾರ್ವಜ ನಿಕರು ನೆಡುತ್ತಾರೆ. ಆದರೆ, ನೆಟ್ಟ ಗಿಡಕ್ಕೆ ನೀರು ನೀಡಿ ಗಿಡಗಳು ಮರಗಳಾಗಿ ಬೆಳೆಯುವಂತೆ ಮಾಡುವವರು ವಿರಳ. ಆದರೆ, ಟೀಂ ಮೈಸೂರು ಗಿಡಗಳನ್ನು ನೆಡುವುದು ಮಾತ್ರವಲ್ಲದೆ ಗಿಡಗಳಿಗೆ ನೀರುಣಿಸಿ ನಗರವನ್ನು ‘ಗ್ರೀನ್ ಮೈಸೂರು’ಆಗಿ ಪರಿವರ್ತಿಸುವ ಸಂಕಲ್ಪ ತೊಟ್ಟಿದ್ದಾರೆ.

ಟೀಂ ಮೈಸೂರು ತಂಡ ನಗರದಲ್ಲಿ ನೂರಾರು ಗಿಡಗಳನ್ನು ನೆಟ್ಟು ಮರವಾಗಿ ಬೆಳೆಸಿದ್ದಾರೆ. ಇವರು ತಾವು ನೆಟ್ಟ ಗಿಡಗಳಿಗೆ ಮಾತ್ರವಲ್ಲದೆ ಬೇರೆಯವರು ನೆಟ್ಟ ಗಿಡಗಳಿಗೂ ನೀರುಣಿಸುತ್ತಿದ್ದಾರೆ. ಇವರ ಪ್ರಯತ್ನದ ಫಲವಾಗಿ ನಗರದ ಹಲವು ಪ್ರಮುಖ ರಸ್ತೆಗಳು ಇಂದು ಹಸಿರಿನಿಂದ ಕಂಗೊಳಿಸುತ್ತಿದೆ.

ಸಮಾನ ಮನಸ್ಕರು ಒಗ್ಗೂಡಿ 2014ರಲ್ಲಿ ಟೀಂ ಮೈಸೂರು ಸ್ಥಾಪಿಸಿದರು. ಬೇಸಿಗೆ ಸಂದರ್ಭದಲ್ಲಿ ಗಿಡಗಳಿಗೆ ನೀರುಣಿಸುವುದು ಟೀಂ ಮೈಸೂರಿನ ಪ್ರಮುಖ ಉದ್ದೇಶ. ಮಳೆಗಾಲ ಹಾಗೂ ಚಳಿಗಾಲದ ಸಂದರ್ಭದಲ್ಲಿ ಗಿಡಗಳಿಗೆ ನೀರಿನ ಅವಶ್ಯಕತೆ ಹೆಚ್ಚಾಗಿ ಕಂಡು ಬರುವುದಿಲ್ಲ. ಆದರೆ, ಬೇಸಿಗೆ ಸಂದರ್ಭ ನೀರು ದೊರೆಯದೆ ಇದ್ದರೆ ಬಿಸಿಲಿನ ತಾಪಕ್ಕೆ ಗಿಡಗಳು ಒಣಗಿ ಹೋಗುತ್ತದೆ. ಈ ಸಮಸ್ಯೆಯನ್ನು ಮನಗಂಡ ಟೀಂ ಮೈಸೂರು ಬೇಸಿಗೆ ಸಂದರ್ಭ ಪ್ರತಿ ವರ್ಷ ಗಿಡಗಳಿಗೆ ನೀರುಣಿಸುವ ಕಾರ್ಯ ಮಾಡುತ್ತಿದೆ.

ಗಿಡ ಮರಗಳನ್ನು ಬೆಳೆಸಲ ಆಸಕ್ತಿ ಹೊಂದಿರುವವರು ಟೀಂ ಮೈಸೂರು ಸದಸ್ಯರಾಗಬಹುದು. ನಗರದ ಆಯ್ದ ರಸ್ತೆಗಳಲ್ಲಿ ಪ್ರತಿ ಶನಿವಾರ, ಭಾನುವಾರ ತಂಡದ ವತಿಯಿಂದ ನೀರು ಹಾಕಲಾಗುತ್ತದೆ. ಇದಕೋಸ್ಕರ ಟ್ಯಾಂಕರ್ ಬಳಕೆ ಮಾಡುತ್ತಿದ್ದಾರೆ. ಗಿಡಗಳಿಗೆ ನೀರುಣಿಸಲು ಪ್ರತಿ ವಾರ 2700 ರೂ. ವೆಚ್ಚವಾಗುತ್ತಿದೆ. ಟ್ಯಾಂಕರ್ ನೀರು ಪೂರೈಕೆಗೆ ತಗಲುವ ಹಣವನ್ನು ತಂಡದ ಸದಸ್ಯರೇ ಹೊಂದಿಸಿಕೊಳ್ಳುತ್ತಾರೆ. ಕೆಲವೊಮ್ಮೆ ದಾನಿಗಳು ಸಹ ಹಣವನ್ನು ನೀಡುತ್ತಾರೆ. ತಂಡದಲ್ಲಿರುವ ಸದಸ್ಯರು ತಮ್ಮ ಹುಟ್ಟುಹಬ್ಬದ ಸಂದರ್ಭ ಗಿಡಗಳಿಗೆ ನೀರುಣಿಸುವ ಒಂದು ದಿನದ ಸಂಪೂರ್ಣ ವೆಚ್ಚವನ್ನು ಭರಿಸುತ್ತಾರೆ. ಪ್ರತಿ ವರ್ಷ ಡಿಸೆಂಬರ್‌ನಿಂದ ಮೇ ಅಂತ್ಯದವರೆಗೆ ಗಿಡಗಳಿಗೆ ನೀರುಣಿಸುವ ಕಾರ್ಯವನ್ನು ತಂಡದ ಸದಸ್ಯರು ಮಾಡುತ್ತಾರೆ.

ಒಂದು ಗಿಡ ಮರವಾಗಿ ಬೆಳೆಯಲು ಕನಿಷ್ಠ 3 ರಿಂದ 5 ವರ್ಷಗಳ ಅವಶ್ಯಕತೆ ಇದೆ. ಈ ಹಿನ್ನೆಲೆಯಲ್ಲಿ ಟೀಂ ಮೈಸೂರು ತಂಡ ಯಾವುದಾದರು ಒಂದು ರಸ್ತೆಯನ್ನು ಆಯ್ಕೆ ಮಾಡಿಕೊಂಡು 5 ವರ್ಷಗಳ ಕಾಲ ನಿರಂತರವಾಗಿ ಪ್ರತಿ ವಾರ ನೀರುಣಿಸುವ ಕಾರ್ಯವನ್ನು ಮಾಡುತ್ತಿದೆ.

ಟೀಂ ಮೈಸೂರು ಪ್ರಾರಂಭದಲ್ಲಿ ನಗರದ ವಿಶ್ವಮಾನವ ಜೋಡಿ ರಸ್ತೆ ಬದಿಯಲ್ಲಿ (ಕುಕ್ಕರಹಳ್ಳಿ ಕೆರೆ ಸಿಗ್ನಲ್ ಬಳಿಯಿಂದ ಸಾ.ರಾ. ಕನ್ವೆನ್ಷನ್ ಹಾಲ್ವರೆಗೆ) 2013 ರಿಂದ 2018ರವರೆಗೆ ಗಿಡಗಳಿಗೆ ನೀರುಣಿಸುವ ಕಾರ್ಯ ಮಾಡಿದ್ದರು. ಈ ರಸ್ತೆಯಲ್ಲಿ ನೆಟ್ಟಿದ್ದ ಗಿಡಗಳು ಇಂದು ಹೆಮ್ಮರವಾಗಿ ಬೆಳೆದಿದೆ. 2019 ರಿಂದ 2021ರವರೆಗೆ ಕಲಾಮಂದಿರದಿಂದ ಕುಕ್ಕರಹಳ್ಳಿ ಕೆರೆ ಕಡೆಗೆ ಸಾಗುವ ಮಾರ್ಗದಲ್ಲಿ ಹಾಗೂ ಜಾಕಿ ಕ್ವಾಟರ್ಸ್, ಕೃಷ್ಣರಾಜ ಬುಲೇವಾರ್ಡ್ ರಸ್ತೆ ಹಾಗೂ ಇಟ್ಟಿಗೆಗೂಡಿನಲ್ಲಿ ನೆಟ್ಟಿದ್ದ ಗಿಡಗಳಿಗೆ ನೀರುಣಿಸಿದ್ದರು. 2022 ರ ನಂತರ ವಿಜಯನಗರ 4ನೇ ಹಂತದಲ್ಲಿ 135 ಗಿಡಗಳು, ಶೇಷಾದ್ರಿ ಅಯ್ಯರ್ ರಸ್ತೆಯಲ್ಲಿ 40 ಗಿಡಗಳು, ರಾಮವಿಲಾಸ ರಸ್ತೆಯಲ್ಲಿ 20 ಗಿಡಗಳು, ಪಿಕೆಟಿಬಿ ಆಸ್ಪತ್ರೆ ಎದುರು 25 ಗಿಡಗಳು, ಮೇಟಗಳ್ಳಿ ಮುಖ್ಯ ರಸ್ತೆಯಲ್ಲಿ 20 ಗಿಡಗಳು, ಬೃಂದಾವನ ಬಡಾವಣೆಯಲ್ಲಿ 45 ಗಿಡಗಳನ್ನು ನೆಟ್ಟು ಗಿಡಗಳಿಗೆ ನೀರುಣಿಸುತ್ತಿದ್ದಾರೆ. ಟೀಂ ಮೈಸೂರು ತಂಡದವರ ಪರಿಶ್ರಮದ ಫಲವಾಗಿ ನಗರದಲ್ಲಿ ನೂರಾರು ಮರಗಳು ಬೆಳೆದು ನಿಂತಿದ್ದು, ಸಾಕಷ್ಟು ಜನರಿಗೆ ಶುದ್ಧವಾದ ಗಾಳಿ, ನೆರಳನ್ನು ನೀಡುತ್ತಿದೆ.

ಪ್ರತಿವಾರ ಕೈಗೊಳ್ಳುವ ಸೇವಾ ಚಟುವಟಿಕೆಯ ಕುರಿತು ಚರ್ಚಿಸಲು ತಂಡದ ವಾಟ್ಸ್‌ಆ್ಯಪ್ ಗ್ರೂಪ್ ರಚಿಸಲಾಗಿದೆ. ಈ ವಾಟ್ಸ್‌ಆ್ಯಪ್ ಗ್ರೂಪ್‌ನಲ್ಲಿಯೇ ಸೇವಾ ಚಟುವಟಿಕೆಯ ಕುರಿತು ಚರ್ಚೆಗಳು ನಡೆಯುತ್ತವೆ. ಟೀಂ ಮೈಸೂರು ತಂಡ ಗಿಡಗಳಿಗೆ ನೀರುಣಿಸುವ ಜತೆಗೆ ನಗರದ ವಿವಿಧೆಡೆ ಗಿಡಗಳನ್ನು ನೆಟ್ಟು ಪೋಷಿಸುವ ಕಾರ್ಯವನ್ನು ಸಹ ಮಾಡುತ್ತಿದೆ. ಪರಿಸರದ ಕುರಿತು ಆಸಕ್ತಿ ಹೊಂದಿರುವವರು ತಂಡದ ಸದಸ್ಯರಾಗಬಹುದು.

ಗೋಕುಲ್ ಗೋವರ್ಧನ್, ಸಂಚಾಲಕ, ಟೀಂ ಮೈಸೂರು