ಮೈಸೂರು

ತನ್ವೀರ್‌ ಸೇಠ್'ರಿಗೆ ತಪ್ಪಿದ ಸಚಿವಗಿರಿ

ತನ್ವೀರ್ ಅಜೀಜ್ ಸೇಠ್
ತನ್ವೀರ್ ಅಜೀಜ್ ಸೇಠ್
ಮಂಜುನಾಥ ತಿಮ್ಮಯ್ಯ
Published on: 

ಪ್ರಮುಖ ಮುಖ್ಯಾಂಶಗಳು

  • ಆರು ಬಾರಿ ಗೆದ್ದರೂ ಸಿಗಲಿಲ್ಲ ಅವಕಾಶ
  • ಅಭಿಮಾನಿಗಳಿಂದ ಆಕ್ರೋಶ

ಮಂಜುನಾಥ ತಿಮ್ಮಯ್ಯ ಭೋವಿ ಮೈಸೂರು

ಮೈಸೂರು ನಗರ ವ್ಯಾಪ್ತಿಯ ನರಸಿಂಹರಾಜ ವಿಧಾನಸಭಾ ಕ್ಷೇತ್ರದಿಂದ ಸತತವಾಗಿ ಆರು ಬಾರಿ ಗೆದ್ದಿರುವ ತನ್ವೀರ್ ಅಜೀಜ್ ಸೇಠ್ ಅವರಿಗೆ ಮಂತ್ರಿಗಿರಿ ಮತ್ತೆ ಕೈ ತಪ್ಪಿದೆ. ಇದರಿಂದಾಗಿ ಅಭಿಮಾನಿಗಳ ಆಕ್ರೋಶವೂ ಭುಗಿಲೆದ್ದಿದೆ...!
ಡಿ.ಕೆ.ಶಿವಕುಮಾರ್ ನೇತೃತ್ವದ ಸಚಿವ ಸಂಪುಟ ವಿಸ್ತರಣೆಯಲ್ಲಿ ಅವಕಾಶ ಪಡೆದುಕೊಳ್ಳುವಲ್ಲಿ ತನ್ವೀರ್ ಮತ್ತೊಮ್ಮೆ ವಿಫಲರಾಗಿದ್ದಾರೆ. ಸಿದ್ದರಾಮಯ್ಯ ನೇತೃತ್ವದ 2.0 ಸರ್ಕಾರದಲ್ಲೂ ಅವರಿಗೆ ಸಚಿವಗಿರಿ ದಕ್ಕಿರಲಿಲ್ಲ. ಇದು ಮತ್ತೆ ಪುನರಾವರ್ತನೆಯಾಗಿದ್ದು, ಅವರಿಗೆ ಮತ್ತೊಮ್ಮೆ ನಿರಾಸೆಯಾಗಿದೆ.
ಸಚಿವ ಸಂಪುಟದಲ್ಲಿ ತನ್ವೀರ್ ಅವರಿಗೆ ಅವಕಾಶ ಸಿಗದಿದ್ದರಿಂದ ಅವರ ಅಭಿಮಾನಿಗಳು, ಕಾಂಗ್ರೆಸ್ ಕಾರ್ಯಕರ್ತರು ಅಸಮಾಧಾನಗೊಂಡಿದ್ದಾರೆ. ಆತ್ಮಹತ್ಯೆಗೆ ಯತ್ನ, ಪೆಟ್ರೋಲ್ ಸುರಿದುಕೊಳ್ಳಲು ಯತ್ನ, ಸಾಲು ಸಾಲು ಪ್ರತಿಭಟನೆ ಮಾಡಿ ಆಕ್ರೋಶವನ್ನು ಹೊರಹಾಕಿದ್ದಾರೆ.  

ಇದು ಪಕ್ಷಕ್ಕೆ ತಲೆನೋವಿನ ಸಂಗತಿಯಾಗಿದೆ.

ಮುಸ್ಲಿಂ ಸಮುದಾಯದ ತನ್ವೀರ್ 2002ರಿಂದಲೂ ಮೈಸೂರಿನ ನರಸಿಂಹರಾಜ ಕ್ಷೇತ್ರದ ಪ್ರತಿನಿಧಿ. ಇವರ ತಂದೆ ಹಿರಿಯ ಕಾಂಗ್ರೆಸ್ ನಾಯಕ ಅಜೀಜ್ ಸೇಠ್ ನಿಧನದ ಬಳಿಕ ಇವರು ರಾಜಕೀಯವಾಗಿ ಮುನ್ನೆಲೆಗೆ ಬಂದರು. 2002ರ ಎನ್‌ಆರ್ ಕ್ಷೇತ್ರದ ಉಪಚುನಾವಣೆಯಲ್ಲಿ ತನ್ವೀರ್ ಮೊದಲ ಬಾರಿಗೆ ಜಯ ಸಾಧಿಸಿ ವಿಧಾನಸಭೆ ಸದಸ್ಯರಾದರು. ಬಳಿಕ 2004, 2008, 2013, 2018, 2023ರ ಚುನಾವಣೆಯಲ್ಲೂ ಸತತವಾಗಿ ಗೆದ್ದು ಶಾಸಕರಾಗಿ ಮುಂದುವರಿಯುತ್ತಿದ್ದಾರೆ. 
ಹಿರಿಯ ರಾಜಕಾರಣಿಯಾಗಿರುವ ಅವರು, ಎಸ್.ಎಂ.ಕೃಷ್ಣ ಸರ್ಕಾರದಲ್ಲಿ 2004ರಿಂದ 2006ರ ವರೆಗೆ ಕಾರ್ಮಿಕ, ವಕ್ಫ್ ಸಚಿವ ಕಾರ್ಯನಿರ್ವಹಿಸಿರುವ ಅನುಭವಿ. ಜತೆಗೆ, 2013ರ ಸಿದ್ದರಾಮಯ್ಯ ಸರ್ಕಾರದಲ್ಲಿ 2016ರಿಂದ 2018ರ ವರೆಗೆ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಸಚಿವರಾಗಿ ಕಾರ್ಯನಿರ್ವಹಣೆ ಮಾಡಿ ಗಮನ ಸೆಳೆದಿದ್ದರು.
60 ವರ್ಷದ ತನ್ವೀರ್ ಅವರಿಗೆ ಸಿದ್ದರಾಮಯ್ಯ ಅವರ 2ನೇ ಅವಧಿಯ ಸರ್ಕಾರದಲ್ಲೇ ಮಂತ್ರಿಯಾಗಬೇಕಿತ್ತು. ಮೈಸೂರಿನವರೇ ಸಿಎಂ ಆಗಿರುವ ಕಾರಣಕ್ಕೆ ಅವರಿಗೆ ಅವಕಾಶವನ್ನು ನಿರಾಕರಣೆ ಮಾಡಲಾಯಿತು. ಮುಂದಿನ ಸಚಿವ ಸಂಪುಟದಲ್ಲಿ ಸಚಿವ ಸ್ಥಾನ ಕೊಡುತ್ತೇವೆಂದು ಭರವಸೆಯನ್ನೂ ನೀಡಲಾಗಿತ್ತು. ಇದೀಗ ಅದು ಸಹ ಹುಸಿಯಾಗಿದೆ ಎಂದು ಅವರ ಅಭಿಮಾನಿಗಳು ಕಿಡಿಕಾರುತ್ತಿದ್ದಾರೆ.

ಜಿಲ್ಲೆಯಿಂದ ಒಬ್ಬರಿಗೆ ಮಾತ್ರ ಮಂತ್ರಿಗಿರಿ

ಜಿಲ್ಲೆಯಿಂದ ಗೆದ್ದಿರುವ ಆರು ಕಾಂಗ್ರೆಸ್ ಶಾಸಕ ಪೈಕಿ ಒಬ್ಬರಿಗೆ ಮಾತ್ರ ಸಚಿವ ಸಂಪುಟದಲ್ಲಿ ಸ್ಥಾನ ಒಲಿದಿದೆ. ಸಿದ್ದರಾಮಯ್ಯ ಇತ್ತೀಚಿಗೆ ಸಿಎಂ ಕುರ್ಚಿಯನ್ನು ಬಿಟ್ಟುಕೊಟ್ಟಿದ್ದಾರೆ. ಇದರ ಫಲವಾಗಿ ಅವರ ಪುತ್ರ ಡಾ.ಯತೀಂದ್ರ ಸಿದ್ದರಾಮಯ್ಯ ಅವರು ನಗರಾಭಿವೃದ್ಧಿ ಸಚಿವರಾಗಿ ಡಿಕೆಸಿ ಸರ್ಕಾರದ ಮೊದಲ ಕಂತಿನಲ್ಲೇ ಅಧಿಕಾರ ಗಿಟ್ಟಿಸಿಕೊಂಡಿದ್ದಾರೆ.
ಹಿಂದಿನ ಸಚಿವರಾಗಿದ್ದ ಡಾ.ಮಹದೇವಪ್ಪ, ಕೆ.ವೆಂಕಟೇಶ್ ಅವರಿಗೂ ಈ ಸಲ ಅಧಿಕಾರ ಸಿಕ್ಕಿಲ್ಲ. ಉಳಿದಂತೆ 2ನೇ ಬಾರಿಗೆ ಶಾಸಕರಾಗಿ ಆಯ್ಕೆಯಾಗಿರುವ ಅರಣ್ಯ ವಸತಿ, ವಿಹಾರ ಧಾಮಗಳ ನಿಗಮದ ಅಧ್ಯಕ್ಷ ಅನಿಲ್ ಚಿಕ್ಕಮಾದು ಅವರಿಗೆ ಯುವ ಶಾಸಕರ ಕೋಟಾದಲ್ಲಿ ಸಚಿವ ಸ್ಥಾನ ಸಿಗುವ ನಿರೀಕ್ಷೆಯೂ ಹುಸಿಯಾಗಿದೆ. ಮೊದಲ ಬಾರಿಗೆ ಶಾಸಕರಾಗಿರುವ ಚಾಮರಾಜ ಕ್ಷೇತ್ರದ ಕೆ.ಹರೀಶ್‌ಗೌಡ, ಕೆ.ಆರ್. ನಗರದ ಡಿ.ರವಿಶಂಕರ್ ಅವರನ್ನು ಪರಿಗಣನೆ ಮಾಡಿಲ್ಲ. ವರುಣಕ್ಷೇತ್ರದ ಡಾ.ಯತೀಂದ್ರ ಅವರಿಗೆ ಮಾತ್ರ ಜಿಲ್ಲೆಯಿಂದ ಮಂತ್ರಿಗಿರಿ ಅನುಭವಿಸುತ್ತಿದ್ದಾರೆ.

ಡಾ.ಮಹದೇವಪ್ಪ ಅವರಿಗೂ ನಿರಾಸೆ:

ತಿ.ನರಸೀಪುರದ ಶಾಸಕ ಡಾ.ಎಚ್.ಸಿ.ಮಹದೇವಪ್ಪ ಮತ್ತು ಪಿರಿಯಾಪಟ್ಟಣದ ಶಾಸಕ ಕೆ.ವೆಂಕಟೇಶ್ ಅವರಿಗೂ ಸಚಿವ ಸ್ಥಾನ ದೊರೆತಿಲ್ಲ. ಸಿದ್ದರಾಮಯ್ಯ ನೇತೃತ್ವದ 2ನೇ ಹಂತ ಸರ್ಕಾರದಲ್ಲಿ ಸಮಾಜಕಲ್ಯಾಣ ಸಚಿವರಾಗಿ ಡಾ. ಮಹದೇವಪ್ಪ, ಪಶುಸಂಗೋಪನೆ ಸಚಿವರಾಗಿ ಕೆ.ವೆಂಕಟೇಶ್ ಕೆಲಸ ಮಾಡಿದ್ದರು. ಡಿ.ಕೆ.ಶಿವಕುಮಾರ್ ಸರ್ಕಾರದಲ್ಲಿ ಇಬ್ಬರು ಮಾಜಿ ಸಚಿವರಿಗೂ ಕ್ಯಾಬಿನೆಟ್ ಪ್ರವೇಶಿಸಲಾಗಿಲ್ಲ. ಸಚಿವ ಸ್ಥಾನಕ್ಕಾಗಿ ಡಾ.ಮಹದೇವಪ್ಪ ತೀವ್ರ ಲಾಬಿ ಮಾಡಿದ್ದರೂ ಫಲಕೊಟ್ಟಿಲ್ಲ.

ಕೈತಪ್ಪಲು ಕಾರಣವೇನು...?

ತನ್ವೀರ್ ಅವರಿಗೆ ಸಚಿವ ಸ್ಥಾನ ಸಿಕ್ಕೇ ಬಿಡುತ್ತದೆ ಎಂಬ ವಾತಾವರಣ ಸೃಷ್ಟಿಯಾಗಿತ್ತು. ಸೋಮವಾರ ಬೆಳಗ್ಗೆ ವರೆಗೂ ಹಾಗೇ ಇತ್ತು ಸಹ. ಆದರೆ, ಹೈಕಮಾಂಡ್‌ನಿಂದ ಬಂದ ಪಟ್ಟಿಯಲ್ಲಿ ತನ್ವೀರ್ ಹೆಸರು ಇರಲಿಲ್ಲ. ಇದು ರಾಜಕೀಯ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.
ಮುಸ್ಲಿಂ ಸಮುದಾಯದ ಕೋಟಾದಲ್ಲಿ ಇವರಿಗೆ ಸಚಿವ ಸಂಪುಟದಲ್ಲಿ ಸ್ಥಾನ ದೊರೆಯುವ ಭರವಸೆ ಇತ್ತು. ಅದು ಕೊನೆ ಹಂತದಲ್ಲಿ ಹುಸಿಯಾಗಿದೆ. ಈ ಕೋಟಾದಲ್ಲಿ ಮೈಸೂರು ಮೂಲದ ಬೆಂಗಳೂರಿನ ಶಿವಾಜಿನಗರ ಕ್ಷೇತ್ರ ಶಾಸಕ ರಿಜ್ವಾನ್ ಅರ್ಷದ್‌ರಿಗೆ ಅದೃಷ್ಟ ಖುಲಾಯಿಸಿದೆ. ಮೊದಲ ಬಾರಿಗೆ ಸಚಿವರಾಗಿದ್ದಾರೆ. ಹಿಂದಿನ ಸರ್ಕಾರದ ವಸತಿ ಸಚಿವರಾಗಿದ್ದ ಜಮೀರ್ ಅಹಮದ್ ಖಾನ್‌ಗೂ  ಅವಕಾಶ ದೊರೆತಿದೆ. ಈ ಕಾರಣಕ್ಕೆ ತನ್ವೀರ್‌ಗೆ ಅವಕಾಶ ಕೈತಪ್ಪಿದೆ ಎಂದು ವಿಶ್ಲೇಷಿಸಲಾಗಿದೆ. ಆದರೆ, ರಾಜಕೀಯ ಅಂತರಾಳದಲ್ಲಿ ಬೇರೆ ಲೆಕ್ಕಾಚಾರ ಇದೆ ಎಂದು ಪಕ್ಷದ ವಲಯದಲ್ಲಿ ಗುಸುಗುಸು ಶುರುವಾಗಿದೆ.


ಒಂದು ಕಡೆಗೆ ನಿರಾಶೆ, ಮತ್ತೊಂದು ಸಂಭ್ರಮಾಚರಣೆ...!

ರಿಜ್ವಾನ್ ಅರ್ಷದ್ ಸಚಿವರಾಗಿ ಪ್ರಮಾಣವಚನ ಸ್ವೀಕರಿಸಿದ ಹಿನ್ನೆಲೆಯಲ್ಲಿ ಕೈ ಪಡೆಯ ಕಾರ್ಯಕರ್ತರು ನಗರದ ಕಾಂಗ್ರೆಸ್ ಭವನದ ಮುಂಭಾಗ ಸಂಭ್ರಮಾಚರಣೆ ಮಾಡಿದರು.  ಈ ಎರಡೂ ವೈರುಧ್ಯಗಳಿಗೂ ನಗರ ಸಾಕ್ಷಿಯಾಯಿತು.
"

ಸಚಿವ ಸ್ಥಾನ ಸಿಗದಿದ್ದರಿಂದ ನಿರಾಸೆಯಾಗಿದೆ. ನನಗೆ ಸಿಗಬೇಕಾದ ಗೌರವವೂ ಸಿಗಲಿಲ್ಲ. ನಮ್ಮ ನಾಯಕರಿಂದ ಅವಕಾಶ ಕೈ ತಪ್ಪಿದೆ. ಯಾವ ಮಾನದಂಡ ಆಧಾರದ ಮೇಲೆ ಸಚಿವ ಸಂಪುಟ ರಚನೆ ಆಗಿದೆಯೋ ಗೊತ್ತಿಲ್ಲ. ಮೈಸೂರು ಭಾಗಕ್ಕೆ ಮಾತ್ರ ಅನ್ಯಾಯವಾಗಿದೆ. ಪಕ್ಷದಿಂದ ಹೊರ ಬನ್ನಿ ಎಂದು ಕಾರ್ಯಕರ್ತರು ಹೇಳಿದರೆ ಹಾಗೇ ಮಾಡುತ್ತೇನೆ. ಒಟ್ಟಿನಲ್ಲಿ ನನ್ನ ಅಭಿಮಾನಿಗಳು ತೆಗೆದುಕೊಳ್ಳುವ ನಿರ್ಧಾರಕ್ಕೆ ಬದ್ಧ.

— ತನ್ವೀರ್ ಸೇಠ್ ಶಾಸಕ

ರಾಜಕೀಯ
ಮೈಸೂರು
ತನ್ವೀರ್ ಸೇಠ್
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net