ಗರುಡ ಭಗವಂತನ ಸೇವೆಯ ಸಂಕೇತ: ಶ್ರೀ ಯದುಗಿರಿ ಯತಿರಾಜ ನಾರಾಯಣ ರಾಮಾನುಜ ಜೀಯರ್

ನಗರದ ಕಾಳಿದಾಸ ರಸ್ತೆಯ ಶ್ರೀಲಕ್ಷ್ಮಿನರಸಿಂಹಸ್ವಾಮಿ ದೇವಾಲಯದ ಪಂಚ ಗರುಡೋತ್ಸವ ಸೇವಾ ಸಮಿತಿ, ರಾಮಾನು ವೇದಿಕೆ, ಗರುಡ ಸಭಾದಿಂದ ಸಹಯೋಗದಲ್ಲಿ ತೃತೀಯ ಬಾರಿಗೆ ಜಯಲಕ್ಷ್ಮೀಪುರಂನ ಮಹಾಜನ ವಿದ್ಯಾಸಂಸ್ಥೆ ಕ್ರೀಡಾಂಗಣದಲ್ಲಿ ಆಯೋಜಿಸಿದ್ದ ದ್ವಾದಶ (12) ಗರುಡೋತ್ಸವ ಧಾರ್ಮಿಕ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದರು.

ದ್ವಾದಶ ಗರುಡೋತ್ಸವ ವೈಷ್ಣವ ಪರಂಪರೆ ಪ್ರತಿಬಿಂಬಿಸುತ್ತದೆ. ಗರುಡ ಭಗವಂತಹ ವಾಹನ ಮಾತ್ರವಲ್ಲ ಅದೊಂದು ಸೇವೆಯ ಸಂಕೇತ. ಹಾಗಾಗಿ ದೈವಿಕ ಪರಂಪರೆಯನ್ನು ಆಚರಣೆಯಾಗಿ ರೂಪಿಸುವ ಕ್ರಿಯೆಯೇ ಗರುಡೋತ್ಸವ ಎಂದರು.

ರಾಮಾನುಜರ ತತ್ವಾದರ್ಶಗಳು ಎಲ್ಲಿಲ್ಲಿ ನೆಲೆಸಿರುವುದೋ ಅಲ್ಲಿಲ್ಲಿ ಸಮಾನತೆ, ಸಹೋದರತ್ವ ಹಾಗೂ ಭಾತೃತ್ವ ನೆಲೆಸುತ್ತದೆ. ದ್ವಾದಶ ಗರುಡೋತ್ಸವ ವೈಷ್ಣವ ಪರಂಪರೆ ಪ್ರತಿಬಿಂಬಿಸುತ್ತದೆ. ಶ್ರೀರಂಗಂ, ತಿರುಪತಿ, ಕಾಂಚಿಪುರಂ, ಮೇಲುಕೋಟೆ ದಿವ್ಯ ಕ್ಷೇತ್ರಗಳ ಗರುಡೋತ್ಸವದ ಪರಂಪರೆಯನ್ನು ಒಂದೇ ವೇದಿಕೆಯಲ್ಲಿ ಪ್ರತಿಷ್ಠಾಪಿಸಲಾಗಿರುವ ಧಾರ್ಮಿಕ ಉತ್ಸವ ಇದಾಗಿದೆ ಎಂದು ಹೇಳಿದರು.

ರಾಮಾನುಜರ ತತ್ವ, ಆದರ್ಶ ಸರ್ವಕಾಲಿಕ. ಆದ್ದರಿಂದ ಅದನ್ನು ಪ್ರಚುರಪಡಿಸಲು 2027ರ ಫೆ.6ರಂದು ಮೈಸೂರಿನ ಅರಮನೆ ಮುಂಭಾಗ ಹದಿನೆಂಟು ಗರುಡೋತ್ಸವ ಆಚರಿಸಲಾಗುವುದು ಎಂದು ತಿಳಿಸಿದರು.

ಗಣಪತಿ ಸಚ್ಚಿದಾನಂದ ಸ್ವಾಮೀಜಿ ಆಶ್ರಮದ ಕಿರಿಯ ಶ್ರೀಗಳಾದ ಶ್ರೀದತ್ತ ವಿಜಯೇಂದ್ರ ತೀರ್ಥ ಸ್ವಾಮೀಜಿ ಮಾತನಾಡಿ, ಉನ್ನತ ಭಕ್ತಿಯಿಂದ ದೇವರೆಡೆಗೆ ಕರೆದುಕೊಂಡು ಹೋಗುವ ಉತ್ಸವ ಇದಾಗಿದೆ. ಗರುಡೋತ್ಸವ ಭಕ್ತಿಯಡೆಗೆ ದಾರಿಯಾಗಿದೆ ಎಂದು ಹೇಳಿದರು.

ಹರಿಭಕ್ತಿ ಇಲ್ಲದಿದ್ದಲ್ಲಿ ಏನಿದ್ದರೂ ಶೂನ್ಯ. ಅಂತೆಯೇ ಹರಿಭಕ್ತಿ ಉಂಟು ಮಾಡುವ ಮಹೋತ್ಸವ ನಡೆಯುತ್ತಿರುವುದು ಪುಣ್ಯದ ಕೆಲಸ. ಈ ಜನ್ಮದಲ್ಲಿ ಸಾಧ್ಯವಾದಷ್ಟು ಪುಣ್ಯ ಸಂಪಾದನೆ ಮಾಡಬೇಕು. ಇದಕ್ಕೆ ಯಜ್ಞ-ಯಗಾದಿಗಳನ್ನು ಹಮ್ಮಿಕೊಳ್ಳಬೇಕು. ಇದು ಎಲ್ಲರಿಂದಲೂ ಸಾಧ್ಯವಿಲ್ಲ. ಹಾಗಾಗಿ ಇಂತಹ ಧಾರ್ಮಿಕ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿರುವುದು ಸಂತೋಷ ವಿಷಯ ಎಂದರು.

ಹೈದರಬಾದ್ ಶಂಷಾಬಾದ್‌ನ ಚಿನ್ನ ಜೀಯರ್ ಸ್ವಾಮಿ ಆಶ್ರಮದ ತ್ರಿದಂಡಿ ಶ್ರೀಮನ್ನಾರಾಯಣ ರಾಮಾನುಜ ಚಿನ್ನ ಜೀಯರ್ ಸ್ವಾಮೀಜಿ ಮಾತನಾಡಿ, ದೇವರ ಸ್ಮರಣೆಯಿಂದ ಭೂಲೋಕವನ್ನು ವೈಕುಂಠವಾಗಿಸಬಹುದು. ಗರುಡ ಅಂದರೆ ವೇದ. ಗರುಡೋತ್ಸವದಲ್ಲಿನ ದಿವ್ಯ ನಾದ, ವೇದಮಂತ್ರಗಳ ಘೋಷ, ಇಂತಹ ಉತ್ಸವಗಳು ಸರ್ವರಲ್ಲಿಯೂ ಜಾತ್ಯತೀತತೆ ಮೂಡಿಸಿ, ಸೌಹಾರ್ದತೆ ಬೆಳೆಸುತ್ತದೆ. ಧರ್ಮದ ಉಳಿವಿಗೆ ಉತ್ಸವ ಅಗತ್ಯವಿದೆ ಎಂದು ಹೇಳಿದರು.

ಶಾಸಕ ಟಿ.ಎಸ್.ಶ್ರೀವತ್ಸ ಮಾತನಾಡಿ, ಗುರುಗಳ ಆದೇಶ ಹಾಗೂ ಮಾರ್ಗದರ್ಶನದಂತೆ ಗರಡೋತ್ಸವ ಆರಂಭವಾಗಿದೆ. 2024ರಲ್ಲಿ ಪಂಚ ಗರುಡೋತ್ಸವ, 2025ರಲ್ಲಿ ಷಷ್ಠಿ ಗರೊಡೋತ್ಸವ ಆಚರಣೆಯನ್ನು ಶ್ರದ್ಧಾ ಭಕ್ತಿಯಿಂದ ಆಚರಣೆ ಮಾಡಲಾಗಿದೆ. ಇದೀಗ 2026ರಲ್ಲಿ ದ್ವಾದಶ ಉತ್ಸವ ಜರುಗಿದೆ. ದೇವರು ಜೊತೆಗೆ ಯತಿಗಳು, ಗುರುಗಳ ವೃದ್ದಿಸಿದ್ದಾರೆ ಎಂದರು.

ಸುದರ್ಶನ ನಾರಸಿಂಹ ಕ್ಷೇತ್ರದ ಧರ್ಮಾಧಿಕಾರಿ ಶ್ರೀಭಾಷ್ಯಂ ಸ್ವಾಮೀಜಿ, ಪ್ರಮತಿ ವಿದ್ಯಾಸಂಸ್ಥೆ ಅಧ್ಯಕ್ಷ ಎಚ್.ವಿ.ರಾಜೀವ್, ಜಿಲ್ಲಾ ಬ್ರಾಹ್ಮಣ ಸಂಘದ ಅಧ್ಯಕ್ಷ ಡಿ.ಟಿ.ಪ್ರಕಾಶ್, ನಗರಪಾಲಿಕೆ ಮಾಜಿ ಸದಸ್ಯರಾದ ಭಾಗ್ಯಾ ಮಾದೇಶ್, ನಮ್ರತಾ ಸುರೇಶ್, ಪಂಚಗರುಡೋತ್ಸವ ಸೇವಾ ಸಮಿತಿ ಅಧ್ಯಕ್ಷ ಕೆ.ಆರ್.ಲಕ್ಷ್ಮೀಶ್, ಅಚರ್ಕರಾದ ಕಶ್ಯಪ್, ಮುರಳಿ, ಆನಂದ್, ಕಾರ್ಯಕಾರಿ ಸಮಿತಿ ಸದಸ್ಯರಾದ ಕೆ.ಆರ್.ಯೋಗಾನರಸಿಂಹನ್, ಎಸ್.ಸುದರ್ಶನ್, ಪಿ.ರಾಮಾನುಜಂ, ಮಣಿವಣ್ಣನ್, ಶ್ರೀರಂಗರಾಜನ್ ಉತ್ತಮನಂಬಿ, ಪದ್ಮಶ್ರೀ, ಜಿ.ಕೆ.ಕಮಲಾ, ಎಂ.ಆರ್.ನಾಗಮಣಿ, ಜಾನಕಿ ಕೃಷ್ಣಮೂರ್ತಿ, ವೀರರಾಘವ್, ರಾಮಪ್ರಿಯನ್, ವೈಯ್ಯಕರಣಿ ರಾಮಾನುಜಂ, ರಂಗರಾಜು, ಶ್ರೀನಿಧಿ ಶಾಂತಾರಾಂ, ಎಂ.ಆನಂದ್, ಜೆ.ಕೃಷ್ಣಮೂರ್ತಿ ಇದ್ದರು.

ಸಂಗೀತ ಕಾರ್ಯಕ್ರಮ:

ವಿಶ್ವಾಸ್ ಇನ್‌ಸ್ಟಿಟ್ಯೂಟ್ ಆಫ್ ಶ್ರೀವಿಷ್ಣು ಸಹಸ್ರನಾಮಂ ತಂಡದಿಂದ ವಿಷ್ಣು ಸಹಸ್ರನಾಮ ಪಾರಾಯಣ, ವಿದ್ವಾನ್ ಎಂ.ಜಿ.ರಂಗನಾಥ್ ಅವರಿಂದ ಭಕ್ತಿಗೀತೆಗಳು, ವಿದುಷಿ ರಾಜ್ಯಶ್ರೀ ಜ್ಯೋಷ್ಯರ್ ಮತ್ತು ವಿದುಷಿ ಐಶ್ವರ್ಯ ಮಣಿಕರ್ಣಿಕೆ ಅವರಿಂದ ಯುಗಳ ವೀಣಾ ವಾದನ ಪ್ರಸ್ತುತ ಪಡಿಸಲಾಯಿತು.

ಸರಸ್ವತಿಪುರಂ ಕಲಾಂದಿಕ ಅಕಾಡಮಿ ಆಫ್ ಆರ್ಟ್ಸ್ ವಿದ್ಯಾರ್ಥಿಗಳಿಂದ ಭರತನಾಟ್ಯ, ಶ್ರೀಲಕ್ಷ್ಮೀನರಸಿಂಹಸ್ವಾಮಿ ಮತ್ತು ಪುಸ್ತಕಂ ದೇವಸ್ಥಾನದ ಗೋಷ್ಠಿಯವರಿಂದ ವಿಶೇಷ ನೃತ್ಯರೂಪಕ ಪ್ರಸ್ತುತ ಪಡಿಸಲಾಯಿತು.ಬಳಿಕ ಜಯಲಕ್ಷ್ಮೀಪುರಂ ಪ್ರಮುಖ ರಸ್ತೆಗಳಲ್ಲಿ ಪಂಚಗರುಡೋತ್ಸವ ಮೆರವಣಿಗೆ ಸಾಗಿತು.