ತಾಯೂರಿನಲ್ಲಿ ಶ್ರೀಗುಣನಿಧಿ ತೀರ್ಥರ ಆರಾಧನಾ ಮಹೋತ್ಸವ

ತಾಲೂಕಿನ ತಾಯೂರು ಗ್ರಾಮದ ಕಪಿಲಾ ನದಿ ತೀರದಲ್ಲಿರುವ ಶ್ರೀಗಳ ಮೂಲ ವೃಂದಾವನ ಸನ್ನಿಧಾನದಲ್ಲಿ ಬೆಳಗ್ಗೆ 8ಕ್ಕೆ ವೃಂದಾವನಕ್ಕೆ ಅಭಿಷೇಕ, ಪಂಚಾಮೃತ ಸೇವೆ, ವಿಶೇಷ ಅಲಂಕಾರ ನೆರವೇರಿತು. ಈ ಸಂದರ್ಭ ಅನುಗ್ರಹ ಸಂದೇಶ ನೀಡಿದ ಮುಳಬಾಗಿಲು ಶ್ರೀಪಾದರಾಜರ ಮಠದ ಶ್ರೀಸುಜಯನಿಥಿ ತೀರ್ಥ ಸ್ವಾಮೀಜಿ, ಮಾಧ್ವ ವೇದಾಂತ ಸಾಮ್ರಾಜ್ಯಕ್ಕೆ ಶ್ರೀಗುಣನಿಧಿ ತೀರ್ಥ ಸ್ವಾಮೀಜಿ ಕೊಡುಗೆ ಅನನ್ಯವಾಗಿದೆ. ಪೂರ್ವಾಶ್ರಮದಲ್ಲೂ ಮೈಸೂರು ಆಸ್ಥಾನದಲ್ಲಿ ವಿದ್ವಾಂಸರಾಗಿ ಅವರು ಕೀರ್ತಿ ಗಳಿಸಿದ್ದರು. ಸನ್ಯಾಸ ಸ್ವೀಕಾರ ನಂತರ ಮೈಸೂರು ಮಹಾರಾಜರಿಂದ ಗೌರವಾದರ ಪಡೆದ ಮಾಧ್ವಯತಿಗಳಾಗಿದ್ದರು. ಶ್ರೀ ಮಠದ ಪರಂಪರೆಯಯಲ್ಲಿ 1798-1804ರವರೆಗೆ ಸಂಸ್ಥಾನವನ್ನು ಆಳಿ, ನೂರಾರು ವಿದ್ವಾಂಸರನ್ನೂ ಶ್ರೀಗುಣನಿಧಿ ತೀರ್ಥರು ಪ್ರೋತ್ಸಾಹಿಸಿ ಬೆಳೆಸಿದ್ದರು ಎಂದರು.

ತಾಯೂರು ವಂಶಸ್ಥರಾದ ಟಿ.ಎನ್. ಮಾಧವ ಮೂರ್ತಿ, ಟಿ.ಎನ್. ವೇಣುಗೋಪಾಲ, ಟಿ.ಎನ್. ರಂಗನಾಥ, ಕೇಶವಮೂರ್ತಿ, ಟಿ.ಜಿ. ರಾಘವೇಂದ್ರ, ಪ್ರಧಾನ ಅರ್ಚಕ ಗೋಪಿನಾಥಾಚಾರ್ ಮತ್ತು ರಿಸರ್ವ್ ಬ್ಯಾಂಕ್ ಸಹಾಯಕ ಪ್ರಧಾನ ವ್ಯವಸ್ಥಾಪಕ ಡಾ. ಗಿರಿಧರ ವಿ. ತಾಯೂರು ಉಪಸ್ಥಿತಿಯಲ್ಲಿ ಧಾರ್ಮಿಕ ಕಾರ್ಯ ನೆರವೇರಿದವು. ನೂರಾರು ಭಕ್ತರು ಭಾಗವಹಿಸಿದ್ದರು.