ಬಹುತ್ವವನ್ನೇ ಉಸಿರಾಗಿಸಿಕೊಂಡವರು ರಾಮಚಂದ್ರಪ್ಪ: ನಟಿ ಭಾವನಾ ರಾಮಣ್ಣ ಬಣ್ಣನೆ

ಕನ್ನಡ ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆ ಹಾಗೂ ದಂಡಿನ ರಾಜಪ್ಪ ಪರಿವಾರ ಪ್ರತಿಷ್ಠಾನದಿಂದ ಮಾನಸಗಂಗೋತ್ರಿಯ ಬಿ.ಎಂ.ಶ್ರೀ. ಸಭಾಂಗಣದಲ್ಲಿ ಆಯೋಜಿಸಿದ್ದ ‘ಬರಗೂರು: ಮಹತ್ವದ ಬೇರು’ ವಿಚಾರಸಂಕಿರಣ ಉದ್ಘಾಟಿಸಿ ಅವರು ಮಾತನಾಡಿದರು.

ರಾಮಚಂದ್ರಪ್ಪ ಅವರ ಮಾತು ಹಾಗೂ ದೃಷ್ಟಿಯಲ್ಲಿ ಬಂಡಾಯ ಇರಬಹುದು. ಆದರೆ ಅವರ ಹೃದಯ ಅತ್ಯಂತ ಸೂಕ್ಷ್ಮತೆಯಿಂದ ಕೂಡಿದ್ದು, ಬಹುತ್ವವನ್ನೇ ಉಸಿರಾಗಿಸಿಕೊಂಡಿದ್ದಾರೆ. ಅವರ ಸಿನಿಮಾದ ಕಥೆಗಳು ಸಂವೇದನೆಯನ್ನೇ ಹೇಳುತ್ತವೆ. ಭಾಗೀರಥಿ ಸಿನಿಮಾ ಕೆರೆಗೆ ಹಾರ ಪದ್ಯದಿಂದ ಸ್ಫೂರ್ತಿ ಪಡೆದಿದ್ದರೂ ಬರಗೂರರ ವಿಮರ್ಶಾ ವಿಸ್ತರಣೆಯು ಎಲ್ಲರನ್ನೂ ಸೆಳೆಯುತ್ತದೆ ಎಂದರು.

ಬರಗೂರು ಮಾಡಿರುವ ಎಲ್ಲ ಸಿನಿಮಾಗಳಲ್ಲಿ, ಕಥೆಗಳಲ್ಲಿ ಹೆಣ್ಣಿನ ಮನಸ್ಸಿನ ದ್ವಂದ್ವಗಳನ್ನು ಹೇಳುತ್ತವೆ. ಹೆಣ್ಣಿನ ಒಳ ಮನಸ್ಸಿನ ಭಾವನೆಗಳನ್ನು ಹೇಳುತ್ತದೆ. ಇದರಲ್ಲಿ ಪ್ರಮುಖವಾದದ್ದು ಭಾಗೀರಥಿ. ಭಾಗೀರಥಿಯ ಜೀವನದಲ್ಲಿರುವ ಆಸೆಗಳು, ಕನಸುಗಳು ಅಂಕುರಗೊಳ್ಳದಿರುವ ಸಮಯದಲ್ಲೇ ತಾನು ಹೊರಟುಹೋಗುವುದನ್ನು ತಾನೇ ನೋಡುತ್ತಾಳೆ. ಭಾಗೀರಥಿ ತನ್ನ ಕಥೆಯನ್ನು ತನ್ನ ಸ್ನೇಹಿತರ ಬಳಿ, ತಂದೆ, ತಾಯಿ ಗಂಡನ ಬಳಿಯೂ ಹೇಳಿಕೊಳ್ಳುತ್ತಾಳೆ. ಅವಳಿಗೆ ಎಲ್ಲಿಯೂ ಉತ್ತರ ಸಿಗದ ಕಾರಣ ತ್ಯಾಗಕ್ಕೆ ಮುಂದಾಗುತ್ತಾಳೆ ಎಂದು ಹೇಳಿದರು.

ಬರಗೂರು ರಾಮಚಂದ್ರಪ್ಪ ಅವರು ಡಾ.ರಾಜಕುಮಾರ್ ಅವರ ಒಡನಾಡಿ ಗಳಾಗಿದ್ದರು. ಸಾಹಿತ್ಯ, ಸಿನಿಮಾ, ಹೋರಾಟ ಸೇರಿದಂತೆ ಎಲ್ಲವುಗಳ ಜ್ಞಾನ ಭಂಡಾರ ಆಗಿದ್ದಾರೆ. ಭೂತಕಾಲ ಮತ್ತು ವರ್ತಮಾನದ ಕೊಂಡಿಯಾಗಿದ್ದಾರೆ ಎಂದು ಬಣ್ಣಿಸಿದರು.

ಒಂದು ಚಿಕ್ಕ ಮಾತಿಗೂ ಸಹ ಹೆಣ್ಣು ಭಾವನಾತ್ಮಕವಾಗುತ್ತಾಳೆ. ಪುರುಷ ಪ್ರಧಾನ ಸಮಾಜ ಇದ್ದರೂ ಪುರುಷರ ದೃಷ್ಟಿಯಿಂದ ನೋಡುವ ಸಮಾಜ ಬೇರೆ ಇದೆ. ಅದರಲ್ಲಿ ಒಂದು ಹೆಣ್ಣು ಕರುಳನ್ನು ಸೇರಿಸಿ ಅದರ ಮೂಲಕ ಸಮಾಜವನ್ನು ನೋಡಬೇಕು ಎಂದರು.

ಯಾವುದೇ ಕವಿ, ಬರಹಗಾರರಾಗಲಿ ಅವರಲ್ಲಿ ಹೆಂಗರುಳು, ಮಾತೃಹೃದಯ ಇರಬೇಕು. ಆಗ ಮಾತ್ರ ಭಾಷೆ, ದೇಶ, ಕುಟುಂಬ ಸೇರಿದಂತೆ ಪ್ರತಿಯೊಂದನ್ನು ಕರುಣೆಯಿಂದ ನೊಡಬಹುದು ಎಂದು ಹೇಳಿದರು.

ಕುಲಪತಿ ಪ್ರೊ.ಎನ್.ಕೆ.ಲೋಕನಾಥ್, ಕುಲಸಚಿವೆ ಎಂ.ಕೆ.ಸವಿತಾ, ಸಾಹಿತಿ ಬರಗೂರು ರಾಮಚಂದ್ರಪ್ಪ, ಸಂಸ್ಥೆಯ ನಿರ್ದೇಶಕಿ ಪ್ರೊ.ಎನ್.ಕೆ.ಲೋಲಾಕ್ಷಿ, ದಂಡಿನ ರಾಜಪ್ಪ ಪರಿವಾರ ಪ್ರತಿಷ್ಠಾನದ ಖಜಾಂಚಿ ಲತಾ, ಕೆ.ಎಲ್.ದಿವ್ಯಾ ಇತರರಿದ್ದರು.